តំណាងរាស្ត្រគណបក្សប្រឆាំង សម រង្ស៊ី នៅថ្ងៃទី១៦ ខែកញ្ញា បានស្នើសុំឲ្យមន្ត្រីជាន់ខ្ពស់នៃរដ្ឋាភិបាលវៀតណាម ជួយអន្តរាគមន៍ធ្វើយ៉ាងណាចាប់ខ្លួនជនសង្ស័យ ឬឃាតកដែលបានព្រួតគ្នាវាយសម្លាប់ខ្មែរកម្ពុជាក្រោមចំនួន២នាក់ និង១១នាក់ទៀតរងរបួស កាលពីដើមខែកញ្ញាថ្មីៗនេះ ដោយក្រុមអ្នកភូមិវៀតណាម នៅក្នុងខេត្តរោងដំរី ឬខេត្តតៃនិញ ទឹកដីខ្មែរកម្ពុជាក្រោម។
លិខិតរបស់លោក យន្ត ថារូ បានសរសេរទៅលោក សឺង សុងសើង ជាសមាជិកមជ្ឈិមបក្ស និងជាអនុប្រធានចង្អុលទិសភាគនិរតីនៃប្រទេសវៀតណាម គឺបានផ្ញើជូនតាមរយៈស្ថានទូតវៀតណាមនៅក្នុងប្រទេសកម្ពុជា ប៉ុន្តែមន្ត្រីស្ថានទូតវៀតណាមមិនបានចេញមកទទួលលិខិតនោះទេ។
តំណាងរាស្ត្រគណបក្សប្រឆាំង សម រង្ស៊ី លោក យន្ត ថារូ បានមានប្រសាសន៍ប្រាប់វិទ្យុអាស៊ីសេរី នៅថ្ងៃទី១៦ ខែកញ្ញាថា ៖ «សុំឲ្យគាត់ជួយអន្តរាគមន៍ដល់គ្រួសាររងគ្រោះ ដើម្បីផ្ដល់ភាពយុត្តិធម៌ដល់ពួកគាត់ផង។ ពីព្រោះជនរងគ្រោះដែលជាខ្មែរកម្ពុជាក្រោមរយៈពេលរហូតដល់ពេលនេះ ជាងកន្លះខែហើយ។ សមត្ថកិច្ចនៅមិនទាន់ចាប់ជនល្មើសយកមកផ្ដន្ទាទោសតាមផ្លូវច្បាប់នៅឡើយ»។
ព្រឹត្តិការណ៍វាយសម្លាប់នោះ បានកើតឡើងនៅថ្ងៃទី២ ខែកញ្ញា ឆ្នាំ២០១០ នៅតំបន់ចម្ការកៅស៊ូរបស់វៀតណាម នៅក្នុងខេត្តរោងដំរី ឬខេត្តតៃនិញ ដែលប្រភពគ្រួសារខ្មែរកម្ពុជាក្រោមបានអះអាងថា ជម្លោះនោះគឺបណ្ដាលមកពីការរើសអើងជាតិសាសន៍។ អ្នកភូមិវៀតណាមរាប់សិបនាក់បានប្រើប្រាស់ដំបង និងកាំបិតនៅក្នុងការវាយប្រហារនោះ។
ខ្មែរកម្ពុជាក្រោមដែលបានស្លាប់នោះ មានឈ្មោះ ចៅ ណែត អាយុ២២ឆ្នាំ គឺមានស្រុកកំណើតនៅក្នុងឃុំរលាំង ស្រុកស្វាយទង ខេត្តមាត់ជ្រូក ឬខេត្តអានយ៉ាង ទឹកដីខ្មែរកម្ពុជាក្រោម។ និងខ្មែរកម្ពុជាក្រោមម្នាក់ទៀត ដែលបានស្លាប់នោះដែរ គឺមានឈ្មោះ ចៅ ផាត មានស្រុកកំណើតនៅក្នុងឃុំបន្ទាយស្វាយ ស្រុកស្វាយទង ខេត្តមាត់ជ្រូក ឬខេត្តអានយ៉ាង។
មន្ត្រីនៅស្ថានទូតវៀតណាម នៅក្នុងប្រទេសកម្ពុជា ដែលចេះនិយាយភាសាខែ្មរ បានមានប្រសាសន៍ខ្លីថា លោកបានឮព័ត៌មានអំពីលិខិតតវ៉ាខាងលើនេះដែរ ៖ «អត់មានបានទទួលបានទេ។ ព័ត៌មានឮអ៊ីចឹងតែធាតុពិតស្ថានទូតមិនទាន់បានទទួលបានឯណា»។
ឪពុករបស់ខ្មែរកម្ពុជាក្រោម ឈ្មោះ ចៅ ណែត ដែលបានស្លាប់ នៅក្នុងឃុំចៅឡាំង ស្រុកស្វាយទង ខេត្តអានយ៉ាង ឬខេត្តមាត់ជ្រូក បានឲ្យដឹងថា លោកទាមទារប្រាក់សំណងជំងឺចិត្ត ៦០លានដុង ស្មើនឹងជាង ៣០០០ដុល្លារអាមេរិក និងទាមទារឲ្យសមត្ថកិច្ចវៀតណាមចាប់ខ្លួនជនសង្ស័យផ្ដន្ទាទោស ៖ «ឥឡូវថាគេប្ដឹងផ្ដល់។ គេឲ្យប្ដឹងអ៊ីចឹងណា។ ប្ដឹងឡើងទៅក្រោមទៀតណា ដើម្បីឲ្យពួកកនដែលសម្លាប់ហ្នឹង ឲ្យសងយ៉ាងម៉េចណោះ»។
ឪពុករបស់ ចៅ ណែត ត្រូវបានអាជ្ញាធរវៀតណាមបានកោះហៅឲ្យទៅឆ្លើយបំភ្លឺនាពេលប៉ុន្មានថ្ងៃខាងមុខនេះ ដើម្បីកំណត់ហេតុ និងពាក្យបណ្ដឹងជុំវិញឃាតកម្មកន្លងមកនេះ៕