ក្លិនទឹកស្អុយក្នុងដងអូរតំបន់ច្រកទ្វារឆ្លងកាត់ព្រំដែន បានសាយភាយពាសពេញទីប្រជុំជន នៅក្នុងបរិវេណគល់ស្ពានមិត្តភាពកម្ពុជាថៃ ក្នុងក្រុងប៉ោយប៉ែត ខេត្តបន្ទាយមានជ័យ កំពុងបំពុលបរិស្ថាន ព្រមទាំងបង្កឲ្យមានផលប៉ះពាល់ដល់ភ្ញៀវទេសចរណ៍ជាតិ អន្តរជាតិ ដែលបានធ្វើដំណើរឆ្លងកាត់ច្រកទ្វារអន្តរជាតិនៅទីនោះ។
នៅតាមមាត់អូរជាប់គល់ស្ពានមិត្តភាពកម្ពុជា-ថៃ គេសង្កេតឃើញសំរាមថង់ផ្លាសស្ទីក ត្រូវបានគេយកបោះគរចោលនៅក្នុងអូរ និងមានមុខលូបង្ហូរទឹកស្អុយជាច្រើនកន្លែងរបស់អគារកាស៊ីណូនៅក្នុងទីប្រជុំជនក្រុងប៉ោយប៉ែត។
លោក ខៀវ បូរី រស់នៅក្រុងប៉ោយប៉ែតបានមានប្រសាសន៍ថា ក្លិនទឹកស្អុយ ដែលសាយភាយចេញពីក្នុងអូរ បានបង្កឲ្យមានបរិយាកាសមិនល្អទាល់តែសោះ ដល់ប្រជាពលរដ្ឋដែលបានប្រើប្រាស់ទឹកអូរនោះ ជាពិសេស ចំពោះភ្ញៀវទេសចរណ៍ជាតិ និងអន្តរជាតិ ដែលបានឆ្លងកាត់ច្រកទ្វារអន្តរជាតិប៉ោយប៉ែត ៖ «ទឹកស្អុយមានផលប៉ះពាល់ទី១ មានផលប៉ះពាល់ដល់បរិស្ថាន ទី២ប៉ះពាល់ដល់ភ្ញៀវទេសចរណ៍ ដែលគាត់ឆ្លងកាត់តាមហ្នឹងមួយថ្ងៃៗ»។
អគារកាស៊ីណូជាច្រើន នៅក្នុងទីប្រជុំជនក្រុងប៉ោយប៉ែត បានបង្ហូរទឹកស្អុយចូលក្នុងអូរទាំងអស់ ជាក់ស្តែង គេសង្កេតឃើញមានលូបង្ហូរទឹកស្អុយទាំងនោះ ត្រូវបានគេធ្វើឡើងចំក្បែរគល់ស្ពាន់ ជាប់មាត់ច្រកទ្វារអន្តរជាតិប៉ោយប៉ែត បានជះក្លិនស្អុយនៅទីនោះ។
ក្រុមអ្នកដំណើរ និងភ្ញៀវទេសចរណ៍ដែលធ្វើដំណើរឆ្លងកាត់នៅពេលធំក្លិនស្អុយ បានរៀបរាប់ថា ក្លិនស្អុយបានធ្វើអាប់អូរបរិយាកាសនៅទីនោះ និងបានធ្វើឲ្យមានផលប៉ះពាល់បរិស្ថានយ៉ាងខ្លាំង ៖ «និយាយមិនស្អុយម៉េច អាហ្នឹងទឹកកាស៊ីណូវា ទឹកស្អុយៗ អីក៏ហូរមកតាមហ្នឹងដែរ»។
លោក សៅ សារិទ្ឋ ដែលបានធ្វើដំណើរទៅដល់គល់ស្ពានមិត្តភាពកម្ពុជា-ថៃ បានបន្ថែមថា ក្លិនស្អុយបានរំខានយ៉ាងខ្លាំងដល់អ្នកដែលបានធ្វើដំណើរឆ្លងកាត់មកទឹកដីប្រទេសកម្ពុជា ៖ «អូរក្លិនស្អុយជះពេញទាំងអស់ អ្នកធ្វើដំណើរគ្រប់គ្នាគេធុនទ្រាន់ ប៉ុន្តែមិនដឹងធ្វើយ៉ាងម៉េច មិនដឹងឲ្យខាងណាគេចាត់វិធានការរឿងហ្នឹង ទីកន្លែងនោះគឺជាទីកន្លែងដែលភ្ញៀវអន្តរជាតិចេញចូលរវាងប្រទេសមួយ និងប្រទេសមួយ យើងវាអត់សមមានប្រភពអ៊ីចឹងកើតឡើងទេ ព្រោះស្អុយណាស់ អ៊ីចឹងគួររាជរដ្ឋាភិបាលចាត់វិធានការណាមួយ ដើម្បីទប់ស្កាត់បញ្ហាស្អុយហ្នឹង»។
