សេចក្ដីថ្លែងការណ៍រួមរបស់សមាគម និងអង្គការមិនមែនរដ្ឋាភិបាលចំពោះសេចក្ដីព្រាងលើកទី២ នៃច្បាប់ ស្ដីពីសមាគម និងអង្គការមិនមែនរដ្ឋាភិបាល បានគូសបញ្ជាក់ថា មានការបារម្ភធំៗចំនួន៣ នៅក្នុងសេចក្ដីព្រាងច្បាប់លើកទី២នោះ គឺទី១ ការចុះបញ្ជីត្រូវធ្វើឡើងជាកាតព្វកិច្ច និងមានភាពស្មុគស្មាញ មិនមែនដោយស្ម័គ្រចិត្ត និងមិនមានភាពងាយស្រួល។ ទី២ ពុំមានដំណើរការប្ដឹងឧទ្ធរណ៍សម្រាប់ការបដិសេធលើការចុះបញ្ជី និងទី៣ ពុំមានការកំណត់និយមន័យលើវាក្យសព្ទសំខាន់ៗនៅក្នុងច្បាប់ និងផ្នែកជាច្រើនមានភាពមិនច្បាស់លាស់។
សេចក្ដីថ្លែងការណ៍រួមរបស់សមាគម និងអង្គការមិនមែនរដ្ឋាភិបាល បានប្រកាសឲ្យដឹងថា ពួកគេត្រៀមខ្លួនរួចជាស្រេចក្នុងគោលបំណងប្រើប្រាស់សិទ្ធិប្រជាធិបតេយ្យ ដើម្បីសម្ដែងនូវការមិនពេញចិត្តរបស់គេទៅតាមរយៈមធ្យោបាយប្រជាធិបតេយ្យ និងមធ្យោបាយប្រកបដោយសន្តិភាពដទៃទៀត។
លោក នុត សាអាន រដ្ឋលេខាធិការក្រសួងមហាផ្ទៃ បានមានប្រសាសន៍នៅថ្ងៃទី១២ មេសា ថា លោកបានទទួលសេចក្ដីថ្លែងការណ៍នោះហើយ ហើយក្រុមការងាររបស់លោកកំពុងតែស្រង់យកចំណុចទាមទាររបស់សមាគម និងអង្គការមិនមែនរដ្ឋាភិបាលទាំងនោះ ដើម្បីជម្រាបជូនទៅថ្នាក់លើរបស់លោក គឺលោកឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ស ខេង ដើម្បីមានយោបល់សម្រេចចំពោះការទាមទារនោះ។
លោក នុត សាអាន មានប្រសាសន៍បន្តថា ៖ «ខ្ញុំកំពុងពិនិត្យមើលអ្វីដែលអង្គការទាំងអស់នឹងលើកឡើង ហើយនិងរៀបចំកែសម្រួលទៅតាមអ្វីដែលអស់លោកទាំងអស់នោះ គាត់បានលើក ហើយយកយោបល់នេះទៅឆ្លងឯកឧត្ដម ឧបនាយករដ្ឋមន្រ្តី និងជារដ្ឋមន្ត្រីក្រសួងមហាផ្ទៃ តើគាត់យល់យ៉ាងម៉េច»។
សូមជម្រាបថា សេចក្ដីព្រាងច្បាប់សមាគម និងអង្គការមិនមែនរដ្ឋាភិបាលមាន ១១ជំពូក និង ៥៨មាត្រា។ មកទល់ពេលនេះ មានកិច្ចប្រជុំរវាងតំណាងអង្គការមិនមែនរដ្ឋាភិបាល និងក្រសួងពាក់ព័ន្ធនានារបស់រដ្ឋាភិបាលចំនួន ៣លើកហើយ ដើម្បីពិនិត្យ និងកែសេចក្ដីព្រាងច្បាប់នេះ៕