ព្រះសង្ឃខ្មែរកម្ពុជាក្រោមមួយអង្គ ដែលអាជ្ញាធរវៀតណាមបានចាប់បញ្ជូនចេញពីទីក្រុងព្រៃនគរ ឬទីក្រុងហូជីមិញ ប្រទេសវៀតណាម ឲ្យត្រឡប់ទៅកាន់ប្រទេសថៃវិញនោះ កំពុងតែលាក់ខ្លួននៅក្នុងវត្តអារាមមួយ ក្នុងទីក្រុងបាងកក ប្រទេសថៃ ដើម្បីសុវត្ថិភាពផ្ទាល់ខ្លួន ក្រោយពីការចាប់បញ្ជូនថ្មីៗនេះ។
កាលពីល្ងាចថ្ងៃទី១ ខែមេសាថ្មីៗនេះ ក្រុមនគរបាលប្រទេសវៀតណាមចំនួនប្រមាណ ៣០នាក់ បានចាប់ក្រៀក និងសែងព្រះសង្ឃខ្មែរកម្ពុជាក្រោមមួយអង្គ ព្រះនាម ថាច់ វាសនា ពីប្រលានយន្តហោះ ក្រុងព្រៃនគរ ចូលក្នុងយន្តហោះពាណិជ្ជកម្មថៃ ដើម្បីបញ្ជូនទៅប្រទេសថៃវិញ ក្រោយពីបានឆែកឆេរ និងពិនិត្យលិខិតឆ្លងដែនកម្ពុជា និងអត្តសញ្ញាណផ្សេងៗ តាមម៉ាស៊ីនកុំព្យូទ័រឲ្យសញ្ញាក្រហម។
ព្រះភិក្ខុសង្ឃខ្មែរកម្ពុជាក្រោម ព្រះនាម ថាច់ វាសនា មានព្រះជន្ម ២៩ព្រះវស្សា ដែលកំពុងតែលាក់ខ្លួននៅក្នុងវត្តមួយ ក្នុងទីក្រុងបាងកក ប្រទេសថៃ បានមានព្រះថេរដីកា ប្រាប់វិទ្យុអាស៊ីសេរីតាមទូរស័ព្ទមកថា ៖ «លុះត្រាណាបានទៅដល់ស្រុកកំណើត ទើបអាត្មាត្រឡប់មកបាងកកវិញ ហើយពេលនោះក៏គេចាប់ផ្ដើមមានកងកម្លាំងជាច្រើន កងកម្លាំងប៉ូលិសសន្តិសុខនៅប្រលានយន្តហោះហ្នឹង ប្រមាណជាង ៣០នាក់។ ក្នុងនោះ មាន ២នាក់ គឺគេយកយាមអាត្មា និងកន្ទ្រាក់យកកាបូបអាត្មា។ មាន ២នាក់ក្រៀកស្មាអាត្មាពីរសង្ខាង ២នាក់ចាំតាមរុញពីក្រោយ។ ជាង ២០នាក់ គឺអមតាមសង្ខាងរហូត រុញអាត្មាចូលដល់កៅអីយន្តហោះតែម្ដង។ សព្វថ្ងៃនេះ អាត្មាកំពុងលាក់ខ្លួនក្នុងទីក្រុងបាងកក មិនទាន់ទៅដល់វត្តដែលអាត្មាគង់នៅទេ ព្រោះខ្លាចមានបញ្ហា។ អាត្មាដឹងថា សន្តិសុខមិនសូវល្អអ៊ីចឹងហើយអាត្មានៅលាក់ខ្លួនវត្តផ្សេងសិន»។
ព្រះភិក្ខុសង្ឃ ថាច់ វាសនា បាននិមន្តចាកចេញពីទីក្រុងបាងកក ទៅកាន់ប្រទេសវៀតណាម កាលពីព្រឹកថ្ងៃទី១ ខែមេសាថ្មីៗនេះ តាមជើងយន្តហោះពាណិជ្ជកម្មថៃ ទៅសួរសុខទុក្ខគ្រួសារ នៅក្នុងស្រុកកំណើត ភូមិជ្រៃតាសូ ឃុំដើមជ្រៃ ស្រុកមាត់សមុទ្ទ ខេត្តព្រះត្រពាំង ទឹកដីខ្មែរកម្ពុជាក្រោម ប្រទេសវៀតណាម។
ក្រុមអាជ្ញាធរវៀតណាម បានហាមឃាត់មិនឲ្យព្រះអង្គនិមន្តចាកចេញពីប្រលានយន្តហោះទេ ក្រោយពីបានពិនិត្យលិខិតឆ្លងដែន និងអត្តសញ្ញាណនៅក្នុងម៉ាស៊ីនកុំព្យូទ័រ ដែលបានចេញសញ្ញាក្រហមនោះ។
វិទ្យុអាស៊ីសេរីមិនទាន់អាចទាក់ទងសុំការពន្យល់ណាមួយពីមន្ត្រីស្ថានទូតកម្ពុជា ឬមន្ត្រីតំណាងស្ថានទូតវៀតណាម នៅក្នុងប្រទេសកម្ពុជា អំពីរឿងនេះ។
មន្ត្រីអ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍ថា ៖ «...មានបញ្ហាលិខិតឆ្លងដែនកម្ពុជា ឬយ៉ាងណានោះ គឺថាព្រះអង្គអាចទាក់ទងស្ថានទូតខ្មែរដើម្បីបញ្ជាក់បញ្ហានេះបាន»។
ប្រធានរដ្ឋបាលនៃសហព័ន្ធខ្មែរកម្ពុជាក្រោមពិភពលោក នៅក្នុងសហរដ្ឋអាមេរិក លោក ត្រឹង យ៉ាប បានមានប្រសាសន៍តាមទូរស័ព្ទមកថា ៖ «សព្វថ្ងៃហ្នឹង លោកបានទៅរៀនសូត្រនៅប្រទេសសៀម។ ពេលចូលឆ្នាំហ្នឹងចង់ទៅលេងជាមួយឪពុកម្ដាយបងប្អូន។ ពេលលោកនិមន្តទៅពីបាងកកទៅដល់ព្រៃនគរ ប៉ូលិសគយគេមិនឲ្យចេញ»។
តាមការអះអាងពីព្រះភិក្ខុសង្ឃ ថាច់ វាសនា គឺព្រះអង្គបានធ្វើលិខិតឆ្លងដែនពីក្រសួងមហាផ្ទៃកម្ពុជា កាលពីថ្ងៃទី១២ ខែតុលា ឆ្នាំ២០០៦ ហើយនឹងផុតកំណត់នៅថ្ងៃទី១២ ខែតុលា ឆ្នាំ២០១១។
ព្រះអង្គបានចូលក្នុងប្រទេសវៀតណាមនោះ ដើម្បីយកទិដ្ឋាការនៅឯប្រលានយន្តហោះ នៅក្នុងក្រុងព្រៃនគរ ប្រទេសវៀតណាម។
ព្រះអង្គបានទាក់ទងតំណាងស្ថានទូតកម្ពុជា នៅក្នុងទីក្រុងព្រៃនគរអំពីរឿងនេះ ប៉ុន្តែមិនមានការឆ្លើយតបភ្លាមៗ ដើម្បីដោះស្រាយទេ៕