ក្រុមអ្នកតវ៉ាជាង ១០០នាក់ តំណាងឲ្យប្រជាពលរដ្ឋចំនួន ៦២០គ្រួសារដែលកំពុងតែមានបញ្ហាដីធ្លីនៅក្នុងស្រុកស្នួល ខេត្តក្រចេះ បានធ្វើដំណើរតាមរថយន្តឈ្នួលមកដល់ទីក្រុងភ្នំពេញ ដើម្បីសុំឲ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ដល់ពួកគាត់។
តំណាងក្រុមអ្នកតវ៉ា និងជាមប្រធានសមាគមជនពិការអភិវឌ្ឍន៍ លោក យ៉ាន យឹក បានថ្លែងថា ពួកគាត់និងប្រជាពលរដ្ឋដែលភាគច្រើនជាអតីតយុទ្ធជន យុទ្ធជនពិការ ស្ត្រីមេម៉ាយ និងប្រជាពលរដ្ឋក្រីក្រ បានដាក់ពាក្យស្នើសុំដល់ថ្នាក់ដឹកនាំនិងស្ថាប័នរដ្ឋាភិបាល ដើម្បីបានដីធ្លីសម្រាប់សង់ទីលំនៅនៅស្រុកស្នួល ខេត្តក្រចេះ តាំងពីឆ្នាំ២០០៨កន្លងទៅ តែពួកគាត់មិនទាន់ទទួលបានលទ្ធផលតាមសំណូមពរនៅឡើយ ក្រៅពីការរារាំងរបស់អាជ្ញាធរមូលដ្ឋាន និងមន្ត្រីដែលពាក់ព័ន្ធ មិនឲ្យពួកគាត់ធ្វើការរានដី។
តំណាងអ្នកតវ៉ាម្នាក់ទៀត លោក ផាន់ សុផល បានបញ្ជាក់ថា ពួកគាត់មានជីវភាពខ្វះខាត ហើយបើបង្អង់យូរ ដីនៅទីនោះនឹងត្រូវមន្ត្រីព្រមទាំងក្រុមហ៊ុនយកអស់។
លោក ផាន់ សុផល មានប្រសាសន៍ថា ៖ «រកពាក្យនិយាយមិនបាន។ ស្នើសុំហួសពីស្នើសុំហើយ មិនដែលឃើញថ្ងៃណាថា ផល ឯងទៅចាប់នៅឯណោះទៅ ភូមិអភិវឌ្ឍន៍នៅត្រង់នោះ បង្កើតនៅថ្ងៃនេះ ខែនេះ ឆ្នាំនេះ។ គេថាឲ្យដាក់ពាក្យដាក់មកទៀត មិនដឹងគេយកទៅវេចខ្ចប់នៅឯណា?»។
តបនឹងការលើកឡើងនេះ នាយរងខុទ្ទកាល័យ លោកនាយករដ្ឋមន្ត្រី ហ៊ុន សែន លោក លឹម លាងសែ បានមានប្រសាសន៍ថា លោកនឹងពិនិត្យលើករណីនេះជាមួយស្ថាប័នដែលពាក់ព័ន្ធ ដើម្បីរកដំណោះស្រាយជូនប្រជាពលរដ្ឋ។
លោក លឹម លាងសែ មានប្រសាសន៍ដូច្នេះ ៖ «រាជរដ្ឋាភិបាលមានគោលនយោបាយសម្បទានដីហើយ ដាក់តាំងពីឆ្នាំទៅឯណោះ បានធ្វើសន្និសីទ សន្និបាតអីហើយអស់ហើយ ព្រោះយើងមានគោលនយោបាយសម្បទានសេដ្ឋកិច្ច កុំថាឡើយគ្រួសារអតីតយុទ្ធជន គ្រួសារសាមញ្ញប្រជាជនក្រីក្រក៏យើងគិតគូរគាត់ដែរ»។
ទាក់ទងនឹងករណីដីធ្លីនៅខេត្តក្រចេះ ប្រធាននាយកដ្ឋានឧទ្យានជាតិនៃក្រសួងបរិស្ថាន លោក សុខ ខេងណូវិន បានអះអាងថា ក្រសួងទើបតែបានជួបពិភាក្សាជាមួយអាជ្ញាធរមូលដ្ឋាន និងស្ថាប័នដែលពាក់ព័ន្ធអំពីបញ្ហានេះដែរ ហើយលោកបន្ថែមថា តាមនីតិវិធី លោកត្រូវការពេលមួយខែដើម្បីពិចារណាលើករណីនេះ។
លោក សុខ ខេងណូវិន បានឲ្យដឹងដូច្នេះ ៖ «ខ្ញុំសន្យាថា ក្រសួងបរិស្ថាន និងអាជ្ញាធរខេត្តនឹងដោះស្រាយបញ្ហានេះជូនបងប្អូន ហើយនិងជូនដំណឹងទៅបងប្អូនវិញថា តើត្រូវធ្វើយ៉ាងណា? ដំណោះស្រាយរបៀបម៉េច? ហើយប្រសិនបើបងប្អូនមិនឯកភាពទេអាចធ្វើការតវ៉ាទៀត»។
ការជជែកគ្នាបានអូសបន្លាយអស់រយៈពេលប្រហែលកន្លះម៉ោង ដោយក្រុមអ្នកតវ៉ាបានទាមទារឲ្យមានដំណោះស្រាយក្នុងរយៈពេលពីរសប្ដាហ៍។ ទីបំផុតពួកអ្នកតវ៉ាក៏ព្រមតាមភាគីរដ្ឋាភិបាល ដោយរង់ចាំរយៈពេលមួយខែ តែពួកគាត់បានព្រមានថា បើគ្មានដំណោះស្រាយសមស្របទេ ពួកគាត់នឹងឡើងមកទាមទារជាថ្មីទៀត ព្រោះពួកគាត់ក៏ធ្លាប់មកតវ៉ាកាលពីថ្ងៃទី២៦ មេសា ឆ្នាំ២០១០ ម្ដងហើយដែរ៕