ប្រធានមជ្ឈមណ្ឌលជាតិកំចាត់ជំងឺគ្រុនចាញ់ លោកវេជ្ជបណ្ឌិត ឌួង សុជាតិ បានបញ្ជាក់ថា មូលហេតុដែលនាំឲ្យមានគម្រោងផ្លាស់ប្តូរឱសថថ្មីនេះ ពីព្រោះគេបានសង្កេតឃើញថាឱសថដែលគេប្រើប្រាស់ក្នុងការព្យាបាលជំងឺគ្រុនចាញ់កន្លងមក ក៏ដូចសព្វថ្ងៃគឺកំពុងតែមានភាពស៊ាំសម្លាប់មេរោគមិនសូវមានប្រសិទ្ធភាព។
លោកបានបន្តទៀតថា បញ្ហាភាពស៊ាំនោះក៏ដោយសារកត្តាច្រើនយ៉ាង ដូចជាការប្រើប្រាស់ឱសថមិនគ្រប់កម្រិតតាមវេជ្ជបញ្ជា ឬការផ្តល់ការព្យាបាលមិនច្បាស់លាស់ជាដើម ៖ «អ៊ីចឹង បើសិនយើងមិនគ្រប់គ្រងភាពស៊ាំហ្នឹងឲ្យវាទាន់ពេល វានឹងរាលដាលទៅទូទាំងប្រទេស ហើយក៏អាចឆ្លងទៅតំបន់ផ្សេងទៀត»។
ថ្មីៗនេះ សារព័ត៌មានបរទេសក៏បានដកស្រង់សម្ដីរបស់មន្ត្រីសុខាភិបាលនៃអង្គការសុខភាពពិភពលោក លោក ប៉ាស្កាល់ រីងវ៉ាល់ (Pascal Ringwald) មានប្រសាសន៍ថា យើងកំពុងប្រឈមនឹងបញ្ហាមួយគឺការសម្លាប់មេរោគគ្រុនចាញ់ ដែលមុននេះ ពីចន្លោះ ២៤ម៉ោង ទៅ ៣៦ម៉ោង គឺមេរោគនោះវាស្លាប់បាន ឥឡូវទាល់តែ ១២០ម៉ោង ទើបមេរោគគ្រុនចាញ់ស្លាប់បាន។
ដោយសារតែមានភាពស៊ាំយ៉ាងដូច្នោះហើយ គេឃើញមានការកើនឡើងនូវជំងឺគ្រុនចាញ់នៅតាមតំបន់ខ្លះនៃព្រំដែនកម្ពុជា-ថៃ ដូចជានៅក្រុងប៉ៃលិន។
នាយរងសឹករងប្រចាំក្រុងប៉ៃលិន លោក ញ៉ាត់ លី បានបញ្ជាក់ថា ប្រមាណជាងមួយសប្តាហ៍កន្លងមកនេះ មានការកើតជំងឺគ្រុនចាញ់ច្រើន ហើយកងទ័ពដែលកំពុងប្រចាំការនៅតាមព្រំដែននេះកំពុងតែខ្វះខាតមុងសម្រាប់ការពារមូសនិងខ្វះថ្នាំព្យាបាល ៖ «យើងដូចថា ឡើងទៅភ្នំអ៊ីចឹង ព្រោះនៅការពារព្រំដែនវាឆ្ងាយពីពេទ្យ ផ្លូវវាពិបាកពេក»។
ប្រធានមជ្ឈមណ្ឌលជាតិកម្ចាត់ជំងឺគ្រុនចាញ់ លោកវេជ្ជបណ្ឌិត ឌួង សុជាតិ បានមានប្រសាសន៍ថា ឱសថថ្មីដែលបម្រុងនឹងធ្វើការព្យាបាលជំងឺគ្រុនចាញ់នោះ គឺគេនឹងចែកចាយដល់កងទ័ព ព្រមទាំងគ្រប់មណ្ឌលសុខភាពនៅតាមតំបន់ព្រំដែនខ្មែរ-ថៃ។
លោកបានបញ្ជាក់ទៀតថា ឱសថថ្មីនេះគឺអាចជួយព្យាបាលជំងឺគ្រុនចាញ់យ៉ាងមានប្រសិទ្ធភាពខ្ពស់។
លោកវេជ្ជបណ្ឌិត ឌួង សុជាតិ មានប្រសាសន៍ថា ៖ «ឱសថហ្នឹងអក្សរកាត់វា DHA ហើយនិងពីពេរ៉ាគីន អក្សរពេញវា ឌីឌ្រូទេមីស៊ីនីន (Dihydroartemisinin) បូកនិង Piperaquine ជាឱសថមួយដែលមិនមានភាពស៊ាំទេ ហើយក៏មិនមានប្រតិកម្មខ្លាំងដូចជាឱសថដែលយើងប្រើប្រាស់រាល់ថ្ងៃហ្នឹង ប្រើថ្មី ប្រើតែ ២ថ្ងៃផង»។
លោកវេជ្ជបណ្ឌិត បានឲ្យដឹងផងដែរថា ទោះជាយ៉ាងណាក៏ដោយស្ថានភាពជំងឺគ្រុនចាញ់នៅកម្ពុជាសព្វថ្ងៃគេឃើញមានការថយចុះច្រើន ដូចជានៅឆ្នាំ២០០៧ មាន ៥៩.០០០ករណី ក្នុងនោះមានស្លាប់ ២៤១នាក់ ប៉ុន្តែនៅឆ្នាំ២០០៨កន្លងទៅ មានតែ ៥៤.០០០ករណី ហើយស្លាប់ថយមកនៅត្រឹមតែ ១៨៤នាក់៕