អត្រា​មរណៈ​របស់​ទារក​នៅ​តែ​មាន​កម្រិត​គួរ​ឱ្យ​ព្រួយ​បារម្ភ

បញ្ហា​ថែទាំ​សុខភាព​នៅ​ប្រទេស​កម្ពុជា នៅ​តែ​ចោទ​ជា​បញ្ហា​ប្រឈម​នៅ​ឡើយ​រហូត​មក​ដល់​ឆ្នាំ ២០១១។ ក្នុង​នោះ ការ​ស្លាប់​របស់​ទារក​ក៏​ជា​បញ្ហា​ដែល​ត្រូវ​ឲ្យ​​គេ​យក​ចិត្ត​ទុក​ដាក់​ខ្លាំង​ ទាំង​ក្រសួង​សុខាភិបាល និង​អង្គការ​មិនមែន​រដ្ឋាភិបាល។

មន្ត្រី​សុខាភិបាល​ផ្នែក​សុខភាព​កុមារ បាន​ឱ្យ​ដឹង​ថា អត្រា​ស្លាប់​របស់​កូន​ង៉ែត​នៅ​ក្នុង​ប្រទេស​កម្ពុជា​បច្ចុប្បន្ន នៅ​តែ​មាន​ចំនួន​ច្រើន​នៅ​ឡើយ។

ប្រធាន​មជ្ឈមណ្ឌល​ជាតិ​គាំពារ​មាតា និង​ទារក នៅ​រាជធានី​ភ្នំពេញ គឺ​បណ្ឌិត​សាស្ត្រាចារ្យ គុំ កាណាល់ មាន​ប្រសាសន៍​នៅ​ថ្ងៃ​ទី​១៤ វិច្ឆិកា ឆ្នាំ​២០១១ ថា បើ​ទោះ​ជា​មាន​ការ​ថយ​ចុះ​បន្តិច​ក្ដី អត្រា​ស្លាប់​របស់​កូន​ង៉ែត នៅ​តែ​ជា​បញ្ហា​ព្រួយ​បារម្ភ​ខ្លាំង​របស់​ក្រសួង​សុខាភិបាល។

លោក គុំ កាណាល់៖ «អត្រា​ស្លាប់​ទារក​ចុះ​ហើយ។ ឆ្នាំ​២០០៥ មាន ៦៣ លើ ១.០០០​កំណើត។ ឥឡូវ ២០១០ ចុះ​មក​នៅ ៤៥ លើ ១.០០០​កំណើត។ ប៉ុន្តែ​អ្វី​ដែល​យើង​បារម្ភ គឺ​ស្លាប់​របស់​កូន​ង៉ែត ៤៥​ថ្ងៃ​ដំបូង​ហ្នឹង គឺ​អត់​ចុះ​ប៉ុន្មាន​ទេ។ គឺ​វា​ចុះ​ពី ៣០ មក​នៅ ២៨។ ចុះ​តិច​ណាស់។ ចំណែក​ឯ​ក្រោម ១​ឆ្នាំ វា​ចុះ​ពី ៦០ ជាង​មក​នៅ ៤៥»

ការ​ថ្លែង​របស់​លោក គឺ​ឱ្យ​ធ្វើ​ឡើង​ក្នុង​ឱកាស​បើក​វគ្គ​ហ្វឹកហ្វឺន​ស្ដី​ពី​ការ​សង្គ្រោះ​ទារក​មិន​គ្រប់​ខែ សម្រាប់​វេជ្ជបណ្ឌិត និង​គ្រូពេទ្យ​ផ្នែក​សុខភាព​មាតា ទារក ដែល​រៀបចំ​ដោយ​ដោយ​មូលនិធិ​លើក​ស្ទួយ​ការ​ថែទាំ​សុខភាព​មក​ពី​ប្រទេស​អ៊ីតាលី មួយ មាន​ឈ្មោះ​ថា មូលនិធិ​អ៊ីស មីត វ៉េសត៍ (East Meets West Foundation) សហការ​ជា​មួយ​មជ្ឈមណ្ឌល​ជាតិ​គាំពារ​មាតា និង​ទារក​កម្ពុជា ឧបត្ថម្ភ​ថវិកា​ដោយ អេ.អែន.ធី អ៊ីតាលី (ANT Italy)។

