គ្រួសារក្មេងរងគ្រោះបានសុខចិត្តទទួលសំណងនោះ ដើម្បីបញ្ចប់ការប្ដឹងផ្ដល់ទៅស្ថាប័នតុលាការ ប៉ុន្តែក្រុមអ្នកច្បាប់និយាយថា គ្រូពេទ្យនៅជាប់ទោសលើបណ្ដឹងអាជ្ញានៅឡើយ។
ក្រសួងសុខាភិបាលបានដកគ្រូពេទ្យពីរនាក់ចេញពីមន្ទីរពេទ្យបង្អែកស្រុកថ្មពួក ទៅដាក់ជាបុគ្គលិកធម្មតា នៅមន្ទីរសុខាភិបាលម្នាក់ និងនៅមណ្ឌលសុខភាពស្វាយចេក ម្នាក់ ក្រោមហេតុផលថាគ្រូពេទ្យទាំងពីរនាក់នោះធ្វើឲ្យក្មេងប្រុសរងគ្រោះដោយសារពស់វែកចឹក ម្នាក់ស្លាប់។
នៅក្នុងពិធីប្រកាសតែងតាំងប្រធានមន្ទីរពេទ្យបង្អែកថ្មពួក កាលពីថ្ងៃទី៥ ខែធ្នូ លោក ញ៉ែម ភិរម្យ ត្រូវតាំងធ្វើជាប្រធានមន្ទីរពេទ្យថ្មពួក។ លោក គឹម សំអុល អតីតប្រធានមន្ទីរពេទ្យ ដកទៅដាក់មន្ទីរសុខាភិបាលខេត្តបន្ទាយមានជ័យ។ លោក អ៊ិន សុផារ័ត្ន អតីតគ្រូពេទ្យទទួលបន្ទុកផ្នែកកុមារនៅមន្ទីរពេទ្យថ្មពួក ដកទៅដាក់នៅមណ្ឌលសុខភាពស្វាយចេក។
លោកវេជ្ជបណ្ឌិត ឡេ ចាន់សង្វាត អនុប្រធានមន្ទីរសុខាភិបាលខេត្តបន្ទាយមានជ័យ បានថ្លែងថា គ្រូពេទ្យត្រូវតែគោរពក្រមសីលធម៌ និងគោរពវិជ្ជាជីវៈឲ្យបានត្រឹមត្រូវ។ ការស្លាប់របស់ក្មេងប្រុស ដោយសារគ្រូពេទ្យមិនព្រមផ្ដល់ថ្នាំបន្សាបពិសព្យាបាល ជាការទទួលខុសត្រូវរបស់មន្ទីរពេទ្យថ្មពួក៖ «ហ្នឹងជាការទទួលខុសត្រូវរបស់គ្រូពេទ្យ ហើយនេះក៏ជាការទទួលខុសត្រូវរបស់ប្រធានអង្គភាពដែរ។ ករណីពស់ចឹក ឱសថពស់ចឹក ជាឱសថរបស់ក្រសួងសុខាភិបាល ដែលយើងមានគ្រប់គ្រាន់សម្រាប់ផ្ដល់ប្រជាពលរដ្ឋ មិនបែងចែកឋានៈអីទេ។ ការដែលយើងប្រើពាក្យសម្ដីទៅមិនបានពិចារណានេះ ជាកំហុសមួយដែលជះឥទ្ធិពលទៅដល់ការដឹកនាំរបស់រដ្ឋាភិបាល នេះជាការដាក់ទណ្ឌកម្មផ្នែកវិន័យមួយ។ បុគ្គលនោះធ្វើខុស បុគ្គលទទួលខុសត្រូវ»។
អតីតប្រធានមន្ទីរពេទ្យបង្អែកស្រុកថ្មពួក លោក គឹម សំអុល បានថ្លែងនៅក្នុងពិធីផ្ទេរតំណែងទៅឲ្យលោក ញ៉ែម ភិរម្យ ប្រធានមន្ទីរពេទ្យថ្មីនោះ លាយឡំនឹងទឹកមុខភិតភ័យ។ លោក គឹម សំអុល មិនបានប្រកែកទៅសេចក្ដីសម្រេចរបស់ក្រសួងសុខាភិបាលនោះទេ ក្រៅពីការលើកឡើងពីសមិទ្ធផលមួយចំនួននៅមន្ទីរពេទ្យថ្មពួក ដែលបានកើតមាននៅពេលលោកដឹកនាំនោះ។ លោកបានផ្ដាំផ្ញើកុំឲ្យមានរឿងដូចករណីស្លាប់របស់កុមារ មឿន ម៉េត តទៅទៀត៖ «សូមឲ្យអស់លោក! លោកស្រី រួបរួមគ្នាដើម្បីធ្វើការ កុំឲ្យមានចន្លោះប្រហោងដូចថ្ងៃមុនទៀត»។
