មេធាវីការពារក្តីឲ្យកសិករដែលរងការរឹបយកដីធ្លីមិនបានសម្រេច និងក្លែងបន្លំឯកសារដោយមន្ត្រីជាន់ខ្ពស់ក្រសួងអធិការកិច្ច និងឈ្មួញដីធ្លីនោះ បានទទូចសុំឲ្យតុលាការក្រុងភ្នំពេញ កំណត់កាលបរិច្ឆេទថ្មីឲ្យបានឆាប់ ដើម្បីបើកសវនាការកាត់ទោសជនជាប់ចោទ ២នាក់ ក្រោមបទប្រព្រឹត្តអំពើពុករលួយស៊ីសំណូក និងសូកប៉ាន់ទឹកប្រាក់ចំនួនប្រមាណ ២០ម៉ឺនដុល្លារអាមេរិក។
លោកបានដាក់សំណើនេះទៅតុលាការក្រុងភ្នំពេញ កាលពីថ្ងៃទី១០ ខែសីហា ថ្មីៗនេះ ប៉ុន្តែលោកនៅមិនទាន់បានទទួលចម្លើយនៅឡើយទេរហូតដល់ពេលនេះ។
ចៅក្រមជម្រះក្តីលើសំណុំរឿងនេះលោក ជ័យ សុវណ្ណ បានមានប្រសាសន៍ថា លោកបានឃើញលិខិតសំណើនោះហើយ។ លោកគ្រោងនឹងដាក់កម្មវិធីជម្រះសំណុំរឿងនេះនៅខែក្រោយ ពីព្រោះលោកមានកិច្ចការពារមមាញឹកនៅពេលនេះ។
កាលពីថៃ្ងទី២២ ខែកក្កដា កន្លងទៅថ្មីៗនេះ តុលាការក្រុងភ្នំពេញ បានបើកការជម្រះក្តីលើសំណុំរឿងអាស្រូវពុករលួយនេះម្តងទៅហើយ ប៉ុន្តែបានប្រកាសលើកពេលវិញ ដោយសារតែជនជាប់ចោទ និងមេធាវីឈ្មួញដីធ្លីបានអវត្តមាន និងបានស្នើពន្យារពេល។
មេធាវីការពារក្តីឲ្យកសិកររងគ្រោះលោកស្រី ហួត សារុំ គឺលោក កៅ ទី បានមានប្រសាសន៍ប្រាប់វិទ្យុអាស៊ីសេរីថា ៖ «ព្រោះរឿងហ្នឹងមានភស្តុតាង មានគ្រប់គ្រាន់ ហើយអត់មានអី ឬមូលដ្ឋានណាត្រូវលើកពន្យារពេលហ្នឹងទេ»។
ជនជាប់ចោទចំនួនពីរនាក់នោះ មានឈ្មោះ សេង យៀន ជាអគ្គនាយករងនៃអគ្គនាយកដ្ឋានអធិការកិច្ចរបស់ក្រសួងអធិការកិច្ច បានរងការចោទតាមមាត្រាទី៣៨ នៃច្បាប់ព្រហ្មទណ្ឌសម័យអ៊ុនតាក់ ដោយសារតែលោកបានទទួលប្រាក់សំណូក ២០ម៉ឺនដុល្លារអាមេរិក ជាថ្នូរនឹងការធ្វើរបាយការណ៍ក្លែងបន្លំ ដើម្បីរឹបយកដីធ្លីជាង ៥ហិកតាពីកសិករខ្មែរ ឈ្មោះ ហួត សារុំ កាលពីចន្លោះឆ្នាំ២០០៨ និងឆ្នាំ២០០៩ កន្លងទៅ ដើម្បីប្រគល់ឲ្យឈ្មួញដីធ្លីម្នាក់ឈ្មោះលោកស្រី ឌី ព្រឹម។
ឈ្មួញដីធ្លីឈ្មោះលោកស្រី ឌី ព្រឹម បានរងការចោទប្រកាន់តាមមាត្រាទី៥៨ នៃច្បាប់ព្រហ្មទណ្ឌសម័យអ៊ុនតាក់ ក្រោមបទសូកប៉ាន់ប្រាក់ ២០ម៉ឺនដុល្លារអាមេរិកឲ្យលោក សេង យៀន នោះ។
ការធ្វើរបាយការណ៍ភូតកុហកនោះ នៅគ្រាដែលដីធ្លីជាង ៥ហិកតារបស់កសិករឈ្មោះ ហួត សារុំ នោះ មានគេចង់ទិញក្នុងតម្លៃជាង ៧លានដុល្លារអាមេរិក ដើម្បីសាងសង់រោងចក្រ។
ក្រសួងអធិការកិច្ចគឺបានតាំងខ្លួនជាដើមបណ្ដឹងលើសំណុំរឿងនេះ។
វិទ្យុអាស៊ីសេរីមិនទាន់អាចទាក់ទងសុំការពន្យល់ពីលោក ខៀវ សុផល ជាមេធាវីការពារក្តីឲ្យលោក សេង យៀន នោះ បាននៅឡើយទេ។ ប៉ុន្តែលោក ច័ន្ទ វិចិត្រ ជាមេធាវីការពារក្តីឲ្យឈ្មួញដីធ្លី លោកស្រី ឌី ព្រឹម បានមានប្រសាសន៍ថា ៖ «ខ្ញុំនៅតែគិតថា គាត់អត់មានកំហុសរឿងហ្នឹង»។
ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ លោក ជា ហ៊ាន បានមានប្រសាសន៍ថា ៖ «មិនគួរឲ្យអ្នកប្រព្រឹត្ត អ្នកទទួលសំណូក និងអ្នកសូកប៉ាន់រួចគេចពីផ្លូវច្បាប់ទេ»។
កាលពីថ្ងៃទី១៤ ខែកក្កដា កន្លងទៅ ប្រធានអង្គភាពប្រឆាំងអំពើពុករលួយនៅក្នុងប្រទេសកម្ពុជា លោក ឱម យ៉ិនទៀង បានប្រកាសថា មុខសញ្ញាចំនួនជាង ១០ម៉ឺននាក់ នឹងតម្រូវឲ្យប្រកាសទ្រព្យសម្បត្តិ ចាប់ពីខែវិច្ឆិកា ឆ្នាំ២០១០នេះតទៅ ក្នុងនោះមានមន្ត្រីយោធា នគរបាល មន្ត្រីរាជការ ស៊ីវិលដែលមានតួនាទីតែងតាំងដោយអនុក្រឹត្យ និងព្រះរាជក្រឹត្យទ្បើងទៅ។ ក្រៅពីនេះ មានមេដឹកនាំរដ្ឋាភិបាល សមាជិករដ្ឋាភិបាល សមាជិកសភា សមាជិកព្រឹទ្ធសភា និងមេដឹកនាំអង្គការសង្គមស៊ីវិលនានានៅកម្ពុជា៕