ក្រុមអ្នកដំណើរខ្លះ ដែលឈានជើងចូលដល់គល់ស្ពានមិត្តភាពកម្ពុជា-ថៃ បានរិះគន់ថា ការមិនយកចិត្តទុកដាក់នៅក្នុងការថែទាំបរិស្ថានបានធ្វើឲ្យប៉ះពាល់យ៉ាងខ្លាំងដល់មុខមាត់ប្រទេសជាតិ ព្រោះថាកន្លែងបំពុលបរិស្ថាននោះ គឺជាច្រកទ្វារអន្តរជាតិមួយរបស់ប្រទេសកម្ពុជា ៖ «ប៉ះពាល់បរិស្ថាន រំខានការប្រើប្រាស់ទឹក ហូរទឹកពីកាស៊ីណូមក និយាយរួមដងអូរហ្នឹង នេសាទបានត្រីតែហូបអត់កើត មិនត្រឹមតែប៉ុណ្ណឹង វាទៅដល់អាអូរខៃណន និយាយរួមដល់ស្ទឹងសែសិន»។
អាជ្ញាធរខេត្តបន្ទាយមានជ័យរហូតមកទល់ពេលនេះ នៅមិនទាន់មានវិធានការជាក់លាក់ណាមួយនៅឡើយទេ ក្នុងការកែលម្អបរិស្ថាននៅទីនោះ ជាពិសេសទៅលើបញ្ហាអគារកាស៊ីណូនៅក្រុងប៉ោយប៉ែត ដែលកំពុងបង្ហូរទឹកស្អុយ។ លោក អ៊ុង អឿន អភិបាលខេត្តបន្ទាយមានជ័យបានមានប្រសាសន៍ថា លោកមិនទាន់បានដឹងជុំវិញបញ្ហាខាងលើនេះ ប៉ុន្តែលោកបានបញ្ជាក់ថានឹងចាត់វិធានការឲ្យអាជ្ញាធរមូលដ្ឋានក្រុងប៉ោយប៉ែតគិតគូរជុំវិញការបំពុលបរិស្ថាននេះ ៖ «ចាំមើលខ្ញុំឲ្យអភិបាលក្រុង គេរាយការណ៍ឲ្យខ្ញុំសិន»។
ចៅសង្កាត់ប៉ោយប៉ែត លោក សាន ស៊ានហូ បានអះអាងថា ដើម្បីលុបបំបាត់ការបំពុលបរិស្ថាន ដែលបង្ករឡើងដោយការបង្ហូរទឹកស្អុយចេញពីកាស៊ីណូ ខាងអាជ្ញាធរមូលដ្ឋានបានតម្រូវឲ្យម្ចាស់កាស៊ីណូទាំងនោះ រៀបចំអាងស្តុកចម្រោះទឹកស្អុយ នៅតាមអគារកាស៊ីណូនីមួយៗ ៖ «យើងនឹងធ្វើទៅមុខទៀត យើងនឹងធ្វើអាងចម្រោះទឹកស្អុយមិននឹងធ្លាក់ចូលទៅអូរ ប៉ុន្តែក្រុមហ៊ុនមួយចំនួន ក៏គេមានធ្វើដែរកន្លងមក អាងចម្រោះមុននឹងទឹកកង្វក់ធ្លាក់ចូលទៅក្នុងអូរ គេបានធ្វើ ប៉ុន្តែមានក្រុមហ៊ុនខ្លះ គេអត់ទាន់បានអនុវត្តនូវគោលការណ៍ហ្នឹងទេ ខ្ញុំបានធ្វើការណែនាំរួចហើយ»។
នៅក្នុងក្រុងប៉ោយប៉ែត ខេត្តបន្ទាយមានជ័យ ដែលមានព្រំដែនប្រទេសថៃ គេសង្កេតឃើញមានកាស៊ីណូចំនួន៧កន្លែង ប៉ុន្តែគ្រប់អគារកាស៊ីណូទាំងអស់ និងសំណង់ផ្សេងៗ បានសាងសង់លូបង្ហូរទឹកចូលទៅក្នុងដងអូរប៉ោយប៉ែតទាំងអស់ ដែលប្រការនេះបានធ្វើឲ្យប៉ះពាល់យ៉ាងខ្លាំងដល់បរិស្ថាន និងបញ្ហាសុខភាពប្រជាពលរដ្ឋខ្មែរ ដែលពួកគាត់បានយកទឹកនោះទៅប្រើប្រាស់ប្រចាំថ្ងៃ។
