នៅលើដងផ្លូវជាតិលេខ៧ ត្រង់ចំណុចទួលកកោះ ក្បែរភូមិសាស្ត្រអូរពងមាន់ មានកងកម្លាំងចម្រុះមួយក្រុមជាមេព្រៃ ប៉ូលិសសេដ្ឋកិច្ច និងអាវុធហត្ថ បានស្ទាក់រថយន្តដឹកអ្នកដំណើរឲ្យបង់ប្រាក់ជាប្រចាំ ហើយហួសពីចំណុចទួលកកោះ គឺស្ថិតនៅក្នុងភូមិសាស្ត្រអូរចាឡង់ មានកម្លាំងប៉ូលិស និងអាវុធហត្ថមួយក្រុមទៀត បានដាក់បារាសឃាត់ដំណើរដើម្បីត្រួតពិនិត្យឲ្យបង់ប្រាក់ដូចគ្នា។
ស្ត្រីអ្នករត់ឡានម្នាក់បានអះអាងថា ចំណុចនោះបានតម្រូវឲ្យបង់ប្រាក់ ផ្នែកខ្លះ ៥ដុល្លារ និងផ្នែកខ្លះ ១០ដុល្លារ នៅពេលដែលក្រុមនោះឃាត់ឡានឃើញមានការដឹកជញ្ជូនតុ កៅអី ឬក៏គ្រែជាដើម ៖ «បើថា យើងមានដឹកគ្រែមួយ ដឹកកៅអីអីអ៊ីចឹង វាទារ ១០រៀល (១០ដុល្លារ)។ ១០រៀលហ្នឹងតាម្នាក់ តាគេឈ្មោះ បូរិន ហ្នឹងមេព្រៃហ្នឹង។ សេដ្ឋកិច្ចហ្នឹង ២ម៉ឺន បើអ្នកកាសែតហ្នឹងវានៅទៅ វាយក១ម៉ឺនពីរម៉ឺនទៀត ប៉េអឹម ២ម៉ឺនទៀត។ រកស៊ីលែងកើតហើយ»។
ក្រៅពីក្រុមជជុះនៅលើដងផ្លូវជាតិលេខ៧ នៅឯស្រុកសៀមប៉ាងវិញ សមាជិកក្រុមប្រឹក្សាស្រុក គឺលោក ជិន ធីន បានបញ្ជាក់ថា ក្នុងរយៈពេល ៥ថ្ងៃកន្លងទៅនេះ មានការដាក់ឈើស្ទាក់ម៉ូតូ ឡាន ដឹករបស់របរយកប្រាក់ដូចគ្នា ដូចជានៅចំណុចវាលប៉ារ៉ា មានការដាក់ឈើដែលដំដែកគោលសម្រាប់ឃាំងផ្លូវ នៅចំណុចភូមិសាស្ត្រសំរោង ក៏មានការចេញមកឃាត់ដំណើរអ្នកភូមិដែលដឹកទំនិញបន្តិចបន្តួចឲ្យបង់ប្រាក់។
លោកបានបន្តថា ក្រុមប្រឹក្សាស្រុកបានប្រជុំ និងស្នើឲ្យបញ្ឈប់ដែរ ប៉ុន្តែកម្លាំងទាំងនោះជាកម្លាំងមកពីខេត្ត។ ដូច្នេះថ្នាក់ស្រុកមិនមានសមត្ថភាពបញ្ឈប់ពួកគេបាន។
លោក ជិន ធីន ឲ្យដឹងដូច្នេះ ៖ «គេដាក់ដោយឡែកៗពីគ្នា បីបួនកន្លែងឯណោះ។ កាក់មនុស្សយកលុយក្នុងនាមថា អ្នកខ្លះដឹកផ្សិតអីទៅលក់ដប់ម្ភៃគីឡូក្រាម អ៊ីចឹងគេយកមួយម៉ឺនពីរម៉ឺនទៅ ហើយនរណាបានស្អីទៅខ្លះតិចតួចទៅក៏គេយក មួយការុង មួយម៉ឺនពីរម៉ឺនទៅ។ ដល់កន្លែងនេះ ក៏យក ដល់មុខទៀតក៏គេយកទៀតទៅ»។
នៅក្នុងស្រុកសៀមប៉ាងមួយ មានក្រុមជជុះចំនួន ៣កន្លែង ហើយកន្លែងនីមួយៗ មានកម្លាំងដោយឡែកៗពីគ្នា ដូចជានៅវាលប៉ារ៉ា ជាកម្លាំងប៉ូលិសខេត្ត នៅភូមិសាស្ត្រសំរោង ជាកម្លាំងទាហាន និងក្បែរប៉ុស្តិ៍ព្រំដែន ស្រែសម្បូរ មានកម្លាំងអាវុធហត្ថ។
នាយករដ្ឋមន្ត្រីខ្មែរ បានព្រមានជាច្រើនលើកហើយ អំពីក្រុមជជុះថា ជាក្រុមខុសច្បាប់ និងបានតម្រូវឲ្យអាជ្ញាធរខេត្តនីមួយៗ ទទួលខុសត្រូវបង្ក្រាបឲ្យបាន មិនឲ្យធ្វើសកម្មភាពឃាត់ដំណើររថយន្ត និងប្រជាពលរដ្ឋទារប្រាក់នោះទេ ហើយបើក្នុងករណីធ្វើមិនបាន ថ្នាក់ដឹកនាំខេត្តនោះ នឹងត្រូវប្រឈមមុខនឹងការដកតំណែង។
លោកនាយករដ្ឋមន្ត្រី ហ៊ុន សែន បានមានប្រសាសន៍ដូច្នេះ ៖ «អាកុងត្រូលជជុះវាកើតឡើងវិញហើយ អស់លោកខេត្ត ឲ្យមើលផ្លូវ អារឿងកុងត្រូលជជុះហ្នឹង»។
អភិបាលខេត្តស្ទឹងត្រែង លោក ឡូយ សូផាត បានបញ្ជាក់បែបនេះថា ៖ «សួរអី បើយើងមិនដែលមានបទបញ្ជាណាឲ្យដាក់ផង ក្រែងវាមានត្រង់ណាយើងចន្លោះ។ កន្លងទៅដូចជាអត់ដែលមានអីឲ្យដាក់ទាហាន ប៉ូលិសអីផង»។
ក្រុមជជុះនៅខេត្តស្ទឹងត្រែង តែងតែធ្វើសកម្មភាពប្រដេញក្នុងរាល់ពេលដែលរថយន្តឆ្លងកាត់មិនបានឈប់ឲ្យពួកគេត្រួតពិនិត្យ និងបង់ប្រាក់ឲ្យ។
មន្ត្រីស៊ើបអង្កេតអង្គការសិទ្ធិមនុស្សអាដហុក ខេត្តស្ទឹងត្រែង បានទទួលស្គាល់ថា ក្រុមជជុះនៅទួលកកោះ និងអូរចាឡង់ បានធ្វើសកម្មភាពដោយចំហ ដែលមិនពិបាកស្រាវជ្រាវនោះទេ។ ដូច្នេះថ្នាក់ដឹកនាំខេត្តគួរតែចាត់វិធានការជាបន្ទាន់ទៅគ្រប់កន្លែងដែលមានការកើតឡើងក្រុមជជុះ ដូចជានៅស្រុកសៀមប៉ាង ជាដើម មិនត្រូវព្រងើយទៅនឹងបទបញ្ជានាយករដ្ឋមន្ត្រីតទៅទៀតឡើយ៕