ប្រធានគណបក្សសិទ្ធិមនុស្ស លោក កឹម សុខា មានប្រសាសន៍ថា ការបដិសេធរបស់ថៃបានបង្ហាញថាពួកគេកំពុងមើលងាយដល់រដ្ឋាភិបាលខ្មែរនិងប្រជាពលរដ្ឋខ្មែរ។ លោកបន្តថា នេះមកពីរដ្ឋាភិបាលខ្មែរមិនព្រមអនុវត្តតាមច្បាប់អន្តរជាតិ។
លោក កឹម សុខា បានបញ្ជាក់ថា ៖ «ដីហ្នឹងជារបស់ខ្មែរហើយក៏ដោយ កំពុងមានជម្លោះក៏ដោយ ប៉ុន្តែការដែលធ្វើឲ្យប៉ះពាល់ដល់អាយុជីវិតនិងទ្រព្យសម្បត្តិរបស់ប្រជាពលរដ្ឋខ្មែរ ថៃត្រូវតែសង»។
ប្រធានគណបក្សសមរង្ស៊ី លោក សម រង្ស៊ី មានប្រតិកម្មថា ដល់ពេលវេលាដែលម្ពុជាត្រូវតែប្តឹងទៅអង្គការសហប្រជាជាតិនិងសហគមន៍អន្តរជាតិ ស្នើសុំឲ្យគេកោះប្រជុំប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស ឆ្នាំ១៩៩១។
លោកបន្តទៀតដូច្នេះ ៖ «ពីព្រោះប្រទេសជាហត្ថលេខីទាំងអស់គឺមានមហាអំណាចធំៗទាំងអស់ មានប្រទេសជិតខាងទាំងអស់ បានធានាថានឹងគោរពបូរណភាពទឹកដីប្រទេសកម្ពុជា។ ឥឡូវបូរណភាពទឹកដីប្រទេសកម្ពុជាត្រូវគេរំលោភ ដូច្នេះប្រទេសទាំងអស់ដែលបានសន្យាថានឹងជួយការពារបូរណភាពទឹកដីប្រទេសកម្ពុជា ដល់ពេលហើយ សូមអញ្ជើញមកជួយការពារឲ្យមែនទែន»។
ប្រធានអង្គការមូលនិធិទ្រទ្រង់អរិយធម៍ខ្មែរ លោក មឿង សុន មានប្រសាសន៍ថា សេចក្តីប្រកាសរបស់មន្ត្រីក្រសួងការបរទេសថៃនេះគឺបង្ហាញពីការឈ្លានពានមកលើកម្ពុជាពិតប្រាកដ មិនតែប៉ុណ្ណោះថៃបានរំលោភលើសន្ធិសញ្ញាអន្តរជាតិបួនចំណុចផ្សេងទៀត។
លោក មឿង សុន បានមានប្រសាសន៍ថា ៖ «គាត់ប្រើអំពើហិង្សាយកកងទ័ពបាញ់បំផ្លាញទ្រព្យសម្បត្តិរបស់ប្រជាពលរដ្ឋ ហ្នឹងជាកំហុសមួយដ៏ធ្ងន់ធ្ងរ អង្គការយើងមិនអនុគ្រោះទេ ហើយយើងនឹងបន្តការងារក្នុងសិទ្ធិប្រជាពលរដ្ឋ ក្នុងសិទ្ធិជាអង្គការសង្គមស៊ីវិល រួមសាមគ្គីជាមួយរាជរដ្ឋាភិបាល យើងនឹងអំពាវនាវពិភពលោកទៀត»។
ប្រធានអង្គសិទ្ធិមនុស្ស លីកាដូ អ្នកស្រី ពុង ឈីវកេក បានបញ្ចេញទស្សនៈថា នេះជាចេតនារបស់ថៃមិនគោរពកិច្ចព្រមព្រៀងទីក្រុងប៉ារីស។
នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា លោក សុខ សំអឿន បានលើកឡើងថា ទោះដីនៅមុខជណ្តើរប្រាសាទព្រះវិហារជាដីអ្នកណាក៏ដោយ ប៉ុន្តែការខូចខាតទ្រព្យសម្បត្តិប្រជាពលរដ្ឋខ្មែរដោយសារទាហានថៃ ដូច្នេះភាគីថៃត្រូវតែទទួលខុសត្រូវលើការខូចខាតទាំងស្រុង។
អនុប្រធានរាជបណ្ឌិតសភាកម្ពុជា លោក រស់ ចន្ទត្រាបុត្រ មានប្រសាសន៍ថា នេះជាមហិច្ឆិតារបស់ថៃតាំងពីយូរមកដោយពួកគេមិនដែលទទួលស្គាល់អ្វីដែលជាការពិតនៅក្នុងប្រវត្តិសាស្ត្រឡើយ ហើយការបំផ្លាញកាលពីថ្ងៃទី៣ មេសានោះ គឺជាការគ្រោងទុករបស់ថៃដែលមានចេតនាចង់បំផ្លាញខ្មែរយ៉ាងជាក់ច្បាស់។
