ប្រធានអង្គការមូលនិធិទ្រទ្រង់អរិយធម៌ខ្មែរ លោក មឿង សុន បានធ្វើសន្និសីទកាសែតមួយកាលពីល្ងាចថ្ងៃពុធទី៦ ខែឧសភាថា លោកនៅតែបន្តធ្វើការទាមទារនោះ ក៏ប៉ុន្តែលោកព្រួយបារម្ភខ្លាចការទាមទាររបស់លោកអាចនឹងត្រូវបានរដ្ឋាភិបាលខ្មែរហាមឃាត់នាពេលណាមួយ។
លោក មឿង សុន ថ្លែងយ៉ាងដូច្នេះ ៖ «យើងអត់ថយក្រោយទេ លុះត្រាតែរដ្ឋាភិបាលចេញជាផ្លូវការហាមថា កុំឲ្យខ្ញុំធ្វើ ...ហ្នឹងគឺខ្ញុំអត់ធ្វើទេ។ តែបើសិនជារដ្ឋាភិបាលលោកយល់ថា ប្រជាពលរដ្ឋមានសិទ្ធិជួយរាជរដ្ឋាភិបាលក្នុងការការពារទឹកដីនិងកសាងប្រទេស ខ្ញុំត្រូវតែជំរុញទៅដល់ទិសដៅឲ្យមានសំណងទាល់តែបាន ពីព្រោះអត់មានហេតុផលណាមួយដែលថៃមិនទទួលខុសត្រូវនោះទេ អត់អាចប្រកែកបានទេ»។
ប្រធានមូលនិធិទ្រទ្រង់អរិយធម៌ខ្មែររូបនេះ បានឲ្យដឹងទៀតថា កាលពីថ្ងៃទី២២ ខែមេសា កន្លងមក លោកបានបញ្ជូនលិខិតមួយច្បាប់ទៅរដ្ឋាភិបាលថៃនិងលិខិតមួយច្បាប់ទៀតទៅទីស្តីការគណៈរដ្ឋមន្ត្រីនៃរាជរដ្ឋាភិបាលកម្ពុជា ដោយបានទាមទារឲ្យរដ្ឋាភិបាលថៃចេញសងជាតម្លៃបណ្តោះអាសន្ននូវទឹកប្រាក់ប្រមាណ ៩លាន២សែនដុល្លារសហរដ្ឋអាមេរិកសម្រាប់ទូទាត់ការខូចខាតផ្ទះសម្បែងទ្រព្យសម្បត្តិថ្លៃព្យាបាលផ្នែកសុខភាពនិងសងជំងឺចិត្តដល់ជនរងគ្រោះ។
មន្ត្រីនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានហៅការទាមទាររបស់លោក មឿង សុន នោះថា គ្រាន់តែជាឧត្តមគតិមួយរបស់ពលរដ្ឋខ្មែរដែលចូលរួមថែទាំប្រទេសជាតិជាមួយនឹងការឈឺឆ្អាលបញ្ហាប៉ុណ្ណោះ ប៉ុន្តែរដ្ឋាភិបាលបានធ្វើការងារនេះមុនអង្គការក្រៅរដ្ឋាភិបាលទៅទៀតហើយរហូតមកដល់ពេលនេះខាងការងារផ្លូវទូតមិនទាន់មានការឆ្លើយតបយ៉ាងណានៅឡើយទេ។
លោក ផៃ ស៊ីផាន ថ្លែងយ៉ាងដូច្នេះថា ៖ «រាជរដ្ឋាភិបាលធ្វើតាំងពីមុនពេលគាត់ទៅដល់ប្រាសាទព្រះវិហារទៀត យើងធ្វើទៅតាមការងារទូតដើម្បីឲ្យគេពន្យល់»។
មន្ត្រីស្ថានទូតថៃប្រចាំកម្ពុជានិងមន្ត្រីក្រសួងការបរទេសខ្មែរមិនអាចទំនាក់ទំនងសុំការអធិប្បាយបានឡើយនៅថ្ងៃដដែលនេះ។
សូមរំឭកថា តាមការបញ្ជាក់ពីមន្ត្រីយោធាខ្មែរឲ្យដឹងថា ក្នុងការប៉ះប្រយុទ្ធគ្នារវាងទាហានខ្មែរ-ថៃដោយសារជម្លោះព្រំដែននៅជិតប្រាសាទព្រះវិហារកាលពីថ្ងៃទី៣ ខែមេសាកន្លងមក ទាហានថៃបានបាញ់គ្រាប់ផ្លោងចូលភូមិខ្មែរខាងក្រោមប្រាសាទព្រះវិហារបណ្តាលឲ្យឆេះផ្សារនិងផ្ទះប្រជាពលរដ្ឋខ្មែរជាង ២៥០ខ្នងនិងបំផ្លាញទ្រព្យសម្បត្តិជាច្រើនទៀត៕