សេចក្ដីប្រកាសរបស់ក្រសួងការពារជាតិកម្ពុជា ចេញផ្សាយនៅថ្ងៃទី២៨ ខែមេសានេះ បានឲ្យដឹងថា នៅវេលាម៉ោង ២០ និង ៤៥នាទី ថ្ងៃទី២៧ មេសា ទាហានថៃ បានចាប់ផ្ដើមបាញ់កាំភ្លើងធំមកលើទីតាំងកងយោធពលខេមរភូមិន្ទដែលកំពុងឈរជើងនៅតំបន់ប្រាសាទតាមាន់ និងនៅវេលាម៉ោង ២១ និង ២០នាទី បានបាញ់មកលើទីតាំងកងទ័ពខ្មែរដែលកំពុងឈរជើងនៅប្រាសាទតាក្របី។
សេចក្ដីប្រកាសព័ត៌មានបានឲ្យដឹងទៀតថា រហូតមកដល់ម៉ោង ០៣ និង ៥៥នាទីទៀបភ្លឺ ថ្ងៃទី២៨ ខែមេសានេះ ការប្រយុទ្ធគ្នានៅតែបន្ត។ ទាហានថៃ បានបាញ់កាំភ្លើងធំជាច្រើនគ្រាប់មកលើតំបន់ប្រាសាទតាមាន់ ប្រាសាទតាក្របី តំបន់ថ្មដូន និងតំបន់អូរស្មាច់។
ប្រភពពីកងកម្លាំងយោធាកម្ពុជា នៅសមរភូមិជួរមុខនាតំបន់ប្រាសាទតាមាន់ និងប្រាសាទតាក្របី អះអាងថា ការប៉ុនប៉ងវាយប្រហារកាន់កាប់ទីតាំងណាមួយរបស់កម្ពុជា ពីសំណាក់ភាគីថៃ ដោយបាញ់សន្ធាប់យ៉ាងខ្លាំងនៅព្រឹកថ្ងៃទី២៨ មេសានេះ មិនទទួលបានជោគជ័យទេ គឺភាគីកម្ពុជានៅរក្សាបានទីតាំងឈរជើងរបស់ខ្លួនមួយរយភាគរយ។
ថៃបដិសេធថាមិនបានលុបកិច្ចចរចាឈប់បាញ់ជាមួយកម្ពុជា
លោកនាយករដ្ឋមន្ត្រីថៃ អាភីស៊ិត វេតឆាឈីវ៉ាក់ បានថ្លែងបដិសេធនៅថ្ងៃពុធ ទី២៧ មេសា ថា ថៃពុំបានលុបចោលកិច្ចចរចាឈប់បាញ់គ្នាជាមួយភាគីកម្ពុជា ដូចដែលសេចក្ដីរាយការណ៍នានា បានចុះផ្សាយកាលពីពេលថ្មីៗនេះនោះឡើយ។
កាសែតបាងកក ប៉ុស្តិ៍ (Bangkok Post) បានឲ្យដឹងថា លោកនាយករដ្ឋមន្ត្រីថៃ ដែលបានចុះទៅសួរសុខទុក្ខកន្លែងទីជម្រកជនភៀសខ្លួនថៃ នៅខេត្តសុរិន្ទ កាលពីថ្ងៃពុធ បានថ្លែងថា លោករដ្ឋមន្ត្រីការពារជាតិថៃ ប្រាវីត វង់ស៊ូវ៉ាន់ (Prawit Wongsuwan) គ្រោងនឹងធ្វើការណាត់ជួបជាមួយលោក ទៀ បាញ់ រដ្ឋមន្ត្រីការពារជាតិកម្ពុជា ដើម្បីពិភាក្សាគ្នាធ្វើឱ្យស្ថានការណ៍ព្រំដែននៃប្រទេសទាំងពីមានសភាពធម្មតាឡើងវិញ នៅពេលដែលលោកវិលត្រឡប់មកពីប្រទេសចិន នៅថ្ងៃសៅរ៍ ទី៣០ ខែមេសា ខាងមុខនេះ។
កាលពីថ្ងៃពុធនេះដែរ លោកនាយករដ្ឋមន្ត្រី ហ៊ុន សែន បានស្នើសុំឲ្យមានកិច្ចព្រមព្រៀងឈប់បាញ់គ្នារវាងកងទ័ពខ្មែរ និងថៃ នៅតំបន់ប្រាសាទតាមាន់ ប្រាសាទតាក្របី និងតំបន់ក្បែរប្រាសាទព្រះវិហារ បន្ទាប់ពីកងទ័ពនៃប្រទេសទាំងពីរបានប្រយុទ្ធគ្នាជាទ្រង់ទ្រាយធំរយៈពេល ៦ថ្ងៃជាប់ៗគ្នាមក។
ក្រសួងការបរទេសកម្ពុជា នៅថ្ងៃទី២៧ ខែមេសានេះ បានចេញសេចក្ដីថ្លែងការណ៍ថ្កោលទោសចំពោះសកម្មភាពបញ្ឆេះសង្គ្រាមរបស់រដ្ឋាភិបាលថៃ មកលើបូរណភាពទឹកដីកម្ពុជា តាមរយៈការគំរាមប្រើប្រាស់កម្លាំងយោធាទ្រង់ទ្រាយ ធំ ដើម្បីត្រួតត្រា ឬចូលឈ្លានពានលើទឹកដីកម្ពុជា។
សហភាពអឺរ៉ុបបារម្ភចំពោះមហន្តរាយពីការប្រយុទ្ធគ្នា
សហភាពអឺរ៉ុប បានសម្ដែងការព្រួយបារម្ភជាខ្លាំង ចំពោះមហន្តរាយដែលបណ្ដាលមកពីការបាញ់ប្រហារគ្នារវាងទាហានកម្ពុជា និងថៃ កាលពីពេលថ្មីៗនេះ។
លោកស្រី ខាធើរីន អាស្ហតុន (Catherine Ashton) ប្រធានផ្នែកកិច្ចការបរទេសនៃសហភាពអឺរ៉ុប បានធ្វើការអំពាវនាវសុំឲ្យភាគីកម្ពុជា និងថៃ ព្រមព្រៀងគ្នាជាបន្ទាន់ដើម្បីបញ្ឈប់ការវាយប្រហារគ្នាដោយអាវុធ ដែលបណ្ដាលឲ្យមានមនុស្សស្លាប់ រងរបួស និងមានពលរដ្ឋរាប់ម៉ឺននាក់នៃប្រទេសទាំងពីររត់ភៀសខ្លួនចេញពីភូមិករ ព្រមទាំងការបំផ្លាញទ្រព្យសម្បត្តិ ផ្ទះសម្បែង ជាដើម។
កាលពីខែកុម្ភៈ ឆ្នាំ២០១១ កន្លងមកនេះ ក្រុមប្រឹក្សាសន្តិសុខនៃអង្គការសហប្រជាជាតិ ក៏បានអំពាវនាវសុំឲ្យភាគីកម្ពុជា-ថៃ ជួបពិភាក្សាគ្នាដោះស្រាយបញ្ហាជម្លោះព្រំដែននៃប្រទេសទាំងពីរដោយសន្តិវិធី។
នៅក្នុងការវាយប្រហារចុងក្រោយរវាងទាហានថៃ និងកម្ពុជា ចាប់ពីថ្ងៃសុក្រទី២២ ខែមេសា សប្ដាហ៍មុនមក មានមនុស្សស្លាប់យ៉ាងតិច ១៤នាក់ និងជាង ៥០នាក់ត្រូវរងរបួសនៃភាគីជម្លោះទាំងសងខាង៕