កាលពីល្ងាចថ្ងៃទី២៩ ខែវិច្ឆិកា ឆ្នាំ២០១២ ក្មេងប្រុសឈ្មោះ មឿន ម៉េត ហៅ ទត ត្រូវពស់វែកចឹក នៅក្បែរជង្រុកស្រូវនៅភូមិក្បាលទន្សោង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។ ភ្លាមនោះ ឪពុកម្ដាយក្មេងរងគ្រោះ បានបញ្ជូនទៅសង្គ្រោះនៅមន្ទីរពេទ្យ ប៉ុន្តែលោក អ៊ិន សុផារ័ត្ន ជាគ្រូពេទ្យទទួលបន្ទុកផ្នែកកុមារនៅមន្ទីរពេទ្យបង្អែកថ្មពួក បានបដិសេធមិនព្រមផ្ដល់ថ្នាំពស់ចឹកព្យាបាល ដោយប្រាប់ថា ថ្នាំពស់ចឹកនោះមានទុកសម្រាប់ក្រុមនិស្សិតចុះវាស់វែងដីធ្លីរបស់លោកនាយករដ្ឋមន្ត្រី ហ៊ុន សែន។
លោកស្រី ចាន់ ទី ជាម្ដាយ និងលោក ធុយ សាមឿន ត្រូវជាឪពុកក្មេងរងគ្រោះ បានសុំអង្វរទិញថ្នាំពស់ចឹកពីពេទ្យ តែពេទ្យមិនព្រមឲ្យ។ លោក អ៊ិន សុផារ័ត្ន បានបណ្ដេញជនរងគ្រោះឲ្យដឹកកូនតាមរថយន្តឈ្នួលទៅព្យាបាលនៅមន្ទីរពេទ្យមិត្តភាពកម្ពុជា-ជប៉ុន មង្គលបុរី។ ក្រោយមក ក្មេងនោះត្រូវជាតិពិសជ្រាបចូលសរសៃឈាមទៅដល់បេះដូង គាំងស្លាប់៖ «មានអារម្មណ៍ខូចចិត្តបាត់បង់កូនមួយ ហេតុតែពេទ្យមិនចាក់ឲ្យកូនខ្ញុំ បើពេទ្យចាក់ឲ្យ កូនខ្ញុំមិនស្លាប់ មកពីពេទ្យមិនចាក់ តែចិត្តចង់ឲ្យសងជីវិតកូនខ្ញុំហ្នឹងឯង។ ខ្ញុំអំពាវនាវសុំឲ្យពេទ្យក្រោយៗកុំធ្វើតម្រាប់តាមពេទ្យម្នាក់នោះ អ្នកជំងឺទៅសម្ដីឲ្យល្អផង កុំសម្ដីអាក្រក់ដាក់អ្នកជំងឺ»។
សាច់ញាតិកុមារ មឿន ម៉េត ចោទថាទង្វើរបស់គ្រូពេទ្យនៅមន្ទីរពេទ្យបង្អែកថ្មពួក គឺជាអំពើអមនុស្សធម៌។ ឪពុកម្ដាយក្មេង សុំអង្វរទិញថ្នាំពស់ចឹកនោះ ប៉ុន្តែគ្រូពេទ្យទំនងគិតថាលុយបានមកពីការលក់ថ្នាំនោះបានតិចពេក ទើបដំអក់ពេលវេលា ហើយបែរជានិយាយថាថ្នាំនោះទុកសម្រាប់ព្យាបាលក្រុមនិស្សិតចុះវាស់ដីទៅវិញ។
ជីដូន កុមារ មឿន ម៉េត បានថ្លែងថា បើពេទ្យថ្មពួក ចាក់ថ្នាំពស់ចឹកឲ្យចៅគាត់ ហើយចៅគាត់ស្លាប់នោះ គាត់ក៏អស់ចិត្តដែរ តែនេះពេទ្យមានថ្នាំពស់ចឹក ហើយមិនព្រមជួយសង្គ្រោះ។ លោកស្រីអំពាវសុំឲ្យគ្រូពេទ្យនៅតាមមន្ទីរពេទ្យផ្សេងទៀត កុំយកតម្រាប់តាមគ្រូពេទ្យនៅមន្ទីរពេទ្យថ្មពួក៖ «មានពាក្យផ្ដាំទៅតាមមន្ទីរពេទ្យទាំងអស់ កុំឲ្យធ្វើតម្រាប់តាមពេទ្យនេះឲ្យសោះ មិនដិតដល់ឲ្យប្រជាជនទេ។ ប្រជាជនពឹងទៅលើពេទ្យ តែពេទ្យមិនយកចិត្តទុកដាក់ ឲ្យប្រជាជនទៅពឹងអ្នកណា»។
