មន្ត្រីជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ទំហំខូចខាតសរុបដោយសារគ្រោះទឹកជំនន់នៅឆ្នាំ២០១១នេះ គិតជាទឹកប្រាក់គឺមានចំនួនជាង ១០០លានដុល្លារអាមេរិក។ ចំណែកឯប្រជាពលរដ្ឋដែលបានស្លាប់ដោយសារទឹកជំនន់ គេបានរកឃើញថាកើនដល់ចំនួន ២០៧នាក់ហើយ គិតចាប់ពីដើមខែសីហា មកដល់ថ្ងៃទី១០ តុលា ឆ្នាំ២០១១។
រដ្ឋាភិបាលកម្ពុជា កំពុងតែដំណើរការលើគម្រោងស្តារ និងជួសជុលផ្លូវលំជាច្រើនរយគីឡូម៉ែត្រ ដែលខូចខាតដោយសារទឹកជំនន់ ដោយប្រើប្រាស់កម្មវិធីស្បៀងអាហារពលកម្មនៅខេត្តមួយចំនួន។ កម្មវិធីស្បៀងអាហារពលកម្មនេះគឺពឹងផ្អែកលើជំនួយមនុស្សធម៌ និងស្ម័គ្រចិត្តពីមជ្ឈដ្ឋានជាតិ និងអន្តរជាតិ។
ខេត្តដែលលិចទឹកជំនន់ គឺមានចំនួនសរុប ១៧ខេត្ត ប៉ុន្តែខេត្តដែលបានលិចទឹកជំនន់ធ្ងន់ធ្ងរជាងគេ គឺខេត្តកំពង់ធំ ខេត្តព្រៃវែង ខេត្តកណ្ដាល និងខេត្តកំពង់ចាម។
អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា បានមានប្រសាសន៍នៅក្នុងសន្និសីទកាសែតនៅថ្ងៃទី១០ ខែតុលា ថា ទឹកជំនន់នៅឆ្នាំ២០១១នេះ គឺមានកន្លែងមួយចំនួនខូចខាតធ្ងន់ធ្ងរជាងឆ្នាំ២០០០ និងឆ្នាំ២០០១ កន្លងទៅ។
លោកថ្លែងបន្ថែមថា ៖ «ជារឿងគ្មាននរណាគេចរួចទេ។ រឿងធម្មជាតិកើតឡើងនៅទន្លេមេគង្គ និងជុំវិញទន្លេសាបនេះ សូមទាំងអស់គ្នាយកចិត្តទុកដាក់លើកកម្ពស់ជីវភាពរស់នៅរបស់ប្រជាជនយើង ត្រូវធ្វើយ៉ាងម៉េច។ ទឹកជំនន់មិនមែនលិចតែគណបក្សប្រជាជនណា? គណបក្សណាក៏លិចដែរ តែគេចរួចងាប់ដូចគ្នាហ្នឹង»។
មេឃុំទំនប់ ស្រុកបាធាយ ខេត្តកំពង់ចាម លោក ឈិន ឈូយ បានមានប្រសាសន៍ថា ទឹកជំនន់នៅតែបន្តឡើងនៅឡើយនៅឃុំទំនប់ ៖ «បាទ! បើសិនជាទឹកហ្នឹងនៅតែឡើងទៀតទេ យើងមិនអាចស្ដារវិញបានខ្លះទេ ។ បើសិនជាទឹកនៅតែឡើងប្រហែលជាខូចទាំងស្រុងនៅវាលខាងកើតនោះ ប្រហែលជា ៩០០ហិកតារ។ បើទឹកស្រក យើងអាចស្ដារបានវិញខ្លះ តែបើសិនជាទឹកនៅតែឡើងទៀតទេ យើងខូចទាំងស្រុងហើយ គេហៅថា វាលឈូក»។
សេចក្ដីរាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ស្រូវចំនួនជាង ៣សែនហិកតាររងការលិចលង់ដោយសារទឹកជំនន់។ ស្រូវចំនួនជាង ១០ម៉ឺនហិកតារបានខូចខាតដោយសារទឹកជំនន់។ ផ្លូវលំ និងផ្លូវសហគមន៍ប្រវែងជាង ១.៨០០គីឡូម៉ែត្រ បានខូចខាត។ ផ្លូវជាតិប្រវែងជាង ១០០គីឡូម៉ែត្រ បានខូចខាតដោយសារទឹកជំនន់។
លើសពីនេះទៀត សាលារៀនចំនួន ១.០៥៣កន្លែងបានលិចទឹកជំនន់។ ផ្ទះសម្បែងប្រជាពលរដ្ឋចំនួន ៦០០ខ្នង បានលិចទឹកជំនន់ បណ្ដាលឲ្យខូចខាតទាំងស្រុង។ ផ្ទះសម្បែងប្រជាពលរដ្ឋចំនួនជាង ១៨ម៉ឺនខ្នងទៀត បានប៉ះពាល់ដោយសារទឹកជំនន់ ប៉ុន្តែមិនខូចខាតទេ។ ប្រជាពលរដ្ឋជាង ៧ម៉ឺនគ្រួសារត្រូវបានជម្លៀសទៅទីទួលសុវត្ថិភាព។
លោក ញឹម វណ្ណដា បានមានប្រសាសន៍ថា មកដល់ពេលនេះមន្ត្រីជាន់ខ្ពស់នៃកម្មវិធីស្បៀងអាហារពិភពលោក (WFP) បានសន្យាផ្ដល់អង្ករចំនួន ៥០០តោន និងថវិកាជាង ១លាន៥សែនដុល្លារអាមេរិក ដើម្បីសង្គ្រោះបន្ទាន់។
ក្រៅពីនេះទៀត មន្ត្រីជាន់ខ្ពស់នៃធនាគារអភិវឌ្ឍន៍អាស៊ី (ADB) បានសន្យាផ្ដល់ថវិកាចំនួន ៣លានដុល្លារអាមេរិក និងផ្ដល់ប្រាក់កម្ចីការប្រាក់ទាប។
លោកនាយករដ្ឋមន្ត្រី ហ៊ុន សែន កាលពីសប្ដាហ៍កន្លងទៅនេះបានប្រកាសថា លោកត្រៀមអង្ករចំនួន ១.៩០០តោនដើម្បីសង្គ្រោះបន្ទាន់ និងជួយឧបត្ថម្ភដល់គ្រួសារអ្នកស្លាប់ដោយសារទឹកជំនន់ម្នាក់ទទួលបានថវិកាចំនួន ២លានរៀល៕