មន្ត្រីនាំពាក្យនៃទីស្ដីការគណៈរដ្ឋមន្ត្រី នៅថ្ងៃទី២២ ខែកញ្ញា បានមានប្រតិកម្មថា ជារឿងបំផ្លើស និងលាបពណ៌ដល់រដ្ឋាភិបាលកម្ពុជា ចំពោះរបាយការណ៍របស់អង្គការសហប្រជាជាតិថា កម្ពុជាបានប្រើប្រាស់ប្រព័ន្ធតុលាការដើម្បីបំបិទសិទ្ធិសេរីភាពក្នុងការបញ្ចេញមតិនោះ។
លោក ផៃ ស៊ីផាន ជាមន្ត្រីនាំពាក្យនៃទីស្ដីការគណៈរដ្ឋមន្ត្រី បានមានប្រសាសន៍ថា ប្រទេសកម្ពុជា ជាប្រទេសមានសិទ្ធិសេរីភាពពេញលេញ ព្រោះថា រដ្ឋាភិបាលបើកឲ្យមានស្ថាប័នទូរទស្សន៍ វិទ្យុ សារព័ត៌មានផ្សេងៗ និងអ្នកនយោបាយគណបក្សប្រឆាំងមានសិទ្ធិបញ្ចេញមតិគ្រប់ពេល ប៉ុន្តែអង្គការសហប្រជាជាតិបានចេញរបាយការណ៍នេះថា ជារឿងមិនពិត។
លោក ផៃ ស៊ីផាន មានប្រសាសន៍បន្តថា ៖ «រាល់ករណីដែលចូលទៅតុលាការហ្នឹង សុទ្ធតែមានអង្គហេតុ និងអង្គច្បាប់វិនិច្ឆ័យត្រឹមត្រូវបំផុត ដូច្នេះការនិយាយហ្នឹង គ្រាន់តែជាការលាបពណ៌រដ្ឋាភិបាល ជាពិសេសប្រព័ន្ធតុលាការហ្នឹងឯង»។
របាយការណ៍របស់អង្គការសហប្រជាជាតិ បានចេញផ្សាយកាលពីពេលថ្មីៗនេះ បានសរសេរថា នៅកម្ពុជា ច្បាប់ស្ដីពីការផ្សាយព័ត៌មានមិនពិត និងបរិហារកេរ្តិ៍ ត្រូវបានគេប្រើប្រាស់ដោយមានលក្ខណៈលម្អៀងចំពោះអ្នកសារព័ត៌មាន សកម្មជនសិទ្ធិមនុស្ស និងមេដឹកនាំនយោបាយ ហើយតុលាការហាក់បីដូចជាមិនបកស្រាយច្បាប់នេះ និងការកំណត់អំពីសេរីភាពក្នុងការបញ្ចេញមតិឲ្យបានច្បាស់ ស្របតាមច្បាប់របស់ប្រទេសកម្ពុជាទេ។
ដូចជាកាលពីឆ្នាំ២០០៩ សមាជិកសភានៃគណបក្សប្រឆាំងចំនួន ៣រូប គឺលោក សម រង្ស៊ី ប្រធានគណបក្ស សម រង្ស៊ី លោក ហូ វ៉ាន់ លោកស្រី មូរ សុខហួរ និងអ្នកកាសែតចំនួនពីររូបទៀត លោក ហង្ស ចក្រា និងលោក រស់ សុឃិត ត្រូវបានគេចោទប្រកាន់អំពីការផ្សាយព័ត៌មានមិនពិត និងបរិហារកេរ្តិ៍។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានលើកឡើងថា ក្នុងរយៈពេលចុងក្រោយនេះ អង្គការធ្វើការទាក់ទងនឹងសិទ្ធិមនុស្សជាច្រើន បានចេញរបាយការណ៍ទាក់ទងនឹងការរំលោភសិទ្ធិមនុស្ស ដូចជាករណីរំលោភដីធ្លី និងការបំបិទមាត់ក្នុងការបញ្ចេញមតិតាមរយៈរដ្ឋាភិបាល បានប្រើប្រាស់ប្រព័ន្ធតុលាការជាដើម។
លោក អ៊ូ វីរៈ បានបញ្ជាក់ថា របាយការណ៍ទាំងនេះគឺជាកត្តាសំខាន់ណាស់ ក្នុងការផ្ដល់អនុសាសន៍ទៅរដ្ឋាភិបាល ហើយរដ្ឋាភិបាលគួរតែទទួលស្គាល់របាយការណ៍ទាំងនេះ ៖ «ជាការសោកស្ដាយដែរ ជាទូទៅរដ្ឋាភិបាលបានប្រតិកម្មបែបនេះ ប្រតិកម្មបែបគ្របដណ្ដប់ ដោយមិនបានមើលខ្លឹមសារនៃរបាយការណ៍ ហើយខ្ញុំសូមអំពាវនាវដល់រដ្ឋាភិបាលយកចិត្តទុកដាក់ខ្លឹមសារនៃរបាយការណ៍ ដែលរដ្ឋាភិបាលតែងតែថា ចង់ឲ្យអង្គការមិនមែនរដ្ឋាភិបាល និងអង្គការសហប្រជាជាតិធ្វើការរិះគន់ដោយវិជ្ជមាន ឬក៏ផ្ដល់អនុសាសន៍ចំៗ»។
របាយការណ៍របស់អង្គការសហប្រជាជាតិដដែល បានបញ្ជាក់ទៀតថា រដ្ឋាភិបាលគួរមានការអត់ធ្មត់ចំពោះពាក្យរិះគន់ ជាជាងការប្រើប្រព័ន្ធតុលាការដើម្បីបំបិទមាត់អ្នករិះគន់ទាំងនោះ ព្រោះវាជាផ្នែកមួយនៃសុខភាពប្រជាធិបតេយ្យ ហើយរដ្ឋាភិបាលគួរតែចាត់ឲ្យអ្នកនាំពាក្យឆ្លើយតប ឬប្រតិកម្មទៅនឹងអ្នករិះគន់គោលនយោបាយរបស់ខ្លួនជាជាងការប្ដឹងផ្ដល់ទៅតុលាការ ដោយប្រើច្បាប់ព្រហ្មទណ្ឌបទផ្សាយព័ត៌មានមិនពិត និងបរិហារកេរ្តិ៍នោះ៕