សាលាឧទ្ធរណ៍សម្រេចជំទាស់បណ្ដឹងមេធាវី និងគ្រួសាររបស់លោក ម៉ម សូណង់ដូ ដែលស្នើសុំនៅក្រៅឃុំ។ បញ្ហានេះ ត្រូវបានក្រុមអ្នកតាមដានដំណើរការសវនាការលើករណីប្រធានវិទ្យុសំបុកឃ្មុំ នៅខាងក្រៅក្បែរសាលាឧទ្ធរណ៍ ប្រតិកម្មប្រឆាំងនឹងសេចក្ដីសម្រេចនេះ ដោយចាត់ទុកថា ការសម្រេចនេះធ្វើឡើងក្រោមសម្ពាធនយោបាយ ដែលធ្វើឲ្យប៉ះពាល់ធ្ងន់ធ្ងរដល់ប្រព័ន្ធយុត្តិធម៌នៅកម្ពុជា។
លោក ណៃ វ៉ង់ដា អនុប្រធានផ្នែកសិទ្ធិមនុស្ស និងមេធាវីតំបន់របស់សមាគមការពារសិទ្ធិមនុស្សអាដហុក (Adhoc) ដែលសង្កេតការណ៍នៅខាងក្រៅសាលាឧទ្ធរណ៍ បង្ហាញការសោកស្ដាយចំពោះការបដិសេធរបស់សាលាឧទ្ធរណ៍សុំនៅក្រៅឃុំរបស់មេធាវីលោក ម៉ម សូណង់ដូ។ លោកគិតថា ករណីនេះហាក់ពុំបានផ្ដល់យុត្តិធម៌ណាមួយនោះទេសម្រាប់លោក ម៉ម សូណង់ដូ។ លោក ណៃ វ៉ង់ដា គិតថាសាលាឧទ្ធរណ៍គួរធ្វើការដោយឯករាជជាងនេះបន្ថែមទៀត៖ «គាត់មានហេតុផលគ្រប់គ្រាន់ថា គាត់មិនរត់ទៅណាទេ អ៊ីចឹងតុលាការគួរតែពិចារណាដោះលែងគាត់។ ប៉ុន្តែយើងមានការខកចិត្តច្រើនដែរ ខ្លាំងដែរ ដែលតុលាការសាលាឧទ្ធរណ៍សម្រេចថារក្សាទុកគាត់ក្នុងពន្ធនាគារបន្តទៀត»។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា ឲ្យដឹងនៅខាងក្រៅសវនាការបន្ទាប់ពីចំណាយពេលពេញមួយព្រឹកនៅខាងក្នុងសាលាឧទ្ធរណ៍ថា ប្រព័ន្ធយុត្តិធម៌នៅកម្ពុជា បានក្លាយជាកូនអុកសម្រាប់អ្នកនយោបាយ។ លោកបន្តថា សម្រាប់ពេលនេះប្រព័ន្ធយុត្តិធម៌គេមិនអាចមើលឃើញថាមានការវិវត្តន៍បាននោះទេនៅកម្ពុជា ដរាបណាយន្តការនេះនៅតែស្ថិតក្រោមសម្ពាធរបស់អ្នកនយោបាយនោះ៖ «យើងមិនទាន់បានប្រទេសមួយដែលៗការពារនូវសេរីភាព នូវយុត្តិធម៌ និងនូវគោលការណ៍សិទ្ធិមនុស្សនៅឡើយ។ ខ្ញុំសោកស្ដាយ ២០ឆ្នាំហើយ យើង ២០ឆ្នាំហើយ ឥឡូវយើងដើរៗដល់ពេលមួយដែលយើងដើរហាក់ដូចមិនទៅមុខទាល់តែសោះនៅពេលឥឡូវនេះ ហើយជារឿងគួរឲ្យសោកស្ដាយមែនទែន។ តុលាការយើងនៅតែជាតុលាការនៃតុលាការនយោបាយមួយ ហើយអ្នកនយោបាយយើងនៅមិនទាន់បើកចិត្តឲ្យទូលាយនៅឡើយ គួរឲ្យសោកស្ដាយមែនទែន»។