លោក ជន ចាន់ ត្រូវជាពូក្មេងរងគ្រោះ បានថ្លែងថា កាលពីល្ងាចថ្ងៃទី៥ ខែធ្នូ ក្រោយពីមានការសម្របសម្រួលរបស់អាជ្ញាធរមូលដ្ឋានស្រុកថ្មពួក គ្រូពេទ្យនៅមន្ទីរពេទ្យបង្អែកស្រុកថ្មពួក សុខចិត្តផ្ដល់ប្រាក់ជំងឺចិត្តចំនួន ១៧លានរៀល ទៅឲ្យឪពុកម្ដាយកុមារ មឿន ម៉េត ដើម្បីជាថ្នូរសុំកុំឲ្យគ្រួសារជនរងគ្រោះប្ដឹងទៅតុលាការ។ ឪពុកម្ដាយក្មេងរងគ្រោះ ក៏ព្រមទទួលយកសំណងរដ្ឋប្បវេណី និងមិនបន្តការប្ដឹងគ្រូពេទ្យនោះទេ។
លោក ប៉ែន សុនសម័យ ជាមេធាវីរបស់គណបក្សប្រជាជនកម្ពុជា និងជាទីប្រឹក្សាលោក ជា ស៊ីម លោកពន្យល់ថា ករណីគ្រូពេទ្យផ្ដល់ប្រាក់ចំនួន ១៧លានរៀល ទៅឪពុកម្ដាយក្មេងរងគ្រោះនោះ គ្រាន់តែជាសំណងរដ្ឋប្បវេណី ប៉ុន្តែដើមបណ្ដឹងអាជ្ញាមិនអាចរំលត់សំណុំរឿងបានទេ។ ដូច្នេះ តំណាងអយ្យការតុលាការខេត្តបន្ទាយមានជ័យ អាចកសាងសំណុំរឿងចោទប្រកាន់ទៅគ្រូពេទ្យ បន្ទាប់មកបញ្ជូនសំណុំរឿងទៅឲ្យចៅក្រមស៊ើបសួរ ដើម្បីបើកការស៊ើបអង្កេតបន្តតាមនីតិវិធីច្បាប់៖ «យើងមើលទៅ គ្នាខំដោះស្រាយហ្នឹងក៏វាច្រើនដែរ ក៏ប៉ុន្តែ នៅតែមានទោសដែរ ព្រោះអាហ្នឹងរឿងព្រហ្មទណ្ឌ នៅលើព្រះរាជអាជ្ញា ថាគេចោទឬអត់។ គាត់មិនត្រូវនិយាយពាក្យហ្នឹង គេហៅថា អមនុស្សធម៌ ចុះបើគាត់យកថ្នាំដែលគាត់មានស្រាប់យកទៅសូវេរក្មេងហ្នឹង ហើយចាំស្អែក ឬល្ងាច ទៅរកថ្នាំពស់ហ្នឹង ទៅការពារវិញមិនបាន»។
ព្រះរាជអាជ្ញាតុលាការខេត្តបន្ទាយមានជ័យ លោក ផាន់ វណ្ណរ័ត្ន បានមានប្រសាសន៍ថា តំណាងអយ្យការនៅពុំទាន់ទទួលព័ត៌មានជុំវិញករណីស្លាប់របស់កុមារ មឿន ម៉េត នេះទេ ដោយសារតែលោកកំពុងជាប់បំពេញបេសកកម្មនៅទីក្រុងភ្នំពេញ។ លោកបញ្ជាក់ថា តំណាងអយ្យកានឹងចាត់តាំងព្រះរាជអាជ្ញារងម្នាក់ បើកការស៊ើបសួរពីដំណើររឿងនេះឡើងវិញ មុននឹងធ្វើការចោទប្រកាន់ជាផ្លូវការទៅលើគ្រូពេទ្យ។ លោកបន្តថា ជាធម្មតានៅពេលមានបទល្មើសមួយកើតឡើង ទោះបីជនរងគ្រោះដកបណ្ដឹង ដើម្បីទទួលយកសំណងរដ្ឋប្បវេណីក៏ដោយ ប៉ុន្តែបណ្ដឹងអាជ្ញាមិនអាចរលត់បានទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។