បន្ទាប់ពីវិលត្រឡប់ពីដំណើរទស្សនកិច្ចតាមរដ្ឋចំនួន៩នៅសហរដ្ឋអាមេរិក លោក កឹម សុខា ប្រធានគណបក្សសិទ្ធិមនុស្ស នៅថ្ងៃច័ន្ទ ទី១៥ ខែកុម្ភៈនេះ មានប្រសាសន៍ថា រូបលោកនឹងធានាចិញ្ចឹម ចេញថ្លៃមេធាវីនិងបង់ប្រាក់ផាកពិន័យជំនួសកសិករពីរគ្រួសារនៅស្រុកចន្ទ្រា ដែលតុលាការចោទប្រកាន់ចាប់ដាក់ពន្ធនាគារពីបទបំផ្លាញតម្រុយបង្គ្រោលព្រំដែន១៨៥ កម្ពុជា-វៀតណាម នៅខេត្តស្វាយរៀង។ លោក កឹម សុខា ឲ្យដឹងដូច្នេះធ្វើឡើងនៅក្នុងសន្និសីទកាសែតកាលពីព្រឹកថ្ងៃច័ន្ទ ទី១៥ នាទីស្នាក់ការគណបក្សក្រុងភ្នំពេញ។
លោក កឹម សុខា មានប្រសាសន៍ដូច្នេះ ៖ «ចោទប្រកាន់ពីបទដក(តម្រុយបង្គោល)ព្រំដែន។ ជនរងគ្រោះទាំងពីរនេះ ចំពោះថវិកាក្នុងការចំណាយមេធាវី ចំណាយលើការបង់ផាកទាំងអស់ គឺគណបក្សសិទ្ធិមនុស្សនិងខ្ញុំផ្ទាល់អ្នកចេញទាំងអស់ ហើយការចិញ្ចឹមជីវភាពទាំងពីរគ្រួសារហ្នឹង រហូតទៅដល់គ្រួសារហ្នឹងគាត់បានចេញពីពន្ធនាគារ យើងជួយចិញ្ចឹមទាំងអស់ ពីព្រោះយើងឈឺចាប់ណាស់ គ្នាគ្រាន់តែទាមទាររឿងដីធ្លីរបស់គ្នាទៅចាប់គ្នាដាក់គុក តើមានរឿងអីជារឿងនយោបាយ? ជារឿងផ្ទាល់ខ្លួនជីវភាពរបស់គ្នា»។
ជុំវិញសំណុំរឿងក្តី លោក ព្រំ ជា និងអ្នកស្រី មាស ស្រី នេះដែរ លោក កឹម សុខា បានដកស្រង់សម្ដីប្រជាពលរដ្ឋដែលលោកបានជួបនៅសហរដ្ឋអាមេរិក បានលើកឡើងប្រហាក់ប្រហែលគ្នាថា ការកាត់ទោសរបស់តុលាការខេត្តស្វាយរៀងទៅលើកសិករពីររូបដែលតស៊ូការពារខ្លាចបាត់បង់ដីស្រែរបស់ខ្លួនបែរជាត្រូវមានទោសទៅវិញនោះ ជារឿងអយុត្តិធម៌បំផុតនិងមិនគួរឲ្យកើតមានបន្តនៅក្នុងសង្គមកម្ពុជាទៀតឡើយ។
ទាក់ទងស្ថានភាពក្នុងពន្ធនាគាររបស់លោក ព្រំ ជា និងអ្នកស្រី មាស ស្រី ត្រូវបានអ្នកស្រី ឈឿង សារិន ភរិយាលោក ព្រំ ជា មានប្រសាសន៍ថា ស្វាមីរបស់គាត់បន្ទាប់ពីមានជំងឺធ្ងន់ធ្ងរក្នុងពន្ធនាគារ មន្ត្រីពន្ធនាគារបានបញ្ជូនរូបគាត់មកកាន់មន្ទីរពេទ្យខេត្ត ដើម្បីព្យាបាលដោយមានការពង្រឹងសន្តិសុខ។ ចំណែកអ្នកស្រី មាស ស្រី ក៏បានធ្លាក់ខ្លួនឈឺផងដែរ ប៉ុន្តែពុំធ្ងន់ធ្ងរដូចប្តីរបស់គាត់ឡើយ។ ភរិយាលោក ព្រំ ជា បន្តថា នៅព្រឹកថ្ងៃទី១៥ ខែកុម្ភៈនេះ ឆ្មាំពន្ធនាគារបានបញ្ជូនប្តីគាត់ទៅកាន់ពន្ធនាគារវិញ បន្ទាប់ពីគ្រូពេទ្យពិនិត្យឃើញថា សុខភាពរបស់គាត់បានធូរស្រាលបន្តិច។
អ្នកស្រី ឈឿង សារិន បានឲ្យដឹងដូច្នេះ ៖ «ខ្ញុំនៅមន្ទីរពេទ្យ ឥឡូវគេយកទៅពន្ធនាគារវិញហើយកាលពីម៉ោង៨ព្រឹក។ គាត់ឈឺក្នុងពោះ រាក។ រាកហ្នឹងប្រហែលជា២០ថ្ងៃហើយ ទើបបានគេធ្វើសំបុត្រធ្វើអីបញ្ជូនមកកន្លែងពេទ្យសម្ដេចយាយនៅខេត្តស្វាយរៀង។ ជើងគាត់ក៏ស្ពឹកផង»។
តុលាការខេត្តស្វាយរៀង កាលពីថៃ្ងទី២៣ ខែធ្នូ ឆ្នាំ២០០៩ ចាប់ឃុំខ្លួនលោកស្រី មាស ស្រី និងលោក ព្រំ ជា ក្រោមបទចោទថា បានបំផ្លាញទ្រព្យសម្បតិ្តសាធារណៈដោយសារតែបានចូលរួមក្នុងការដកតម្រុយបង្គោលព្រំដែនលេខ១៨៥ រវាងកម្ពុជានិងវៀតណាម ជាមួយនឹងលោក សម រង្ស៊ី កាលពីថៃ្ងទី២៥ ខែតុលា ឆ្នាំ២០០៩ នៅឃុំសំរោង ស្រុកចន្រ្ទា ខេត្តស្វាយរៀង។
កាលពីថ្ងៃទី២៧ ខែមករា កន្លងទៅលោក ព្រំ ជា និងអ្នកស្រី មាស ស្រី ត្រូវបានតុលាការខេត្តស្វាយរៀង កាត់ទោសឲ្យជាប់ពន្ធនាគារម្នាក់១ឆ្នាំ។ ចំណែកលោក សម រង្ស៊ី ប្រធានគណបក្សជំទាស់វិញត្រូវជាប់ពន្ធនាគារចំនួនពីរឆ្នាំនិងបានបង្គាប់ឲ្យអ្នកទាំង៣បង់ប្រាក់សំណងជំងឺចិត្តសរុបជាង៦០លានរៀល៕