ក្រុមប្រជាពលរដ្ឋដែលនៅខាងក្រៅសាលាឧទ្ធរណ៍វិញ ហៅការបដិសេធលើបណ្ដឹងសុំនៅក្រៅឃុំរបស់មេធាវីលោក ម៉ម សូណង់ដូ នេះថា ធ្វើឡើងដើម្បីផ្គាប់ផ្គុនមន្ត្រីរដ្ឋាភិបាលប៉ុណ្ណោះ។ ពួកគេគិតថា លោកប្រធានសមាគមអ្នកប្រជាធិបតេយ្យ គឺមិនមានទោសកំហុសដូចការរកឃើញរបស់សាលាដំបូងរាជធានីភ្នំពេញនោះទេ។
ចំណែកលោក រ៉ុង ឈុន ប្រធានសមាគមគ្រួបង្រៀនកម្ពុជាឯករាជ ហៅការសម្រេចរបស់សាលាឧទ្ធរណ៍នៅពេលនេះថា ធ្វើឡើងក្នុងន័យគាបសង្កត់ និងបំបាក់ស្មារតីអ្នកតស៊ូមតិដើម្បីសេរីភាព។
អ្នកស្រី មូរ សុខហួរ អ្នកតំណាងរាស្ត្រគណបក្ស សម រង្ស៊ី មានប្រសាសន៍ថា សាលាឧទ្ធរណ៍គួរពិចារណាឡើងវិញលើការស្នើសុំនៅក្រៅឃុំនេះ។ អ្នកស្រីគិតថា បទចោទលើលោក ម៉ម សូណង់ដូ នេះ គឺពុំមានអង្គហេតុ និងភស្តុតាងត្រឹមត្រូវនោះទេ។
លោក សុរិយា ស៊ូប៊ែឌី (Surya Subedi) អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកផ្នែកសិទ្ធិមនុស្សប្រចាំកម្ពុជា ថ្លែងថា ករណីលោក ម៉ម សូណង់ដូ នេះលោកបានតាមដានយ៉ាងខ្ជាប់ខ្ជួន និងសន្យាថាបន្តឃ្លាំមើលទៀតចំពោះការអនុវត្តប្រព័ន្ធយុត្តិធម៌នៅកម្ពុជា៖ «ខ្ញុំសូមអភ័យទោសដែលអវត្តមានពុំបានចូលរួមសវនាការនៅសាលាឧទ្ធរណ៍នៅព្រឹកនេះ ដោយសារខ្ញុំមានកិច្ចការដទៃទៀត។ ខ្ញុំពិតជាមានការព្រួយបារម្ភយ៉ាងពន់ពេកចំពោះស្ថានភាពនៅចំពោះមុខនេះ តែខ្ញុំនឹងធ្វើអ្វីម្យ៉ាងក្នុងរឿងនេះទៅមន្ត្រីជាន់ខ្ពស់របស់រដ្ឋាភិបាល»។
ស្របពេលដែលពលរដ្ឋប្រមាណ ៣០០នាក់ នៅថ្ងៃទី១៤ ខែធ្នូ ឆ្នាំ២០១២ បន្តស្វែងរកកិច្ចអន្តរាគមន៍ពីការិយាល័យឧត្ដមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំកម្ពុជា ក្រោយដឹងថាសំណើសុំនៅក្រៅឃុំរបស់មេធាវីលោក ម៉ម សូណង់ដូ មិនទទួលបានជោគជ័យនោះ។
ចំណែកអង្គការដែលធ្វើការផ្នែកសិទ្ធិមនុស្សមួយចំនួនដូចជា មជ្ឈមណ្ឌលសិទ្ធិមនុស្សកម្ពុជា និងគណៈកម្មាធិការប្រព្រឹត្តិកម្មដើម្បីសិទ្ធិមនុស្ស (CHRAC) បានចេញសេចក្ដីថ្លែងការណ៍ព្រមៗគ្នានៅថ្ងៃទី១៤ ខែធ្នូ ដោយចាត់ទុកការសម្រេចរបស់សាលាឧទ្ធរណ៍នេះថា បានធ្វើឲ្យប៉ះពាល់ធ្ងន់ធ្ងរដល់ការវិវត្តន៍នៃប្រព័ន្ធយុត្តិធម៌នៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។