អភិបាលក្រុងប៉ោយប៉ែត លោក ទ្រី ណារិន បានមានប្រសាសន៍ថា អាជ្ញាធរក្រុងប៉ោយប៉ែតកន្លងទៅនេះបានដឹកនាំគណៈប្រតិភូខ្មែរទៅជួបពិភាក្សាជាមួយអាជ្ញាធរស្រុកអារ៉ាញ់ ខេត្តស្រះកែវ ប្រទេសថៃ ជាច្រើនដងដែរ ដើម្បីជជែកគ្នាជុំវិញបញ្ហាបរិស្ថាន ប៉ុន្តែនៅមិនទាន់មានវិធានការជាក់លាក់ណាមួយត្រូវបានដាក់ចេញនៅឡើយទេ ៖ «ឥឡូវយើងកំពុងជជែកគ្នាអំពីអូរព្រំដែនហ្នឹង ដើម្បីយើងដោះធ្វើយ៉ាងម៉េច ឲ្យបរិស្ថានយើងល្អឡើងវិញ ព្រោះកន្លងមក ទាំងភាគីយើង ទាំងខាងភាគីថៃ តែងតែយកអូរហ្នឹង ទី១ បោះសំរាមចូលក្នុងអូរ ទី២ បង្ហូរទឹកលូចូលក្នុងអូរ»។
លោក ទ្រី ណារិន បានបន្តថា បច្ចុប្បន្នភាគីទាំងពីរ កម្ពុជា-ថៃ កំពុងបង្កើននូវយន្តការមួយ ដើម្បីចុះទៅកើបសំរាមចេញពីក្នុងអូរនោះ ៖ «អ៊ីចឹងខ្ញុំកំពុងគិតគូរបញ្ហាទាំងអស់ហ្នឹងហើយ ចាំផ្ដល់ព័ត៌មាននៅពេលក្រោយ។ កាលពីមុនយើងទៅប្រជុំមិនបានសម្រេចអីទេ ឥឡូវយើងដាក់ប្រជុំមួយខែម្ដងៗ សហប្រតិបត្តិការរវាងបរិស្ថាន ការងារសន្តិសុខ ការជួញដូរ»។
ប្រជាពលរដ្ឋខ្មែរ ដែលមានលំនៅឋាននៅតាមដងអូរបានថ្លែងថា បញ្ហាបំពុលបរិស្ថាននៅក្នុងទឹកអូរ ដោយសារការបោះចោលសំរាម និងការដាក់លូបង្ហូរទឹកស្អុយរបស់អគារកាស៊ីណូ កំពុងគំរាមកំហែងដល់សុខមាលភាពរបស់អ្នកភូមិថែមទៀត ៖ «កសិករ ប្រជាពលរដ្ឋជាច្រើនម៉ឺននាក់នៅតាមដងអូរ ប្រើត្រីលែងកើតត្រីហ្នឹង ធំក្លិនសាប៊ូ ត្រីច្រើនមែនទែនមួយសំណាញ់សឹងតែលើកមិនរួចទេ ប៉ុន្តែបងប្អូនប្រជាពលរដ្ឋដែលរស់នៅតាមដងអូរហ្នឹង ទីមួយគាត់ស្អុយ ហើយទី២គាត់គឺគាត់ទទួលផលហូបត្រីអត់កើត ត្រីដែលនៅក្នុងអូរក្លាយជាត្រីដែលធំក្លិនស្អុយ»។
ប្រភពទឹកស្អុយដែលគេបង្ហូរចេញពីអគារកាស៊ីណូ ក្នុងទីប្រជុំជនក្រុងប៉ោយប៉ែត ចូលទៅក្នុងអូរក្រវាត់ ព្រំដែនកម្ពុជា-ថៃ គឺបានហូរកាត់តាមភូមិឃុំនានា នៅតាមព្រំដែន ដូចជានៅក្នុងក្រុងប៉ោយប៉ែត ស្រុកម៉ាឡៃ បន្តចូលទៅស្ទឹងសែសិន ក្នុងខេត្តបន្ទាយមានជ័យ និងភ្ជាប់ទៅស្រុកមួយចំនួនទៀត ក្នុងខេត្តបាត់ដំបង៕