ពលរដ្ឋរងគ្រោះរស់នៅតំបន់បឹងកក់ ស្ថិតក្នុងសង្កាត់ស្រះចក ខណ្ឌដូនពេញ បាននិយាយរៀបរាប់ក្នុងសំឡេងអួលដើមកឲ្យវិទ្យុអាស៊ីសេរីដឹងនៅព្រឹកថ្ងៃទី៣ ខែវិច្ឆិកាថា ទុក្ខកង្វល់ពីការបាត់បង់ផ្ទះសម្បែងរបស់ពួកគាត់ អាជ្ញាធររាជធានីភ្នំពេញ ឬក៏លោកនាយករដ្ឋមន្ត្រី ហ៊ុន សែន មិនបានយកភ្នែកមើល និងជួយដល់ពលរដ្ឋឡើយ បើទោះជាពួកគាត់ដង្ហោយរកកិច្ចអន្តរាគមន៍ជាច្រើនលើកច្រើនសាបែបណាក្ដី។ យ៉ាងនេះក្ដី ពលរដ្ឋនៅតំបន់បឹងកក់ នៅតែមានជំនឿថា បញ្ហានេះប្រមុខដឹកនាំរដ្ឋាភិបាលកម្ពុជា លោក ហ៊ុន សែន អាចជួយដល់ពួកគាត់បាន។
ស្ត្រីម្នាក់ឈ្មោះ ទី ពិសី រស់នៅភូមិ២៤ ដែលផ្ទះរបស់គាត់ត្រូវបានក្រុមហ៊ុនបូមខ្សាច់ពន្លិច នៅថ្ងៃទី៣ ខែវិច្ឆិកា បានអំពាវនាវជាថ្មីទៀតទៅប្រមុខដឹកនាំរដ្ឋាភិបាល ឲ្យជួយទប់ស្កាត់សកម្មភាពបូមខ្សាច់លុបផ្ទះពួកគាត់ជាបន្ទាន់ និងងាកទៅរកការចរចាផ្ដល់សំណងសមរម្យជូនពួកគាត់វិញ ៖ «សម្ដេចទាំងបី សូមឲ្យសម្ដេចជួយដោះស្រាយដល់ផលលំបាករបស់ប្រជាពលរដ្ឋដែលរស់នៅតំបន់បឹងកក់ផង ព្រោះអីប្រជាពលរដ្ឋពួកគាត់កំពុងតែលិចលង់ហើយ»។
ស្ត្រីវ័យចំណាស់មួយរូបទៀត ឈ្មោះ ឈឹម ណាវី បានសម្ដែងពីទុក្ខកង្វល់ និងបានអំពាវនាវដូច្នេះ ៖ «សម្ដេច ហ៊ុន សែន ជួយកូនចៅផង ដោះស្រាយឲ្យប្រជាពលរដ្ឋត្រឹមត្រូវមក ប្រជាពលរដ្ឋគេទៅហើយគេមិននៅទេ ឲ្យពលរដ្ឋសមរម្យមកឲ្យបានទិញផ្ទះនៅ»។
ពលរដ្ឋរងគ្រោះដទៃទៀតបានអំពាវនាវបន្ថែម ៖ «ត្រូវមានគណៈកម្មការមួយធ្វើការដោះស្រាយមួយ មិនមែនឲ្យក្រុមហ៊ុនធ្វើស្រេចតែចិត្តទេ។ ពីមុនថា ក្នុងទឹកដោះស្រាយផ្សេង លើគោកដោះស្រាយផ្សេង តែឥឡូវចង់ឲ្យលើគោក និងក្នុងទឹកដោះស្រាយដូចគ្នា គឺទៅមិនរួចទេ»។
ពលរដ្ឋឲ្យដឹងថា សកម្មភាពបូមខ្សាច់ពន្លិចផ្ទះពលរដ្ឋនៅតំបន់បឹងកក់របស់ក្រុមហ៊ុនស៊ូកាគូ កាលពីថ្ងៃទី៣ ខែវិច្ឆិកា មិនឃើញមានមន្ត្រីរដ្ឋាភិបាលចុះជួបប្រជាពលរដ្ឋ ឬក៏មកផ្អាកសកម្មភាពបូមខ្សាច់របស់ក្រុមហ៊ុនឡើយ។ ពលរដ្ឋរងគ្រោះថ្លែងថា ពួកគាត់បានត្រឹមតែឈរអោបដៃមើលផ្ទះសម្បែងដែលលិចលង់ប៉ុណ្ណោះ ព្រោះមិនអាចធ្វើអ្វីបាន ដោយសារក្រុមហ៊ុនបានដាក់កម្លាំងប្រដាប់អាវុធជាច្រើននាក់ឈរយាមកាមសកម្មភាពបូមខ្សាច់នេះ។
