មន្រ្តីការបរទេសខ្មែរបានមានប្រតិកម្មនៅថ្ងៃ៦ កុម្ភៈ ចំពោះអគ្គលេខាធិការអាស៊ានថា មិនគួរនិយាយទាក់ទងនឹងការធ្វើសមយុទ្ធយោធានៅឯខែត្រកំពង់ឆ្នាំងកាលពីពេលថ្មីៗនេះរបស់កម្ពុជាទេ ព្រោះនោះជាបញ្ហាផ្ទៃក្នុងរបស់កម្ពុជាដែលជាសមាជិកអាស៊ានមួយ ហើយថាការលើកឡើងនោះគឺជារឿងខុសឆ្គងនិងចម្លែកមួយ។
លោក សូរិន ពិតសូវ៉ាន់ (Surin Pitsuwan) ជាអគ្គលេខាធិការអាស៊ាន បានថ្លែងប្រាប់ទីភ្នាក់ងារព័ត៌មានម៉ាឡេស៊ីឈ្មោះ The Bernamaនៅទីក្រុងបាងកក កាលពីថ្ងៃទី៥ កុម្ភៈ ថា អាស៊ានមានការភ័យខ្លាចដែលកម្ពុជាអាចបញ្ជូនសញ្ញាមិនត្រឹមត្រូវទៅពិភពលោក នៅពេលដែលប្រទេសនេះបានធ្វើការសាកល្បងបាញ់កាំជ្រួចហ្វូងកាលពីថ្ងៃទី៤ កុម្ភៈកន្លងទៅ ខណៈដែលប្រទេសកម្ពុជាមិនមានទំនាក់ទំនងល្អជាមួយប្រទេសថៃនោះ។
លោក កុយ គួង ជាមន្រ្តីនាំពាក្យក្រសួងការបរទេសខ្មែរ បានចាត់ទុកការលើកឡើងរបស់លោក សូរិន ពិតសូវ៉ាន់ គឺជាការខុសឆ្គងដែលលោកមិនគួរលើកអំពីបញ្ហានេះឡើយ ដោយលោកបានអះអាងថា ការធ្វើសមយុទ្ធយោធាជារឿងមួយធម្មតាសម្រាប់ប្រទេសនីមួយៗនៅលើសាកលលោកក្នុងរឿងការពារទឹកដីរបស់ខ្លួន។
លោក កុយ គួង បានបញ្ជាក់ថា ៖ «កន្លងមកប្រទេសផ្សេងៗក៏គេបានធ្វើសមយុទ្ធយោធា ហើយជាពិសេសប្រទេសថៃនិងអាមេរិកបានធ្វើសមយុទ្ធយោធាឈ្មោះថា ពស់វែកមាសនោះ នៅតាមបណ្ដោយព្រំដែនកម្ពុជាថៃជារៀងរាល់ឆ្នាំនោះ កម្ពុជាមិនមានប្រតិកម្មអ្វីទេ។ ដូច្នេះការលើកឡើងរបស់បណ្ឌិត សូរិន ពិតសូវ៉ាន់ នេះ គឺជារឿងចម្លែកណាស់! គាត់មិនគួរនិយាយដល់បញ្ហាផ្ទៃក្នុងនៃប្រទេសដែលជាសមាជិកអាស៊ានទេ!»។
ប្រទេសកម្ពុជាបានធ្វើសមយុទ្ធយោធាបាញ់កាំជ្រួចហ្វូងសាកល្បងធុន BM21 ប្រមាណ ២០០គ្រាប់ នៅឯព្រលានយន្តហោះខែត្រកំពង់ឆ្នាំង កាលពីថ្ងៃទី៤ កុម្ភៈកន្លងទៅ។
លោកនាយករដ្ឋមន្រ្តី ហ៊ុន សែន ក៏បានលើកឡើងដែរថា ការធ្វើសមយុទ្ធយោធានេះមិនមែនជាការបង្ហាញសាច់ដុំដាក់អ្នកណាឡើយ។ ការធ្វើសមយុទ្ធនេះជាការធ្វើសមយុទ្ធធម្មតាទេ។
លោកនាយករដ្ឋមន្រ្តីបានថ្លែងថា ៖ «ខ្ញុំសូមជម្រាបផងដែរថា នេះមិនមែនជាការបង្ហាញសាច់ដុំយោធាណាមួយនោះទេ ក៏ប៉ុន្តែនេះជាសមយុទ្ធធម្មតា និងត្រៀមរៀបចំខ្លួនការពារជាតិក្នុងករណីមានការឈ្លានពាន ព្រោះប្រទេសណាក៏ដោយនៅលើពិភពលោកមិនទាន់មានប្រទេសណាមួយដែលគ្មានអាវុធ ហើយក៏គ្មានប្រទេសណាមួយដែលគ្មានកងទ័ពនោះដែរ!»។
នាយករដ្ឋមន្រ្តីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) ក៏បានថ្លែងដែរនៅខណៈដែលកម្ពុជាបានធ្វើសមយុទ្ធយោធានោះថា ថៃពុំមានបញ្ហាអ្វីជាមួយរឿងសមយុទ្ធយោធាកម្ពុជាទេ។ វាជារឿងធម្មតារបស់ប្រទេសមួយក្នុងការធ្វើសមយុទ្ធយោធានោះ។
លោក កុយ គួង បានបញ្ជាក់ទៀតថា កាលពីឆ្នាំ២០០៨ ប្រទេសថៃបានធ្វើសមយុទ្ធយោធានៅតាមព្រំដែន រហូតដល់ធ្លាក់គ្រាប់ផ្លោងចូលក្នុងទឹកដីកម្ពុជាទៀត ហើយលោកអគ្គលេខាធិការអាស៊ាន សុរិន ពិតសូវ៉ាន់ ជនជាតិថៃរូបនេះមិនមានប្រតិកម្មអ្វីឡើយនៅពេលនោះ ប៉ុន្តែហេតុអ្វីបានជាពេលដែលកម្ពុជាធ្វើសមយុទ្ធយោធានៅក្នុងប្រទេសរបស់ខ្លួន បែរជាលោកអគ្គលេធិការអាស៊ានរូបនេះមានប្រតិកម្មទៅវិញ៕