នៅថ្ងៃទី៩ កុម្ភៈនេះ គឺជាថ្ងៃទី៤ហើយដែលលោកនាយករដ្ឋមន្រ្តី ហ៊ុន សែន បានចុះទៅសម្ពោធសមិទ្ធិផលនានាដែលទើបបានកសាងឲ្យកងទ័ព និងចុះសួរសុខទុក្ខកងទ័ពដែលកំពុងឈរជើងនៅខេត្តតំបន់ព្រំដែនជាប់ប្រទេសថៃ រួមមានតំបន់ប្រាសាទព្រះវិហារ តំបន់មុំបីនៅខេត្តឧត្តរមានជ័យ តំបន់ប្រាសាទតាមាន់ និងនៅថ្ងៃទី៩ កុម្ភៈនេះ លោកនាយករដ្ឋមន្រ្តីបានចុះទៅសួរសុខទុក្ខទាហាននៅវរសេនាតូចលេខ១៤៣ នៅត្រពាំងប្រាសាទ ខេត្តឧត្តរមានជ័យ។
ក្នុងពេលមានប្រសាសន៍សំណេះសំណាលជាមួយនាយទាហាន ពលទាហាន នៅត្រពាំងប្រាសាទនេះ លោកនាយករដ្ឋមន្រ្តីកម្ពុជាបានបដិសេធពីបញ្ហាដីទំហំ ៤,៦គីឡូម៉ែត្រក្រឡា ក្បែរប្រាសាទព្រះវិហារ ដែលប្រទេសថៃទាមទារថាជាដីរបស់គេ តាមផែនទីឯកតោភាគីដែលគូសវាសដោយប្រទេសថៃ។ លោកនាយករដ្ឋមន្រ្តីខ្មែរបានមានប្រសាសន៍ថា លោកមានគម្រោងលើកយកបញ្ហាទំនាស់តាមព្រំដែនរវាងខ្មែរនិងថៃនេះទៅឲ្យសហគមន៍អន្តរជាតិជួយរកខុសត្រូវឲ្យ បើសិនជាថៃមិនសុខចិត្ត។
លោក ហ៊ុន សែន នាយករដ្ឋមន្រ្តីកម្ពុជា បានបញ្ជាទៅកងទ័ពនៅថ្ងៃទី៩ កុម្ភៈនេះ ក្នុងពេលសំណេះសំណាលជាមួយនាយទាហាន ពលទាហាន នៅខេត្តឧត្តរមានជ័យ ថា បើសិនជាទាហានថៃនៅតែរុលចូលមក កងទ័ពកម្ពុជាត្រូវតែបាញ់ កុំឲ្យទាហានថៃមកទៀត។
លោកនាយករដ្ឋមន្រ្តី ហ៊ុន សែន បានថ្លែងថា ៖ «អស់លោកការពារទឹកដីឲ្យបាន បើឲ្យគេមកយកហើយ គេហ៊ានប្រកាសដូចខ្ញុំប្រកាសពីម្សិលហើយតើ! ការដែលលោក ហ៊ុន សែន អះអាងថា ការទន្ទ្រានរបស់ថៃមានន័យថា ជាការទទួលស្គាល់ថាដីហ្នឹង ដីថៃស្រេចទៅហើយ! អ៊ីចឹងមានន័យថា គេឈ្លានពានយើងដល់ណា គេចាត់ទុកដីគេដល់ហ្នុង។ អ៊ីចឹងទេសុំបញ្ជាក់ឲ្យច្បាស់អំពីបញ្ហាហ្នឹង រឿងអធិបតេយ្យជាតិមិនមែនរឿងលេចសើចទេ! អ៊ីចឹងបាន ជា តារា ទទួលទិសហ្នឹង មើលឲ្យច្បាស់ៗ អត់មានឲ្យរញ៉េរញ៉ៃមកច្រានទ្រូងច្រានអីទេ! អត់ទេ! អ្នកឯងមានកាំភ្លើង ខ្ញុំក៏មានកាំភ្លើង បើអ្នកឯងចង់ចរចា បើអ្នកឯងរុលទ័ពមក ខ្ញុំត្រូវតែដាក់ហើយ ជំពាក់ត្រូវដាក់អ៊ីចឹងតែម្ដង! ព្រោះអ្នកឯងឈ្លានពាន»។
