សកម្មជនអ្នកតវ៉ារឿងដីធ្លីម្នាក់ ដែលកំពុងរស់នៅក្នុងសហគមន៍លើដីគម្របព្រៃឈើនៃឧទ្យានជាតិម្ដុំតំបន់ចំបក់បីដើម ក្នុងឃុំត្បែង ស្រុកបន្ទាយស្រីជាប់ជើងភ្នំគូលែន បាននាំប្រពន្ធ និងកូនចាក ចេញចោលផ្ទះ ដើម្បីសម្បែងស្វែងរកកន្លែងសុវត្ថិភាពជាបណ្ដោះអាសន្ន ដោយសារតែការភ័យខ្លាចដែលគាត់អះអាងថា មានជនមិនស្គាល់មុខប្រដាប់ដោយអាវុធ បានលបបាញ់មកលើរូបគាត់នៅ ពេលយប់កាលពីពេលថ្មីៗ នេះ។
លោក លួន អេង អាយុ ៤៤ ឆ្នាំ មានប្រសាសន៍នៅព្រឹកថ្ងៃទី២៨ ខែកក្កដាថា មានជនប្រដាប់អាវុធមិនស្គាល់មុខ បានលបលួចបាញ់ប្រហាររូបគាត់កាលពីរាត្រីថ្ងៃទី២៦ ខែកក្កដាកន្លងទៅ ៖ «ម៉ោង ១២ (យប់) ខ្ញុំនៅកំពុងចាប់ត្រីទំនប់វាចុះភ្លៀង ដល់ពេលខ្ញុំចាប់ត្រីរួចហើយខ្ញុំមក(ផ្ទះ)។ ហើយមកដល់ខ្ញុំធ្វើត្រីវាចូលម៉ោង ១២ កន្លះ (យប់) បាញ់មកខ្ញុំតែម្ដង។ ឮត្រូវជញ្ជាំងស្លឹកដូង។ គេបាញ់ខ្ញុំស្ទុះក្រោកឈរកាន់ផ្គាក់គឹបចុះទៅគេគេចចូលដុបបណ្ដោយ»។
បុរសដដែលមានប្រសាសន៍ថា រូបលោកគឺជាអ្នកធ្លាប់បានតវ៉ាយ៉ាងសកម្មចំពោះការទាមទារដីធ្លីនៅតំបន់នោះ និងធ្លាប់បានឡើងបញ្ចេញមតិរិះគន់តំណាងសហគមន៍ដីធ្លីនៅទីនោះផង នៅក្នុងវេទិកាសាធារណៈ ដែលរៀបចំឡើងដោយមជ្ឈមណ្ឌលសិទ្ធិមនុស្សកម្ពុជា កាលពីពេលថ្មីៗ កន្លងទៅ។
ទោះជាយ៉ាងណាក្ដី លោក ធួន នឿម ដែលជាតំណាងសហគមន៍នៅទីនោះថ្លែងថា លោកពុំបានដឹង អំពីរឿងរ៉ាវ ដែលថាមានការលួចបាញ់ប៉ុនប៉ងធ្វើឃាតមកលើសមាជិករបស់លោកនោះទេ។
លោក ធួន នឿម បន្តថា លោកបានសាកសួរប្រជាពលរដ្ឋ ដែលរស់នៅជិតៗ ផ្ទះរបស់បុរសឈ្មោះលួន អេង នោះដែរ ប៉ុន្តែមនុស្សជាច្រើនបានឆ្លើយថា គេមិនបានឮសូរគ្រាប់កាំភ្លើងដែលបាញ់ណាមួយទេ ហើយបុរសឈ្មោះ លួន អេង ក៏ពុំធ្លាប់មានទំនាស់ជាមួយអ្នកណាដែរ។
បើទោះបីជាតំណាងសហគមន៍ទីនោះអះអាងថា គេពុំបានដឹងថាមានអំពើលបបាញ់សមាជិករបស់គេក៏ដោយ ក៏អង្គការសិទ្ធិមនុស្ស និងមន្ត្រីប៉ូលិស អះអាងថា ពិតជាមានស្នាមគ្រាប់កាំភ្លើង និងស្លាកស្នាមភស្តុតាងខ្លះទៀត ដែលគេរកឃើញនៅផ្ទះជនរងគ្រោះ។
លោក ភិន ចយ ប្រធានប៉ុស្តិ៍នគរបាលឃុំត្បែង មានប្រសាសន៍ថា រហូតមកដល់ពេលនេះ លោកមិនទាន់បានទទួលពាក្យបណ្ដឹងពីគ្រួសារជនរងគ្រោះនៅឡើយទេ។ ប៉ុន្តែ លោកទទួលស្គាល់ថា ពិតជាមានការលបលួចបាញ់ពីជនប្រដាប់អាវុធមិនស្គាល់មុខមែន។
លោក ភិន ចយ៖ «បាញ់ដោយគ្រាប់កាំភ្លើងមែនហ្នឹងឯង។ បាញ់ទៅៗ ត្រូវសសរផ្ទះ។ មិនដឹងបាញ់សំដៅយ៉ាងម៉េចអីម៉េចមិនដឹងដែរ។ តាមគេប្រាប់ខ្ញុំថា ឃើញសំបកការទុស្សសំបកអីនៅអែបរបងចម្ងាយពីផ្ទះ ១៧ ម៉ែត្រទៅ ១៨ ម៉ែត្រនោះ ដែលគេចង្អុលបង្ហាញនោះវាមិនដឹងថា ឈរត្រង់នោះមែនឬអី។ ប៉ុន្តែសំបកការទុស្សដែលរកឃើញក្នុងរង្វង់កាំនោះឯង»។
លោក ឈឹម សាវុធ អ្នកស៊ើបអង្កេតរបស់មជ្ឈមណ្ឌលសិទ្ធិមនុស្សកម្ពុជា (CCHR) ដែលបានចុះធ្វើការស៊ើបអង្កេតទៅដល់កន្លែងកើតហេតុ បានអះអាងថា នៅនឹងផ្ទះបុរសនោះ គេបានរកឃើញសសរឈើមួយដើមនៅក្នុងផ្ទះ បានរងគ្រាប់កាំភ្លើង និងជញ្ជាំងស្លឹកដូងក៏បានធ្លុះធ្លាយដោយសារ គ្រាប់កាំភ្លើងដែរ។
អង្គការការពារសិទ្ធិមនុស្ស ដែលកំពុងស៊ើបអង្កេតករណីនេះ មានការព្រួយបារម្ភយ៉ាងខ្លាំង អំពីសុវត្ថិភាពក្រុមគ្រួសាររបស់បុរសឈ្មោះ លួន អេង និងមនុស្សមួយចំនួនទៀត ដែលជាអ្នកជិតស្និទ្ធជាមួយលោក លួន អេង ដែលកំពុងរស់នៅក្នុងភូមិនៅឡើយ៕