អ្នកសម្របសម្រួលអង្គការការពារសិទ្ធិមនុស្សលីកាដូ (Licadho) ប្រចាំខេត្តកោះកុង លោក អ៊ិន គង់ជិត។ លោកមានប្រសាសន៍នៅថ្ងៃពុធ ទី២៥ ខែមេសា ថា លោកចៅក្រម ខាំ សុផារី នៅតុលាការខេត្តកោះកុងនោះ បានចេញដីកាឃុំខ្លួនលោក ប៊ុន សុខា ជាជំនួយការផ្ទាល់ ហ៊ុន សែន និងអង្គរក្ស ៣នាក់ទៀត ពីបទបង្ករបួសស្នាមដោយចេតនា និងមានស្ថានទម្ងន់ទោសដោយមានប្រើប្រាស់អាវុធ។
ករណីនេះលោក អ៊ិន គង់ចិត្ត ចាត់ទុកជាគំរូល្អសម្រាប់ការធានាការអនុវត្តន៍ច្បាប់ដោយស្ថាប័នតុលាការ។
នាយរងសេនាធិការចម្រុះមានឋានន្តរស័ក្ដិផ្កាយពីរ ឈ្មោះ ប៊ុន សុខា ដែលគេស្គាល់ថា ជាជំនួយការផ្ទាល់របស់លោកនាយករដ្ឋមន្ត្រី ហ៊ុន សែន និងអង្គរក្ស ៣នាក់ផ្សេងទៀតត្រូវអាជ្ញាធរសមត្ថកិច្ចខេត្តកោះកុង កសាងសំណុំរឿងបញ្ជូនទៅតុលាការកាលពីថ្ងៃទី២៣ ខែមេសា ក្រោមបទចោទប្រកាន់បង្ករបួសស្នាម ដោយប្រើកាំភ្លើង ដំបងឆក់ និងខ្នោះដៃ វាយមនុស្ស ៤នាក់ ឲ្យរបួសកាលពីយប់ថ្ងៃអាទិត្យ ទី២២ ខែមេសា ឆ្នាំ២០១២។
ទោះជាយ៉ាងណាក៏ដោយ តាមដំណឹងក្នុងកាសែតភ្នំពេញ ប៉ុស្តិ៍ ជនជាប់សង្ស័យទាំងបួនបានឆ្លើយថា គេមិនបានប្រើដំបងឆក់ ឬអាវុធភ្ជង់ជនរងគ្រោះ ដូចការចោទនោះទេ ប៉ុន្តែកាមេរ៉ាថតរូបនៅក្នុងសណ្ឋាគារកោះកុង ស៊ីធី (Koh Kong City) បង្ហាញរូបភាពជាក់ស្ដែងថា ជនសង្ស័យបានប្រព្រឹត្តអំពើហិង្សាជាមួយនឹងអាវុធពិតមែន។
អ្នកទាំងបួនមានឧត្ដមសេនីយ៍ទោ ប៊ុន សុខា អង្គរក្ស ស៊ុម វាសនា ម៉េង ឈាងលី និងអ្នកបើកបររថយន្ត ស៊ុម ឆាយា ត្រូវតុលាការឃុំខ្លួនពីបទបង្ករបួសស្នាម យោងលើមាត្រា ២១៨នៃក្រមព្រហ្មទណ្ឌ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។