លោក ខៀវ កាញារីទ្ធ មន្រ្តីអ្នកនាំពាក្យរបស់រដ្ឋាភិបាលកម្ពុជា និងជារដ្ឋមន្រ្តីក្រសួងព័ត៌មានផងដែរនោះ បានមានប្រសាសន៍ប្រាប់វិទ្យុអាស៊ីសេរីថា លោកបានទទួលលិខិតពីលោក ហង្ស ចក្រា កាលពីថៃ្ងអង្គារ ផ្ញើចេញពីពន្ធនាគារព្រៃស។
លោកបានមានប្រសាសន៍ទៀតថា លោកបានជម្រាបរឿងនេះជូនលោក សុខ អាន ហើយ ព្រមទាំងសមាគមអ្នកកាសែតចំនួន៥ទៀតជុំវិញរឿងនេះ ហើយលោករំពឹងទុកថា នឹងមាននីតិវិធីមួយទៀតសម្រាប់ការលើកលែងការចោទប្រកាន់និងដោះលែងឲ្យមានសេរីភាពវិញ ប៉ុន្តែវាស៊ីពេលយូរបន្តិចដោយសារភាពសាំញ៉ាំនៅក្នុងដៃតុលាការទៅហើយ។
លោក អំ សំអាត ជាប្រធានផែ្នកស៊ើបអង្កេតនៃអង្គការសិទ្ធិមនុស្សក្រៅរដ្ឋាភិបាលមួយ ហៅកាត់ថា លីកាដូ បានថ្លែងប្រាប់វិទ្យុអាស៊ីសេរីនៅថៃ្ងព្រហស្បតិ៍ ទី១០ ខែកញ្ញា ថា ៖ «សង្ឃឹមថា លោក ហង្ស ចក្រា នឹងមានសេរីភាពដើម្បីប្រកបវិជ្ជាជីវៈសារព័ត៌មានឡើងវិញ»។
ទាក់ទងនឹងបញ្ហាខាងលើនេះ លោក ជូង ជូងី ជាមេធាវីរបស់លោក ហង្ស ចក្រា ចាងហ្វាងកាសែតខែ្មរម្ចាស់ស្រុកនោះ បានមានប្រសាសន៍ថា លោកមិនទាន់បានដឹងរឿងនេះនៅឡើយទេ។
លោក ជូង ជូងី បានមានប្រសាសន៍ថា ៖ «ខ្ញុំអត់បានដឹងរឿងហ្នឹងដែរ គ្រាន់តែពេលនេះខ្ញុំឮអ្នកសារព័ត៌មានមួយចំនួននិយាយរឿងហ្នឹង»។
នៅស្របពេលជាមួយគ្នានេះដែរ ក្រុមសកម្មជនការពារសិទ្ធិមនុស្សនៃអង្គការសិទ្ធិមនុស្សក្រៅរដ្ឋាភិបាល ហៅកាត់ថា លីកាដូ និងក្រុមគ្រួសាររបស់លោក ហង្ស ចក្រា មានគម្រោងការចូលជួបរួមគ្នាសួរសុខទុក្ខ លោក ហង្ស ចក្រា នៅក្នុងគុកព្រៃស នៅថៃ្ងព្រហស្បតិ៍ ទី១០ ខែកញ្ញា ដើម្បីពិនិត្យមើលស្ថានការណ៍សុខភាពរបស់គាត់។
សូមជម្រាបថា លោក ហង្ស ចក្រា ជាចាងហ្វាងកាសែតខែ្មរម្ចាស់ស្រុកគាំទ្រគណបក្សប្រឆាំងសមរង្ស៊ី ត្រូវបានតុលាការសាលាដំបូងរាធានីភ្នំពេញផ្តន្ទាទោសកាលពីថៃ្ងទី២៦ ខែមិថុនាកន្លងទៅ ឲ្យជាប់គុកចំនួនរយៈពេល១២ខែ និងផាកពិន័យជាប្រាក់ចំនួន៩លានរៀលក្រោមបទចោទប្រកាន់ថាបានផ្សាយព័ត៌មានមិនពិត ក្រោយពីកាសែតរបស់លោកបានចេញផ្សាយព័ត៌មានមួយចំនួនកាលពីខែមេសានិងខែឧសភាកន្លងទៅ ក្រោមចំណងជើងថា "លោកនាយករដ្ឋមន្រ្តី ហ៊ុន សែន បំបែកសំបុកមន្រ្តីអាក្រក់និងមន្ត្រីពុករលួយនៅជុំវិញលោក សុខ អាន" និងអត្ថបទព័ត៌មានមួយទៀតសរសេរថា "មន្រ្តីនិយមលោក សុខ អាន ប្រឈមមុខនឹងការដកចេញពីដំណែងជាច្រើននាក់"។
កាលពីថៃ្ងទី១១ ខែសីហាកន្លងទៅនេះ តុលាការសាលាឧទ្ធរណ៍នៃប្រទេសកម្ពុជាបានសម្រេចតម្កល់សាលក្រមផ្តន្ទាទោសខាងលើនេះចាត់ទុកថាជាបានការ ហើយបានបង្គាប់ឲ្យបន្តឃុំខ្លួនលោក ហង្ស ចក្រា ក្នុងគុកព្រៃសជាបន្តទៀត។
ក្រុមសកម្មជនការពារសិទ្ធិមនុស្សជាតិនិងអន្តរជាតិ ព្រមទាំងក្រុមអ្នកនយោបាយជំទាស់បានហៅការចាប់ខ្លួនអ្នកកាសែតដាក់គុកនោះ ថាជាការបំបិទសំឡេងរិះគន់និងសេរីភាពក្នុងការសម្ដែងមតិ៕