សេចក្តីអំពាវនាវនេះធ្វើឡើងកាលពីថ្ងៃច័ន្ទ ទី២៨ ខែកញ្ញា ឆ្នាំ២០០៩ បន្ទាប់ពីអង្គការនេះរកឃើញឯកសារផ្ទេរកម្មសិទ្ធិដីមួយកន្លែងរបស់អតីតជនជាប់ចោទក្នុងក្តីព្រហ្មទណ្ឌមួយរូបដែលត្រូវបានគេផ្ទេរទៅឲ្យឈ្មោះលោក ថោ សារ៉ន។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា ៖ «សំណួរសួរថា តើវាអាចពាក់ព័ន្ធនឹងផលប្រយោជន៍របស់លោកចៅក្រមដែរឬមួយក៏អត់?»។
ស្ត្រីឈ្មោះ ឃិន រដ្ឋា រស់នៅភូមិប៉ាតាង មានប្រសាសន៍បញ្ជាក់ថា ប្តីរបស់គាត់ឈ្មោះ នុត រ៉ា មានជម្លោះវាយតប់គ្នាជាមួយអ្នកភូមិរស់នៅជិតខាងគ្នា ហើយត្រូវបានចាប់ខ្លួន។ បន្ទាប់មកត្រូវបានដោះលែងវិញបន្ទាប់ពីមានការសម្របសម្រួលពីចៅក្រម ថោ សារ៉ន ឲ្យគាត់បង់ប្រាក់ជាង១ពាន់ដុល្លារ។
គាត់ថា លោក ថោ សារ៉ន បានមកដល់ផ្ទះគាត់ហើយឲ្យគាត់ខ្ចីប្រាក់២០០ដុល្លារដើម្បីទិញដីមួយកន្លែងនៅក្នុងភូមិទំហំ៣ហិកតារ ហើយគាត់បានធ្វើលិខិតផ្ទេរសិទ្ធិកាន់កាប់ដីពីអ្នកលក់ ដោយមានមេភូមិ មេឃុំ ចុះហត្ថលេខាលើលិខិតផ្ទេរសិទ្ធិនោះទៀតផង។
អ្នកស្រី ឃិន រដ្ឋា បានឲ្យដឹងថា ៖ «ក្រដាសហ្នឹងគេធ្វើឲ្យមក ប្រគល់លុយឲ្យគេ គេធ្វើអាហ្នឹងមក»។
កាលពីថ្ងៃសៅរ៍ ទី២៦ ខែកញ្ញា វិទ្យុអាស៊ីសេរីបានទៅដល់ផ្ទះស្ត្រីឈ្មោះ ឃិន រដ្ឋា ដែលមិនចេះអក្សរ បានបង្ហាញលិខិតផ្ទេរសិទ្ធិកាន់កាប់ដីរបស់គាត់ ក៏ប៉ុន្តែលិខិតនោះមិនមានឈ្មោះគាត់ជាម្ចាស់ដីទេ គឺឈ្មោះ លោក ថោ សារ៉ន ទៅវិញ។
វិទ្យុអាស៊ីសេរីមិនអាចទាក់ទងសុំការបំភ្លឺករណីនេះពីលោក ថោ សារ៉ន បានទេ នៅថ្ងៃច័ន្ទ ទី២៨ កញ្ញា ឆ្នាំ២០០៩។
មេឃុំប៉ាតាង លោក គឹត ចេន មានប្រសាសន៍ថា លោកពិតជាបានចុះហត្ថលេខាលើការផ្ទេរសិទ្ធិកាន់កាប់ដី៣ហិកតារនោះទៅឲ្យលោក ថោ សារ៉ន។ ក៏ប៉ុន្តែលោកបដិសេធថា មិនដឹងពីការពាក់ព័ន្ធរវាងលោក ថោ សារ៉ន និងឈ្មោះ ឃិន រដ្ឋា ដែលកំពុងរស់នៅលើដីនោះ។
លោក គង់ ស្រ៊ុន អភិបាលស្រុកលំផាត់ មានប្រសាសន៍ថា ករណីនេះកើតឡើងមុនពេលលោកចូលកាន់តំណែង ៖ «ការចុះហត្ថលេខាដោយមិនប្រក្រតីក៏មានមែន។ ទី១ ខ្ញុំត្រូវសួរនាំអំពីឃុំសិន»។
មជ្ឈមណ្ឌលសិទ្ធិមនុស្សកម្ពុជានិងអង្គការលីកាដូ កាលពីសប្តាហ៍មុនបានធ្វើសេចក្តីថ្លែងការណ៍ទៅស្ថាប័នសំខាន់ៗនៃប្រព័ន្ធយុត្តិធម៌ប្រទេសកម្ពុជាដើម្បីធ្វើការស៊ើបអង្កេតទៅលើភាពមិនប្រក្រតីរបស់ចៅក្រម ថោ សារ៉ន ក្នុងការស្នើសុំដី១០០ហិកតារនៅឃុំប៉ាតាង និងយករថយន្តវត្តុតាងក្នុងរឿងឧក្រិដ្ឋកម្មមកប្រើប្រាស់ ដែលជាទង្វើខុសនិងមិនសមរម្យរបស់ចៅក្រម និងការគំរាមកំហែងទៅលើសកម្មជនការពារសិទ្ធិមនុស្សនិងសហគមន៍ជនជាតិដើម។
ចំណែកការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាបានចេញសេចក្តីថ្លែងការណ៍អំពាវនាវឲ្យបញ្ចប់ការយាយីអ្នកការពារសិទ្ធិមនុស្សនៅខេត្តរតនគិរី ដោយលោក ថោ សារ៉ន ផងដែរ៕