អគ្គលេខាធិការនៃសមាគមកម្ពុជាការពារអ្នកកាសែត (CAPJ) លោក នេត្រ ភក្រ្តា បានបញ្ជាក់ពីហេតុផលដែលសមាគមលោកស្នើសុំយ៉ាងនេះថា លោក រស់ សុឃិត បើពិនិត្យជាទូទៅឃើញថា ពុំមានទោសកំហុសអ្វីធ្ងន់ធ្ងរនោះទេ ទាក់ទងនឹងអ្វីដែលបានចោទប្រកាន់កន្លងមកនោះ ហើយចាំបាច់សូមឲ្យចៅក្រមសាលាឧទ្ធរណ៍ពិចារណា ក្នុងការដោះលែងលោកឲ្យមានសេរីភាពឡើងវិញ។
មេធាវីការពារក្តីលោក រស់ សុឃិត គឺលោក សំ សុគង់ មានប្រសាសន៍គាំទ្រចំពោះការស្នើសុំនេះ ហើយទន្ទឹមគ្នានេះដែរ លោកក៏កំពុងសិក្សាលើព័ត៌មាន ដែលលេចឮតាមការចុះផ្សាយរបស់សារព័ត៌មានកន្លងមកថា ដើមបណ្ដឹងរបស់កូនក្តីលោកកំពុងមានការជាប់ពាក់ព័ន្ធក្នុងអំពើពុករលួយ គឺវាពិតដូចដែលកូនក្តីរបស់លោកធ្លាប់បានបញ្ចេញទស្សនៈ ក្នុងនាមជាអ្នកកាសែតកន្លងមក។
លោក សយ សុភាព ដែលជាដើមបណ្ដឹង ពុំអាចសុំការអធិប្បាយជុំវិញបញ្ហានេះបានទេតាមទូរស័ព្ទ ដោយមានអ្នកលើកទូរស័ព្ទរបស់លោកប្រាប់ថា លោកជាប់រវល់ប្រជុំ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មានប្រសាសន៍ថា ករណីលោក រស់ សុឃិត គឺជារឿងចោទប្រកាន់ មិនមែនជារឿងវិជ្ជាជីវៈឡើយ ដូច្នេះលោកថា គួរតែមានការចរចាគ្នាក្រៅប្រព័ន្ធតុលាការ ជាជាងការបន្តប្ដឹងផ្ដល់គ្នា។
តុលាការក្រុងភ្នំពេញ កាលពីថ្ងៃទី៦ វិច្ឆិកាកន្លងទៅ បានកាត់ទោស និងដាក់គុកលោក រស់ សុឃិត ពីបទផ្សព្វផ្សាយព័ត៌មានមិនពិត ទៅតាមច្បាប់អ៊ុនតាក់ មាត្រាទី៦២។ លោក រស់ សុឃិត មុននឹងមានរឿងនេះ បានផ្ញើសារតាមទូរស័ព្ទដៃរបស់ខ្លួន ដោយចោទសួរទៅលោក សយ សុភាព ដែលមានខ្លឹមសារថា "តើលោក សយ សុភាព ពិតជាបានយកលុយរបស់ស្ត្រីទំនើងឈ្មោះ ខៃ តារា នោះមែនឬទេ? បើសិនជាដូច្នេះមែននោះគឺជាសកម្មភាពថោកទាប"។
កាលពីថ្ងៃទី១២ កក្កដាកន្លងទៅ កាសែតភ្នំពេញប៉ុស្តិ៍បានចុះផ្សាយអត្ថបទមួយ ដកស្រង់ប្រសាសន៍របស់លោកស្រី សៀង ចាន់ហេង ប្រធានក្រុមហ៊ុន ហេងអភិវឌ្ឍន៍ ដែលជាអ្នកចេញលុយចំណាយឲ្យមជ្ឈមណ្ឌល ដើមអម្ពិល ថា លោក សយ សុភាព បានទទួលលុយចំនួន ៦ម៉ឺនដុល្លារពីមនុស្សចំនួន ១៥ក្រុម ដោយមិនត្រឹមត្រូវ។ កាសែតបានសរសេរថា លោកស្រី សៀង ចាន់ហេង បានចោទលោក សយ សុភាព ថាបានទទួលសំណូកពីក្រុមហ៊ុនជំនួញដោយមិនត្រឹមត្រូវ៕