ក្រុមប្រឹក្សាឃ្លាំមើលកម្ពុជាបានចេញផ្សាយសេចក្តីថ្លែងការណ៍មួយនៅថ្ងៃទី២៣ ខែកុម្ភៈ លើកឡើងថា ទាំងគណៈកម្មការព្រំដែនកម្ពុជានិងថ្នាក់ដឹកនាំរាជរដ្ឋាភិបាល មិនមានសេចក្តីក្លាហានហ៊ានទទួលស្គាល់ការពិតលើការផ្តល់យោបល់ពីមន្ត្រីសង្គមស៊ីវិលនិងបក្សប្រឆាំង ពីការបាត់បង់ទឹកដីដែលប្រទេសជិតខាងរំលោភយកម្តង់ណាឡើយ។ ផ្ទុយទៅវិញរដ្ឋាភិបាលតែងវាយបកតាមរយៈការចាប់ដាក់ពន្ធនាគារនិងប្តឹងចំពោះអ្នកហ៊ានលើកយកបញ្ហាព្រំដែនមកនិយាយ ដែលទង្វើនេះអាចនាំឲ្យកម្ពុជាបាត់បង់ដីធ្លីបន្ថែមទៀតទៅថ្ងៃអនាគត។
បន្ថែមលើសេចក្តីថ្លែងការណ៍ លោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យដែលធ្លាប់ត្រូវបានរដ្ឋាភិបាលចាប់ដាក់ពន្ធនាគារដោយសារហ៊ាននិយាយពីបញ្ហាព្រំដែនកន្លងមក បានបញ្ជាក់បន្ថែមដូច្នេះ ៖ «សាក្សីរស់គឺប្រជាពលរដ្ឋដែលរស់នៅតាមភូមិឋានហ្នឹងបានដឹងឮទាំងអស់គ្នាថា ពួកគាត់បានបាត់បង់ទឹកដីដោយសារតែការបោះបង្គោលព្រំដែនហ្នឹង ហើយអ្វីដែលគណបក្សប្រឆាំងសមរង្ស៊ីបានស្នើ ក៏ដូចជាឯកឧត្ដម សម រង្ស៊ី បានលើកឡើង វាស្ដែងឲ្យឃើញការពិត ហើយយើងចង់ឲ្យថ្នាក់ដឹកនាំរាជរដ្ឋាភិបាល ក៏ដូចជាគណៈកម្មការព្រំដែនកម្ពុជា ត្រូវតែពិចារណាឡើងវិញទៅនឹងរាល់ឯកសារទាំងឡាយដែលលោក សម រង្ស៊ី បានលើកឡើង»។
ក្នុងសន្និសីទកាសែតបន្ទាន់កាលពីថ្ងៃទី២២ ខែកុម្ភៈ លោកទេសរដ្ឋមន្ត្រី វ៉ា គឹមហុង ប្រធានគណៈកម្មការព្រំដែនកម្ពុជារបស់រដ្ឋាភិបាល បានគ្រោងដាក់ពាក្យប្តឹងលោក សម រង្ស៊ី មួយករណីទៀត ពីបទក្លែងឯកសារសាធារណៈដែលលោក សម រង្ស៊ី កាលពីចុងខែមករា ឆ្នាំ២០១០ បានបង្ហាញផែនទីមួយដែលអះអាងថា ការបោះបង្គោលកំណត់ព្រំដែនកម្ពុជា-វៀតណាម ពិសេសនៅត្រង់បង្គោលតម្រុយលេខ១៨៥ ស្ថិតក្នុងស្រុកចន្ទ្រា ខេត្តស្វាយរៀង គឺរដ្ឋាភិបាលធ្វើឡើងដោយកាត់ដីឲ្យប្រទេសវៀតណាម។
លោកទេសរដ្ឋមន្ត្រី វ៉ា គឹមហុង បានចោទប្រកាន់ថា លោក សម រង្ស៊ី បានប្រើប្រាស់ឯកសារក្លែងបន្លំ ដើម្បីបម្រើផលប្រយោជន៍ឲ្យគណបក្សសមរង្ស៊ី ដែលលោកថា ជាទង្វើក្បត់ជាតិ។
លោក វ៉ា គឹមហុង បញ្ជាក់ឲ្យដឹងដូច្នេះ ៖ «ឯកឧត្ដម សម រង្ស៊ី និងបក្ខពួករបស់លោក ម្ដងហើយម្ដងទៀត ទោះជារាជរដ្ឋាភិបាលខំពន្យល់យ៉ាងណាក៏អត់យកចិត្តទុកដាក់ស្ដាប់ ទោះជាទីស្ដីការគណៈរដ្ឋមន្រ្តីលោកខំធ្វើយ៉ាងណា... តុមូល តុជ្រុងអីទាំងអស់ ក៏លោកអត់យកចិត្តទុកដាក់ស្ដាប់ ហើយនៅតែចោទយើងមិនចេះចប់មិនចេះហើយ។ នេះជាអំពើក្បត់ជាតិមួយធ្ងន់ធ្ងរដែលរាជរដ្ឋាភិបាលគ្រោងនឹងប្ដឹងឯកឧត្ដម សម រង្ស៊ី បន្តទៅទៀតក្នុងការបន្លំឯកសារសាធារណៈ»។
ទោះជាបែបនេះក្តី ក្រុមប្រឹក្សាឃ្លាំមើលកម្ពុជា បានអំពាវនាវដល់ថ្នាក់ដឹកនាំរដ្ឋាភិបាលកម្ពុជា ឲ្យបញ្ឈប់ការប្រើប្រាស់យុទ្ធសាស្ត្រប្តឹង និងចាប់មនុស្សដាក់ពន្ធនាគារពីការចូលរួមការពារបូរណភាពទឹកដីបន្តទៀត។ មានន័យថា ការការពារបូរណភាពទឹកដីត្រូវឲ្យមានការចូលរួមពីប្រជាពលរដ្ឋនិងគ្រប់បក្សនយោបាយ ហើយថា រាល់ចំណាត់ការរបស់រដ្ឋាភិបាលចំពោះការប្តឹងនិងចាប់មនុស្សដាក់ពន្ធនាគារលើបញ្ហាព្រំដែន មិនមែនជាដំណោះស្រាយក្នុងការការពារបូរណភាពទឹកដីកម្ពុជានោះទេ ផ្ទុយទៅវិញទង្វើរបស់រដ្ឋាភិបាលដែលបានធ្វើចំពោះអ្នកហ៊ានលើកយកបញ្ហាព្រំដែនមកនិយាយជាអំពើបំបាក់ស្មារតី ឆន្ទៈអ្នកស្នេហាជាតិនិងធ្វើឲ្យប្រទេសកម្ពុជាប្រឈមនឹងការបាត់បង់ដីធ្លីធ្ងន់ធ្ងរទៅវិញទេ៕