លោក មឿង សុន ដែលមានសញ្ជាតិបារាំងដើមកំណើតខ្មែរ ក្រោយត្រូវមេធាវីរដ្ឋាភិបាលប្ដឹងផ្ដន្ទាទោសនិងទារជំងឺចិត្តជាប្រាក់ ១០លានរៀលមក បានទៅដល់ប្រទេសបារាំង នៅថ្ងៃទី៥ មិថុនា បានឲ្យដឹងអំពីមូលហេតុនៃការគេចខ្លួននេះ។
លោក មឿង សុន មានប្រសាសន៍ដូច្នេះថា ៖ «ជាដំបូង ខ្ញុំមិនមានគំនិតថា ប្រុងរត់គេចមកជ្រកកោននៅប្រទេសបារាំងទេ ព្រោះខ្ញុំយល់ថា អ្វីដែលខ្ញុំធ្វើគ្រាន់តែបញ្ចេញទស្សនៈដើម្បីអភិរក្សនិងអភិវឌ្ឍអង្គរវត្តវាគ្មានរឿងអីដែលខ្ញុំខុសទេ។ ក៏ប៉ុន្តែដល់ជាក់ស្ដែងមានអ្នកខ្លះ រដ្ឋាភិបាលចោទប្រកាន់រឿងញុះញង់ត្រូវជាប់ឃុំខ្លួន គេមិនបានធ្វើតាមនីតិវិធីត្រឹមត្រូវហ្នឹងហើយ ទើបខ្ញុំសម្រេចចិត្តត្រូវតែចេញមកនៅប្រទេសក្រៅសិន»។
អ្នកនាំពាក្យទីស្ដីការគណៈរដ្ឋមន្រ្តី គឺលោក ផៃ ស៊ីផាន ឲ្យដឹងថា បណ្ដឹងរបស់រដ្ឋាភិបាលធ្វើឡើងដើម្បីទប់ស្កាត់អស្ថិរភាពក្នុងសង្គម ៖ «គាត់ហ្នឹងក្នុងលក្ខណៈវិទ្ធង្សនា ញុះញង់ដោយហេតុផលឃើញបង្កើតបានជាសារអេឡិចត្រូនិច ប្រកូកប្រកាសគ្នាឲ្យធ្វើបាតុកម្មប្រឆាំងនឹងការងាររបស់រដ្ឋាភិបាល ជាពិសេសនៅក្នុងសម័យកំពុងតែប្រជុំគណៈកម្មាធិការសម្របសម្រួលអន្តរជាតិ»។
រីឯមន្រ្តីជាន់ខ្ពស់គណបក្សប្រជាជន គឺអ្នកតំណាងរាស្រ្ដ ជាម យៀប សម្ដែងការសោកស្ដាយចំពោះព្រឹត្តិការណ៍នេះ ហើយឲ្យដឹងថា សាធារណជននឹងបានស្ដាប់លោកឧបនាយករដ្ឋមន្រ្តី សុខ អាន ដែលនឹងត្រូវឆ្លើយចំពោះមុខសភាពេញអង្គនៅថ្ងៃសុក្រ ទី១៩ មិថុនា ចុងសប្ដាហ៍នេះ។
លោក ជាម យៀប មានប្រសាសន៍ដូច្នេះថា ៖ «លោក មឿង សុន លើកឡើងមក ខ្ញុំឃើញថា គាត់មានគំនិតស្នេហាជាតិ ស្នេហាបេតិកភណ្ឌជាតិ។ គណៈអចិន្រ្តៃយ៍ប្រជុំគ្នាហើយ ថ្ងៃសុក្រ ទី១៩ ចាប់ពីម៉ោង ៨កន្លះទៅ សភាពេញអង្គអញ្ជើញឯកឧត្ដមឧបនាយករដ្ឋមន្រ្តី សុខ អាន រដ្ឋមន្រ្តីទីស្ដីការគណៈរដ្ឋមន្រ្តី ក្នុងនាមជាប្រធានអាជ្ញាធរអប្សរា ឆ្លើយសំណួររបស់លោកជំទាវ កែ សុវណ្ណរតន៍ និងឯកឧត្ដម សុន ឆ័យ ស្ដីអំពីប្រាសាទអង្គរវត្ត។ លោកជំទាវ សុវណ្ណរតន៍ មានមួយសំណួរ ហើយឯកឧត្ដម សុន ឆ័យ មាន ៤សំណួរ»។
រីឯប្រធានអ្នកតំណាងរាស្រ្ដគណបក្សប្រឆាំង សុន ឆ័យ ក្រៅពីបានថ្លែងអំណរគុណចំពោះលោកនាយករដ្ឋមន្រ្តី ហ៊ុន សែន ដែលបានបញ្ជូនលោកឧបនាយករដ្ឋមន្រ្តីទៅឆ្លើយសំណួររបស់លោកនៅរដ្ឋសភានោះបានឲ្យដឹងថា លោកគ្រោងនឹងសួរអំពីករណីប្ដឹងផ្ដល់ចំពោះលោក មឿង សុន ផងដែរ។
លោក សុន ឆ័យ ថ្លែងដូច្នេះថា ៖ «ការគ្រប់គ្រងប្រទេសតាមបែបប្រជាធិបតេយ្យ ពលរដ្ឋត្រូវចូលរួម។ ហើយអ្វីដែលសាធារណជន ពលរដ្ឋលោកបានធ្វើ គឺធ្វើដោយការស្រលាញ់។ ហើយក្រោយពីគាត់ប្រកាសផ្អើលគេផ្អើលឯងទៅ ក៏ឃើញហាក់ដូចជាមានការពិនិត្យទៅលើអំពើខុសឆ្គងនោះឡើងវិញ ហើយឥឡូវនេះឮថាដកភ្លើងដកអីចេញអស់ហើយ ដូច្នេះបានន័យថា អប្សរាទទួលស្គាល់កំហុសរបស់ខ្លួន។ តើមានមូលហេតុអីដែលត្រូវប្ដឹងលោក មឿង សុន? បើគាត់និយាយខុស ខុសអី? ហើយបើគាត់និយាយត្រូវ ហើយខ្លួនយើងបានកែលម្អ ហើយគួរតែលើកទឹកចិត្តឲ្យពលរដ្ឋចូលរួមឲ្យកាន់តែច្រើនទៀត»៕