លោក រស់ ចន្ទត្រាបុត្រ បានឲ្យដឹងថា ៖ «បាញ់បំផ្លាញផ្សាររបស់ខ្មែរ នៅជើងប្រាសាទព្រះវិហារនេះ មិនមែនជាការមួយដែលបាញ់ដោយចៃដន្យឬធ្លាក់គ្រាប់ដោយចៃដន្យទេ គឺសៀមចង់ធ្វើដូចម្ដេចបំបាត់កុំឲ្យមានវត្តមានរបស់បងប្អូនខ្មែរយើងជាជនជាតិស៊ីវិលនៅតាមជើងភ្នំព្រះវិហារ ដើម្បីខ្លួនអាចនឹងបំពាននិងរំលោភមកលើអធិបតេយ្យភាពរបស់កម្ពុជា។ ដូច្នេះការដែលសៀមបាញ់មកលើផ្សាររបស់ខ្មែរនេះសុទ្ធតែជាការគ្រោងទុកមក សុទ្ធតែជាការគិតគូរតាមកាំភ្លើង ការវាស់ ការរៀបចំទាំងអស់ដើម្បីបំផ្លាញ។ ដូច្នេះខ្ញុំឃើញថា នេះជាលក្ខណៈមួយ ហើយថាជាចេតនាស្មោគគ្រោកមួយដែលមិនសមហេតុសមផលរបស់ប្រទេសសៀមមកលើកម្ពុជា»។
ប្រតិកម្មទាំងនេះបានធ្វើឡើងបន្ទាប់ពីប្រទេសថៃកាលពីថ្ងៃទី១២ ឧសភា បានបដិសេធមិនព្រមសងនូវសំណងជាង២លានដុល្លារសហរដ្ឋអាមេរិកមកកម្ពុជា នៅគ្រាដែលក្រសួងការបរទេសខ្មែរបានផ្ញើលិខិតផ្លូវការមួយទាមទារឲ្យថៃទទួលខុសត្រូវចំពោះការបំផ្លិចបំផ្លាញទាំងស្រុងនៅតំបន់ប្រាសាទព្រះវិហារដែលមានការប៉ះទង្គិចគ្នានាថ្ងៃ៣ មេសាកន្លងមក។
អ្នកនាំពាក្យក្រសួងការបរទេសថៃ លោក ថារិទ្ធចារ៉ុងវ៉ាត ដែលត្រូវបានស្រង់សម្ដីដោយកាសែតឈ្មោះ The Nation បាននិយាយអះអាងថា ប្រជាជនកម្ពុជាដែលរស់នៅនិងធ្វើការក្បែរតំបន់ប្រាសាទព្រះវិហារនោះគឺបានរស់នៅលើទឹកដីថៃដោយខុសច្បាប់ ហើយថៃបានយោគយល់នៅក្នុងនាមរក្សាទំនាក់ទំនងប្រទេសជិតខាងនិងការយល់យោគចំពោះហេតុផលមនុស្សធម៌។
ទោះជាយ៉ាងនេះក្តីអ្នកនាំពាក្យក្រសួងការបរទេស លោក កុយ គួង បានអះអាងថា កម្ពុជាមិនទាន់មានប្រតិកម្មផ្លូវការណាមួយពីរដ្ឋាភិបាលថៃនៅឡើយទេរហូតមកដល់ថ្ងៃទី១៤ ឧសភានេះ។
អ្នកនាំពាក្យក្រសួងការបរទេសខ្មែររូបនេះក៏មិនបកស្រាយបន្ថែមទៀតដែរថា តើជំហររបស់រដ្ឋាភិបាលខ្មែរនឹងធ្វើយ៉ាងណាទៀតបើសិនជាមានការឆ្លើយជាផ្លូវការរបស់ថៃថាមិនព្រមសងការខូចខាតមកកម្ពុជាមែននោះ។
សូមជម្រាបថា របាយការណ៍របស់ក្រសួងការបរទេសខ្មែរស្តីអំពីការប៉ះទង្គិចកាលពីថ្ងៃទី៣ មេសាកន្លងទៅ បានបញ្ជាក់ថា ភាគីថៃបានបាញ់ផ្លោងដោយប្រើកាំភ្លើងធុនធំ ហើយបានបំផ្លិចបំផ្លាញតូបលក់ដូររបស់ប្រជាជនខ្មែរចំនួន២៦៤តូប និងបានបណ្ដាលឲ្យប្រជាពលរដ្ឋខ្មែរនៅតំបន់នោះជាង៣០០គ្រួសារបាត់បង់ទីជម្រក។
បន្ទាប់ពីការប៉ះទង្គិចនេះភ្លាម មន្រ្តីអង្គការសង្គមស៊ីវិលខ្មែរចំនួន១៨អង្គការបានរួមគ្នាជំរុញឲ្យរដ្ឋាភិបាលខ្មែរដាក់ពាក្យបណ្តឹងទៅអង្គការសហប្រជាជាតិ ដោយចាត់ទុកថានេះជាទង្វើឈ្លានពានទាំងស្រុង និងបានទាមទារឲ្យខាងតែបាននូវសំណងរបស់ថៃមកដល់ពលរដ្ឋខ្មែរ។
រហូតមកដល់ថ្ងៃអង្គារកន្លងទៅ លិខិតរដ្ឋាភិបាលខ្មែរទាមទារជាផ្លូវការត្រូវបានប្រកាស ដោយឲ្យថៃសងថ្លៃខូចខាតសរុប ២.១៥០.៥០០ដុល្លារសហរដ្ឋអាមេរិក។ មកដល់ពេលនេះទាំងសង្គមស៊ីវិលនិងរដ្ឋាភិបាលខ្មែរកំពុងរង់ចាំមើលលិខិតបដិសេធផ្លូវការរបស់ថៃ៕