លោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុធនាគារ និងសវនកម្មនៃរដ្ឋសភា និងជាអ្នកតំណាងរាស្រ្តគណបក្សប្រជាជនកម្ពុជា មានប្រសាសន៍ថា សេចក្តីព្រាងច្បាប់ស្តីពីនីតិវិធីនៃរឿងក្តីរដ្ឋប្បវេណីដែលមិនមែនជាបណ្តឹងនេះ តាក់តែងឡើងក្នុងគោលបំណងធានាអនុវត្តឲ្យបានត្រឹមត្រូវនូវនីតិវិធីក្នុងការដោះស្រាយរឿងក្តីរដ្ឋប្បវេណីដែលមិនមែនជាបណ្តឹង។
លោក ជាម យៀប មានប្រសាសន៍ថា ៖ «អ៊ីចឹងទេយើងឃើញថា មានសារប្រយោជន៍ណាស់នូវអ្វីៗជាបញ្ហារបស់សង្គម សកម្មភាពប្រចាំថ្ងៃរបស់សង្គម ដែលមានកើតជាវិវាទ ព្រះរាជអាជ្ញាមានសិទ្ធិ។ កាលនៅក្នុងក្រមព្រហ្មណ្ឌ ១៣០៥មាត្រា អត់មានចែងអាហ្នឹងទេ ឥឡូវច្បាប់នេះចែងបន្ថែមទៀត បំពេញបន្ថែមទៅលើក្រមរដ្ឋប្បវេណីដែលមិនទាន់បានចែង»។
របាយការណ៍ស្តីពីការពិនិត្យនៃរឿងក្តីរដ្ឋប្បវេណីដែលមិនមែនជាបណ្តឹង បានសរសេរថា ច្បាប់ស្តីពីការពិនិត្យនៃរឿងក្តីរដ្ឋប្បវេណីដែលមិនមែនជាបណ្តឹងមាន ១០ជំពូក និង ៥៦មាត្រា ដែលសភាបានពិភាក្សា និងអនុម័តនៅពេលនេះ បានរៀបចំឡើងតាមបទបញ្ញត្តិដែលមានចែងក្នុងមាត្រា ៩១ថ្មីនៃរដ្ឋធម្មនុញ្ញ៕