ទាក់ទងជាមួយដីទំហំ ៤,៦គីឡូម៉ែត្រក្រឡាក្បែរតំបន់ប្រាសាទព្រះវិហារ លោកនាយករដ្ឋមន្រ្តីខ្មែរបានមានប្រសាសន៍ថា កម្ពុជាមិនដែលទទួលស្គាល់ថា ផែនទីឯកតោភាគីដែលគូរដោយថៃអះអាងថា មានដីក្បែរប្រាសាទព្រះវិហារនោះជារបស់ទេ ហើយបើថៃមិនយល់ព្រម កម្ពុជាត្រៀមប្តឹងទៅតុលាការអន្តរជាតិម្តងទៀត និងប្តឹងទៅក្រុមប្រឹក្សាសន្តិសុខអង្គការសហប្រជាជាតិទៀតផង។
លោកនាយករដ្ឋមន្រ្តីបានមានប្រសាសន៍ថា ៖ «ដីគេសោះ! ហើយកុំមកទៀត អត់បានទេ! តិចថាកម្ពុជាកាច កាចតែក្នុងទឹកដីខ្លួនទេ កម្ពុជាមិនចូលដីថៃទេ។ ខ្លួនសុំតែប្រើប្រាស់ផែនទីដែលអន្តរជាតិទទួលស្គាល់ ឲ្យថៃទទួលស្គាល់ខ្លួនឯង មើលប្រវត្តិសាស្ត្រទៅ អ្នកវង្វេងប្រវត្តិសាស្ត្រ ថតរូបជាមួយបារាំងយ៉ាងម៉េច! អីយ៉ាងម៉េច! ឆ្នាំប៉ុន្មានអ្នកណាមកប្រាសាទព្រះវិហារ ហើយសម័យនោះសម័យគេដាក់ទង់ជាតិបារាំង ឲ្យវាច្បាស់លើរឿងនេះ។ ខ្ញុំបញ្ជាក់ប៉ុណ្ណឹងទៅចុះ! អត់មានតំបន់ត្រួតគ្នា ៤,៦ ទេ ព្រោះកម្ពុជាមិនបានទទួលស្គាល់ផែនទីជាឯកតោភាគីដែលអ្នកឯងគូសដោយខ្លួនឯង ហើយបើចង់ដោះស្រាយ និយាយគ្នាលែងកើត គឺត្រូវទៅតុលាការអន្តរជាតិទីក្រុងឡាអេឡើងវិញ ហើយក៏ត្រៀមខ្លួនដើម្បីបញ្ចូលបញ្ហានេះទៅក្រុមប្រឹក្សាសន្តិសុខអង្គការសហប្រជាជាតិសាជាថ្មីម្ដងទៀត កាលពីមុននេះគ្រាន់តែផ្អាកសិនហ្នឹង រឿងនេះមិនទាន់ចប់ទេៗ»។
លោកនាយករដ្ឋមន្រ្តីកម្ពុជាបានរំឭកអំពីការរំលោភរបស់ថៃមកលើកម្ពុជាក្នុងការទាមទារឲ្យគណៈប្រតិភូអង្គការយូណេស្កូសុំទិដ្ឋាការពីថៃក្នុងពេលធ្វើដំណើរមកកម្ពុជាឆ្លងកាត់តំបន់ដែលថៃ អះអាងថាជារបស់ខ្លួនទៀតផង។
ការរិះគន់ទៅលើប្រទេសថៃ និងអ្នកដឹកនាំថៃដោយពាក្យសម្ដីធ្ងន់ៗបានកើតមានឡើងនៅក្នុងពេលលោកនាយករដ្ឋមន្រ្តីប្រទេសកម្ពុជាចុះទៅបំពេញតាមព្រំដែន ហើយប្រភពព័ត៌មានពីកាសែតថៃបានឲ្យដឹងថា លោក អាភីស៊ិត វេតឆាឈីវ៉ាក់ នាយករដ្ឋមន្រ្តីថៃ នៅតែទាមទារថា ដីនៅក្បែរតំបន់ប្រាសាទព្រះវិហារជារបស់ថៃ ហើយសាលក្រមរបស់តុលាការក្រុងឡាអេបានកាត់ថា ប្រាសាទព្រះវិហារជារបស់ខ្មែរមែន តែដីនៅក្បែរប្រាសាទមិនមែនជារបស់ខ្មែរទេ។
ការប្រឈមមុខដាក់គ្នារវាងកងទ័ពកម្ពុជាជាមួយកងទ័ពថៃបានកើតមានតាំងពីកម្ពុជាបានដាក់ប្រាសាទព្រះវិហារជាបេតិកភណ្ឌពិភពលោក ហើយកងទ័ពថៃបានលើកមកលុកលុយតំបន់វត្តកែវសិក្ខាគិរីស្វារៈរបស់ខ្មែរ នាថ្ងៃទី១៥ កក្កដា ឆ្នាំ២០០៨កន្លងមក៕