ប្រជាពលរដ្ឋដែលចូលរួមក្នុងវេទិកាសាធារណៈនៅស្រុកស្នួល ខេត្តក្រចេះ ប្រមាណ៥០០នាក់ បានលើកឡើងថា ចាប់តាំងពីមានការផ្ដល់ដីសម្បទានសេដ្ឋកិច្ចទៅឲ្យក្រុមហ៊ុនវិនិយោគមក ប្រជាពលរដ្ឋអះអាងថា តែងទទួលផលលំបាករហូត។ លោក ចាន់ យ៉ុង នៅឃុំ២ធ្នូ ស្រុកស្នួល បានលើកឡើងថា មានដីនៅភូមិត្រពាំងស្បែក រស់នៅតាំងពីឆ្នាំ១៩៩៩ ដល់ឆ្នាំ២០០៨ មានការរំលោភពីក្រុមហ៊ុនមួយ ហើយបានធ្វើលិខិតតវ៉ាដល់ឃុំ ស្រុក មានតែការសន្យាដោះស្រាយ តែពុំឃើញមានអ្វីសោះ។
លោក ស្រ៊ុន នី នៅភូមិក្រសាំង ឃុំស្នួល បានលើកពីការលំបាករបស់ខ្លួន និងពលរដ្ឋនៅទីនោះជម្រាបអង្គវេទិកាថា ការវិនិយោគរបស់ក្រុមហ៊ុនបែរជាធ្វើឲ្យប្រជាពលរដ្ឋមានការព្រួយទៅវិញ។
លោក អ៊ុជ ម៉ាលី តំណាងរាស្ត្រមកពីគណបក្សហ៊្វុនស៊ីនប៉ិច ខេត្តព្រៃវែងបានមានប្រសាសន៍អះអាងឲ្យប្រជាពលរដ្ឋលើកពីបញ្ហាទំនាស់ដីធ្លីជាមួយក្រុមហ៊ុនឲ្យអស់ ងាយអ្នកតំណាងរាស្ត្រធ្វើអន្តរាគមន៍។ លោក ឡុង រី តំណាងរាស្ត្រមណ្ឌលក្រចេះ មកពីគណបក្សសមរង្ស៊ី បានលើកឡើងថា ក្នុងស្រុកស្នួល មានក្រុមហ៊ុនច្រើនកំពុងគ្របដណ្ដប់ទៅលើឃុំ៥ ធ្វើឲ្យប្រជាពលរដ្ឋភ័យខ្លាច ហេតុនេះលោកចង់ឲ្យប្រជាពលរដ្ឋថ្លែងប្រាប់អំពីគ្រោះភ័យខ្លាចទាំងនោះឲ្យអស់ ដោយកុំឲ្យមានការភ័យខ្លាច ដើម្បីឲ្យអាជ្ញាធរមូលដ្ឋានដឹងផង។
លោក បោង បុប្ផារិទ្ធ អភិបាលរងខេត្តក្រចេះ ដែលចូលរួមក្នុងវេទិកានោះ បានមានប្រសាសន៍ថា ដោយផលលំបាកខ្លះ ដែលអាជ្ញាធរបានដឹងពីផលលំបាក ដែលធ្វើឲ្យមានដល់ប្រជាពលរដ្ឋ អាជ្ញាធរ និងរដ្ឋាភិបាលបានលប់ចោលក្រុមហ៊ុនមួយចំនួន ដែលបានប្រព្រឹត្តខុសពីគោលការណ៍អភិវឌ្ឍ។
លោក ឈឹម សាវុធ មន្ត្រីនៃមជ្ឈមណ្ឌលសិទ្ធិមនុស្សកម្ពុជា អ្នកសម្របសម្រួលកម្មវិធី បានឲ្យដឹងពីគោលបំណង នៃការរៀបចំជាវេទិកានេះឡើង បន្ទាប់ពីសង្កេតឃើញថា កន្លងមកទុកកង្វល់របស់ប្រជាពលរដ្ឋ មានត្រឹមតែការសន្យាជួយ តែពុំមានការដោះស្រាយពិតប្រាកដ ដែលជាហេតុធ្វើឲ្យទំនាស់ចេះតែអូសបន្លាយរហូតមិនចេះចប់៕