លោក ភូវ ណារិន ជា​មន្ត្រី​តំណាង​មូលនិធិ អ៊ីសធ៍ មីត វ៉េសធ៍ នៅ​ប្រទេស​កម្ពុជា។ លោក​ថ្លែង​ថា វគ្គ​ហ្វឹកហ្វឺន​នេះ គឺ​សំរាប់​វេជ្ជ​បណ្ឌិត និង​គ្រូពេទ្យ​មក​ពី​មន្ទីរ​ពេទ្យ ១៣ ក្នុង​ខេត្ត ក្រុង​ចំនួន ១០ ជា​ទិសដៅ​មួយ​រួម​ចំណែក​កាត់​បន្ថយ​អត្រា​មរណៈ​របស់​ទារក ដែល​កម្ពុជា​កំពុង​ប្រឈម​មុខ៖ «នៅ​ស្រុក​ខ្មែរ​នេះ​យើង​មាន​មន្ទីរ​ពេទ្យ​ដែល​មាន​កម្មវិធី​ណីអូ (NEO) កូនង៉ែត​ហ្នឹង មាន​មន្ទីរ​ពេទ្យ ២ គឺ​កាល់ម៉ែត និង​ណាសូណាល់ អឹម.ស៊ី.អេច្ឆ (National MCH មជ្ឈមណ្ឌល​ជាតិ​គាំពារ​មាតា និង​ទារក) ហ្នឹង។ ខេត្ត​ផ្សេងៗ យើង​អត់​មាន ហើយ​កន្លែង​ផ្សេងៗ ចាប់​ផ្ដើម​ធ្វើ​ហ្នឹង​ភាគ​ច្រើន​ធ្វើ​ទៅ​ខ្វះ​សម្ភារៈ ខ្វះ​បច្ចេកទេស។ អ៊ីចឹង អ៊ីសធ៍ មីត វ៉េសធ៍ ចូល​មក​នេះ ជួយ​ពង្រឹង​ទាំង​ផ្នែក​បណ្ដុះបណ្ដាល ទាំង​ផ្ដល់​សម្ភារៈ​ឱ្យ​ទៅ​កន្លែង ដែល​ជួយ​សង្គ្រោះ​ទារក»

វេជ្ជបណ្ឌិត​ផ្នែក​ថែទាំ​ជំងឺ​ទារក​នៃ​មជ្ឈមណ្ឌល​ជាតិ​គាំពារ​មាតា និង​ទារក លោក សោម រិទ្ធី ដែល​រំពឹង​ថា នឹង​បាន​ផល​វិជ្ជមាន​ពី​វគ្គ​ហ្វឹកហ្វឺន មាន​ប្រសាសន៍​បញ្ជាក់​ថា កត្តា​ចម្បង​នៃ​ការ​ស្លាប់​របស់​ទារក គឺ​ការ​ក្លាយ​ជំងឺ ការ​កើត​មិន​គ្រប់​ខែ ហើយ​បច្ចេកទេស និង​សម្ភារៈ​ថែទាំ​មិន​ទាន់​គ្រប់គ្រាន់។

លោក សោម រិទ្ធី៖ «នៅ​ពេល​ដែល​យើង​ទទួល​កូន​មិន​គ្រប់​ខែ​ច្រើន អត្រា​មរណៈ​នៅ​ខ្ពស់​ច្រើន ដោយសារ​ការ​ថែទាំ​របស់​យើង​ទៅ​លើ​កូន​មិន​គ្រប់​ខែ គឺ​ថា​នៅ​មាន​ការ​ខ្វះខាត។ ឧទាហរណ៍​ដូច​ជា​កូន​មិន​គ្រប់​ខែ យើង​ត្រូវ​ប្រើប្រាស់​ទឹក​ដោះ​ម្ដាយ។ យើង​មិន​ប្រើ​ទឹក​គោ​ជំនួស​បាន​ទេ។ បើ​នៅ​ស្រុក​គេៗ ជឿនលឿន គេ​ប្រើ​ទឹក​ដោះ​គោ ដែល​មាន​ជា​ហ្វកមីល (រូបមន្ត) សម្រាប់​កូន​ដែល​កើត​មិន​គ្រប់​ខែ។ យើង​ឯ​ណេះ​អត់​ទេ គឺ​យើង​ប្រើ​ទឹក​ដោះ​ម្ដាយ ហើយ​ការ​ថែទាំ​របស់​យើង​លើ​កូន​ប្រេម៉ា (មិនគ្រប់​ខែ) ហ្នឹង គឺ​លំបាក ព្រោះ​វា​តូច»

មន្ត្រី​កម្មវិធី​អន្តរជាតិ​នៃ​មូលនិធិ ​អ៊ីសធ៍ មីតស៍ វ៉េសធ៍ របស់​ប្រទេស​អ៊ីតាលី ដានីកា គូម៉ារ៉ា (Danica Kumara) បាន​ឱ្យ​ដឹង​​ថា វគ្គ​ហ្វឹកហ្វឺន​នេះ ក៏​នឹង​ផ្ដល់​ជំនាញ​លើ​ការ​ប្រើប្រាស់​អុកស៊ីហ្សែន​ដល់​ទារក​មិន​គ្រប់​ខែ​ដែរ។ បញ្ហា​សុខភាព​ទារក​កើត​មិន​គ្រប់​ខែ នឹង​ត្រូវ​លើក​យក​ទៅ​ពិភាក្សា​គ្នា​ក្នុង​សន្និសីទ​អន្តរជាតិ​មួយ​នៅ​រាជធានី​ភ្នំពេញ នៅ​ថ្ងៃ​ទី​១៧ ខែ​វិច្ឆិកា ឆ្នាំ​២០១១ នេះ៕