រដ្ឋាភិបាលកម្ពុជា បានបញ្ជូនប្រជាពលរដ្ឋខ្មែរប្រុសស្រីចំនួន ៤នាក់ ក្នុងចំណោមពលករខ្មែរ ២១នាក់ ទៅធ្វើជាសាក្សីផ្ដល់ចម្លើយជូនតុលាការថៃ នៅថ្ងៃទី៦ ខែតុលា ឆ្នាំ២០១០ ក្នុងខេត្តសាមុតសាខន ប្រទេសថៃ ទាក់ទិនសំណុំរឿងថៅកែរោងចក្រផលិតប្រហិតមួយ ដែលត្រូវគេចោទប្រកាន់ពីបទជួញដូរកម្លាំងពលកម្មខុសច្បាប់។
តំណាងពលករខ្មែរទាំង ៤នាក់ មានឈ្មោះ ហេង ស្រីមុំ, វ៉ាត ចម, ស៊ឹម ឡូត និង ប៊ើ ប៉ូ បានចេញដំណើរពីប្រទេសកម្ពុជា ទៅប្រទេសថៃ កាលពីល្ងាចថ្ងៃទី៤ ខែកញ្ញា តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ដោយមានមន្ត្រីស្ថានទូតខ្មែរអមដំណើរទៅជាមួយផង។
មន្ត្រីនាំពាក្យ និងជាអនុរដ្ឋលេខាធិការក្រសួងការបរទេសខ្មែរ លោក កុយ គួង បានមានប្រសាសន៍នៅថ្ងៃទី៥ ខែតុលា ឆ្នាំ២០១០ថា តំណាងពលរដ្ឋខ្មែរទាំង ៤នាក់ នឹងត្រូវចូលខ្លួនធ្វើជាសាក្សីជូនតុលាការថៃ នៅថ្ងៃទី៦ ខែតុលា។
លោក កុយ គួង មានប្រសាសន៍ទៀតថា ៖ «គេប្ដឹងថៅកែហ្នឹង ខាងអាជ្ញាធរថៃ ទាមទារឲ្យគាត់សងជំងឺចិត្ត និងប្រាក់ខែផ្សេងៗដល់ក្រុមគាត់។ តើគាត់ទៅធ្វើការថៅកែធ្វើបាបយ៉ាងម៉េចខ្លះ? ហើយទាមទារឲ្យតុលាការសម្រេចក្ដីឲ្យថៅកែចេញសងនូវសំណងផ្សេងៗហ្នឹងឯង»។
លោក ឡត កែវ តំណាងប្រជាពលករខ្មែរទាំង ២១នាក់ បានឲ្យដឹងថា ប្រជាពលរដ្ឋខ្មែរទាំង ៤នាក់ បានចេញដំណើរពីប្រទេសកម្ពុជា កាលពីវេលាម៉ោង ៥ និង ៣០នាទីល្ងាច ថ្ងៃទី៤ ខែតុលា ៖ «ទៅបាងកកហើយ ប៉ុន្តែមិនទាន់បានដឹងដំណឹងមកទេ។ ជិះឡានធម្មតា...»។
កាលពីថ្ងៃទី២៩ ខែកញ្ញា ពលករខ្មែរ ២១នាក់ ត្រូវបានគេបញ្ជូនមកស្រុកខ្មែរពីក្រុងបាងកក ប្រទេសថៃ ដោយមានមន្ត្រីស្ថានទូតខ្មែរ ប្រចាំទីក្រុងបាងកក ប្រទេសថៃ អមដំណើរ។
លេខាទី២ នៃស្ថានទូតខ្មែរប្រចាំក្រុងបាងកក ប្រទេសថៃ លោក សាយ កានី បានឲ្យដឹងថា ការបញ្ជូនពលករខ្មែរ ២១នាក់មកស្រុកខ្មែរ គឺជាលើកទី២ បន្ទាប់ពីពលករខ្មែរបីនាក់ត្រូវបានបញ្ជូនមកជាលើកទី១ កាលពីពេលថ្មីៗនេះ។
ចំនួនពលករខ្មែរដែលរដ្ឋាភិបាលខ្មែរអន្តរាគមន៍មកស្រុកខ្មែរវិញទាំងពីរលើក សរុបមានចំនួន ២៤នាក់ ស្រី ១៧នាក់ ប្រុស ៧នាក់ ក្នុងនោះមានពលករខ្មែរចំនួន ៥នាក់ជាបុរសបានរត់គេចខ្លួនបាត់នៅក្នុងទឹកដីថៃ រហូតមកទល់សព្វថ្ងៃ។
កាលពីដើមឆ្នាំ២០១០ ប្រជាពលរដ្ឋខ្មែរចំនួន ២៩នាក់ ជាអ្នករស់នៅខេត្តបន្ទាយមានជ័យ និងខេត្តបាត់ដំបង ត្រូវបានមេខ្យល់នាំទៅជួញដូរកម្លាំងពលកម្មដោយគ្មានកម្រៃនៅក្រុមហ៊ុនផលិតប្រហិតថៃមួយ នៅស្រុកមហាឆៃ ខេត្តសាមុតសាខន ប្រទេសថៃ៕