សាលាដំបូងរាជធានីភ្នំពេញ នៅថ្ងៃទី១៧ ខែសីហានេះ បានប្រកាសសាលក្រមផ្ដន្ទាទោសកំបាំងមុខនិពន្ធនាយក និងចាងហ្វាងរបស់កាសែតមាតុភូមិ ដោយឲ្យសងជំងឺចិត្តមន្ត្រីយោធាម្នាក់ ក្នុងម្នាក់ៗចំនួន ២លានរៀល និងបង្គាប់ឲ្យបង់ប្រាក់ផាកពិន័យចូលថវិការដ្ឋ ក្នុងម្នាក់ៗចំនួន ១លានរៀលទៀត ក្រោមបទចោទថា កាសែតនេះបានផ្សាយព័ត៌មានមិនពិត ដែលបានចោទប្រកាន់ថា មេបញ្ជាការយោធាម្នាក់នៅក្នុងខេត្តក្រចេះ ឈ្មោះ មាស សុភាព បានដឹកឈើខុសច្បាប់ និងស្តុកឈើខុសច្បាប់កាលពីឆ្នាំ២០០៩កន្លងទៅ។
និពន្ធនាយកកាសែតមាតុភូមិឈ្មោះលោក ស៊ុន សុផល និងចាងហ្វាងឈ្មោះ ជា ច័ន្ទប្រាកដ ដែលបានរងការប្ដឹងដោយលោក មាស សុភាព មានតួនាទីជាប្រធានវរ២០៤ នៅក្នុងខេត្តក្រចេះ គឺប្ដឹងតាមមាត្រាទី១០ នៃច្បាប់របបសារព័ត៌មានប្រទេសកម្ពុជា។
មេធាវីការពារក្ដីឲ្យ លោក ស៊ុន សុផល និងលោក ជា ច័ន្ទប្រាកដ គឺលោក ស៊ុយ សុខុន បានមានប្រសាសន៍ប្រាប់វិទ្យុអាស៊ីសេរីថា លោកកំពុងតែរៀបចំបណ្ដឹងសារទុក្ខទៅសាលាឧទ្ធរណ៍ទៀត ដើម្បីប្ដឹងទាស់នឹងសាលក្រមនេះ។
លោក ស៊ុយ សុខុន បានបញ្ជាក់ថា ៖ «គាត់គោរពក្រមសីលធម៌ វិជ្ជាជីវៈនៃសារព័ត៌មានទេ គឺការទប់ស្កាត់កុំឲ្យបទល្មើសនេះកើតឡើងបន្តទៀត»។
ចៅក្រមជម្រះក្តីនៃតុលាការក្រុងភ្នំពេញ ដែលបានប្រកាសសាលក្រមនេះ មានឈ្មោះលោក ឌិន ស៊ីវុទ្ធី និងព្រះរាជអាជ្ញាឈ្មោះ ហឿង សុភ័ក្រ្ត ប៉ុន្តែគេមិនបានឃើញមេធាវីដើមចោទ និងលោក មាស សុភាព មកចូលរួមក្នុងសវនាការនោះទេ។
និពន្ធនាយកនៃកាសែតមាតុភូមិ គឺលោក ស៊ុន សុផល អាយុ ៣៨ឆ្នាំ បានមានប្រសាសន៍ប្រតិកម្មថា ៖ «ព័ត៌មានដែលយើងចុះ យើងទៅយកមានប្រភព! យើងយកបានប៉ុណ្ណឹងហើយ មានភស្តុតាងបង្ហាញ! វាជារឿងអយុត្តិធម៌សម្រាប់ខ្ញុំ!»។
វិទ្យុអាស៊ីសេរីមិនទាន់អាចទាក់ទងបាននៅឡើយទេ ដើម្បីសុំសេចក្ដីអត្ថាធិប្បាយនានាពីភាគីលោក មាស សុភាព ប្រធានវរ២០៤ នៅក្នុងខេត្តក្រចេះជាដើមបណ្ដឹងនោះ។
ប្រធានសមាគមមិត្តសារព័ត៌មានកម្ពុជា លោក ឱម ចាន់ដារ៉ា បានមានប្រសាសន៍ថា ៖ «ពីព្រោះថា ការសរសេរ ដោយឃើញអង្គហេតុ និងបទល្មើសជាក់ស្ដែង អ៊ីចឹងទេការសម្រេចដាក់ឲ្យគ្នាសងជំងឺចិត្ត ឬបង់ ជារឿងអយុត្តិធម៌ណាស់!»។
កាសែតមាតុភូមិជាភាសាខ្មែរ មានចំនួន ៤ទំព័រ ដែលចេញផ្សាយរៀងរាល់ ១សប្ដាហ៍ម្ដង គឺបានចេញផ្សាយកាលពីថ្ងៃទី២៧ និងថ្ងៃទី៣០ ខែមេសា ឆ្នាំ២០០៩កន្លងទៅ បានចោទប្រកាន់ថា ប្រធានវរ២០៤ ឈ្មោះ មាស សុភាព នៅក្នុងខេត្តក្រចេះ បានប្រមូលទិញឈើ ដឹកឈើតាមរថយន្តដើម្បីស្តុកទុកនៅក្នុងឃុំស្វាយជ្រះ ស្រុកស្នួល ខេត្តក្រចេះ ដើម្បីទុកលក់។ កាសែតនេះបានចេញផ្សាយភ្ជាប់ជាមួយនឹងភស្តុតាងរូបថតឡានដឹកឈើ និងកន្លែងស្តុកឈើ នោះ។
ប្រធានសមាគម មិត្តសារព័ត៌មានកម្ពុជា លោក ឱម ចាន់ដារ៉ា បានកត់សម្គាល់ថា ចាប់តាំងពីឆ្នាំ២០០៨មក មានកាសែតនានាចំនួនជាង ១០ហើយបានរងការប្ដឹង ក្រោមបទផ្សាយព័ត៌មានមិនពិត និងបទបរិហារកេរ្តិ៍ ដែលប្ដឹងដោយមន្ត្រីជាន់ខ្ពស់រដ្ឋាភិបាល និងមន្ត្រីយោធា ក្នុងនោះមានកាសែតមនសិការខ្មែរ កាសែតខ្មែរម្ចាស់ស្រុក កាសែត ឌឹ ឃែមបូឌា ដេលី (The Cambodia Daily) កាសែតរស្មីកម្ពុជា កាសែតកោះសន្តិភាព កាសែតខ្មែរអមតៈ និងថ្មីៗនេះ កាសែតមាតុភូមិ។
ក្រុមអ្នករិះគន់រដ្ឋាភិបាល និងសកម្មជនការពារសិទ្ធិមនុស្ស បានហៅការប្ដឹងនេះថាជាការបំបិទសិទ្ធិសេរីភាពក្នុងការបញ្ចេញមតិ និងសិទ្ធិទទួលនូវព័ត៌មាន ឬសិទ្ធិដឹងឮព័ត៌មាន៕