ប្រធានសាលាដំបូងរាជធានីភ្នំពេញ លោក ជីវ កេង នៅថ្ងៃទី១៣ ខែមីនា ឆ្នាំ២០១២ បានប្រកាសថា តុលាការគ្មានគោលការណ៍ឲ្យដោះលែងជនជាប់ចោទណាមួយ ឬបន្ធូរបន្ថយទោស ដើម្បីឲ្យបានរួចខ្លួន និងមានសេរីភាពនោះទេ បើទោះបីជាមានអន្តរាគមន៍ដោយលួចលាក់ និងតាមវិធីណាក៏ដោយ។
លោកបានបញ្ជាក់ទៀតថា កន្លងមកមានជនខិលខូចមួយចំនួនបានដើរបោកប្រាស់ជនជាប់ចោទដែលកំពុងតែជាប់ក្នុងពន្ធនាគារថា គេអាចរត់ការ និងធានាឲ្យដោះលែងឲ្យមានសេរីភាពវិញបាន ជាថ្នូរនឹងការសូកប្រាក់ច្រើនពាន់ដុល្លារអាមេរិក ប៉ុន្តែទីបំផុតទៅ ការសន្យានោះមិនបានសំរេចឡើយ គឺជាការបោកប្រាស់ដើម្បីយកប្រាក់។
ការបញ្ជាក់របស់លោក ជីវ កេង នេះ គឺជាការឆ្លើយតបទៅនឹងសេចក្ដីរាយការណ៍មួយដែលបានចោទប្រកាន់ថា ជនជាប់ចោទចំនួន ៤នាក់ មានឈ្មោះ ស៊ិន កាមុល សេង វុត្ថា កឹម ដារ៉ា និង សៀង សុខន នៃសំណុំរឿងព្រហ្មទណ្ឌលេខ ២៩៥៣ ចុះថ្ងៃទី២២ ខែធ្នូ ឆ្នាំ២០១០ កន្លងទៅ ត្រូវបានគេរត់ការដោយស្ងាត់ៗ ដើម្បីដោះលែងឲ្យមានសេរីភាពវិញ។
ជនជាប់ចោទទាំង ៤នាក់នោះ ត្រូវបានសាលាដំបូងរាជធានីភ្នំពេញ បានកាត់ទោសឲ្យជាប់គុកម្នាក់ៗ រវាងពី ២០ឆ្នាំ ទៅ ៣០ឆ្នាំ ក្រោមបទជួញដូរគ្រឿងញៀនឆ្លងដែនខុសច្បាប់។ ជនជាប់ចោទឈ្មោះ សៀង សុខន គឺជាអតីតទីប្រឹក្សារបស់លោក ជា ស៊ីម ប្រធានព្រឹទ្ធសភា។
ទាក់ទងនឹងការចោទប្រកាន់នេះ អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោក គុយ ប៊ុនសន បានមានប្រសាសន៍បញ្ជាក់នៅថ្ងៃទី១៣ ខែមីនា ឆ្នាំ២០១២ ថា ឈ្មោះជនជាប់ចោទទាំង ៤នាក់នេះ នៅមានក្នុងបញ្ជី ហើយជនជាប់ចោទទាំង ៤នាក់នេះ កំពុងតែជាប់ឃុំខ្លួននៅក្នុងពន្ធនាគារព្រៃស នៅមណ្ឌលកែប្រែ ម.១។ លោកបញ្ជាក់ថា ជនជាប់ចោទទាំង ៤នាក់នោះ ធ្លាប់បានតុលាការនាំមកជម្រះក្តីចំនួន ៣លើកមកហើយ ប៉ុន្តែត្រូវបានពន្យារពេល។
ប្រធានក្រុមស៊ើបអង្កេតនៃអង្គការការពារសិទ្ធិមនុស្ស លីកាដូ (Licadho) លោក អំ សំអាត បានមានប្រសាសន៍ថា បើសិនជារឿងនេះជាការពិត រដ្ឋាភិបាលគប្បីបង្កើតក្រុមការងារមួយ ដើម្បីស៊ើបអង្កេតរកការពិត៖ «គឺយើងសុំឲ្យមានការបំភ្លឺឲ្យបានច្បាស់លាស់ពីអាជ្ញាធរពាក់ព័ន្ធ ហើយចាត់វិធានការ បើសិនជាមានភាពមិនប្រក្រតី ឬក៏មានអំពើពុករលួយណាមួយនៅក្នុងករណីនេះ»។
លោកសុំឲ្យប្រព័ន្ធយុត្តិធម៌នៅកម្ពុជា ប្រកាន់យកឯករាជភាព និងរឹងមាំ ជៀសវាងរងនូវឥទ្ធិពលពីអ្នកមានប្រាក់ និងអំណាច។
តាមការបញ្ជាក់ពីប្រធានពន្ធនាគារព្រៃស លោក ស៊ុយ វ៉ាន់ស៊ន បានឲ្យដឹងថា បច្ចុប្បន្នមានជនជាប់ចោទ និងទណ្ឌិតសរុបជាង ១៤.០០០នាក់ ជាប់ឃុំនៅគុកព្រៃស រាប់ទាំងជនជាប់ចោទទាំង ៤នាក់នោះដែរ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។