វិទ្យុអាស៊ីសេរីមិនអាចទំនាក់ទំនងមន្ត្រីសាលារាជធានីភ្នំពេញ ដើម្បីឆ្លើយបំភ្លឺអំពីការបូមខ្សាច់លុបផ្ទះពលរដ្ឋរស់នៅតំបន់បឹងកក់បានទេ តាមទូរស័ព្ទ នៅរសៀលថ្ងៃទី៣ ខែវិច្ឆិកា។
ទាក់ទងបញ្ហានេះដែរ លោក គង់ ចំរើន តំណាងខុទ្ទកាល័យលោកនាយករដ្ឋមន្ត្រី ហ៊ុន សែន ធ្លាប់មានប្រសាសន៍ថា កាលពីថ្ងៃទី១៥ ខែកញ្ញា ឆ្នាំ២០០៨ លោកនាយករដ្ឋមន្ត្រីបានសម្រេចឲ្យសាលារាជធានីភ្នំពេញ និងក្រុមហ៊ុនស៊ូកាគូ ដោះស្រាយគោលនយោបាយជូនពលរដ្ឋ ដែលមានខ្នងផ្ទះស្ថិតនៅក្នុងតំបន់បឹងកក់ពិតប្រាកដ ដោយផ្ដល់នូវជម្រើសចំនួន៣ សម្រាប់ឲ្យពលរដ្ឋជ្រើសរើស។
លោក គង់ ចំរើន មានប្រសាសន៍ឲ្យដឹងដូច្នេះ ៖ «កត្តាបីហ្នឹង គឺទី១ យកផ្ទះដែលសង់ស្រេច ទី២ យកប្រាក់ ៨ពាន់ដុល្លារ និង២លានរៀល និងទី៣ នៅនឹងកន្លែងហ្នឹង ដើម្បីយកផ្ទះនៅនឹងកន្លែងហ្នឹង។ ការបូមខ្សាច់បូមអី បើមិនបូមគឺអត់ធ្វើអីបានទេ គឺអត់កែប្រែតំបន់ហ្នឹងបានទេ»។
លោក អ៊ូច ឡេង មន្ត្រីកម្មវិធីដីធ្លីសមាគមអាដហុក ដែលចុះឃ្លាំមើលសកម្មភាពបូមខ្សាច់ ចាក់លុបលំនៅឋានពលរដ្ឋនៅតំបន់បឹងកក់ របស់ក្រុមហ៊ុនស៊ូកាគូ បានចាត់ទុកសកម្មភាពនេះថា ជាការរំលោភដល់សិទ្ធិរស់នៅរបស់ប្រជាពលរដ្ឋធ្ងន់ធ្ងរ។
លោកថ្លែងបន្ថែម ៖ «ប្រទេសយើងមានច្បាប់ល្អណាស់ ប៉ុន្តែរដ្ឋាភិបាលគាត់មានចេតនាមួយ គឺគាត់មិនគោរពច្បាប់ទាល់តែសោះ គឺគាត់ទាត់ចោលការរស់នៅរបស់ប្រជាពលរដ្ឋឲ្យចាកចេញឆ្ងាយពីទីក្រុង ធ្វើម៉េចឲ្យគាត់សម្រេចផែនការទៅខាងក្រុមហ៊ុនបាន ១០០% តែប៉ុណ្ណឹងឯង»។
រដ្ឋាភិបាលកម្ពុជា តាមរយៈសាលារាជធានីភ្នំពេញ កាលពីឆ្នាំ២០០៧ បានចុះកិច្ចព្រមព្រៀងជួលដីបឹងកក់ ទំហំ ១៣៣ហិកតាទៅឲ្យក្រុមហ៊ុនស៊ូកាគូ ក្នុងរយៈពេល ៩៩ឆ្នាំ។ គម្រោងអភិវឌ្ឍន៍នេះបានធ្វើឲ្យពលរដ្ឋជាង ៣.០០០គ្រួសារត្រូវបាត់បង់លំនៅឋាន និងត្រូវជម្លៀសឲ្យចាកចេញពីតំបន់នោះ៕