ការបដិសេធនោះ គឺនៅក្រោយពេលដែលរដ្ឋមន្រ្តីក្រសួងការបរទេសថៃ លោក កាស៊ិត ភីរម្យ (Kasit Piromya) បានធ្វើអត្ថាធិប្បាយកាលពីថៃ្ងអង្គារ៍ថ្មីៗនេះថា បើសិនណាប្រទេសកម្ពុជាមិនព្រមផ្តាច់ទំនាក់ទំនងជាមួយលោក ថាក់ស៊ីន ស៊ីណាវ៉ាត់ (Thaksin Shinawatra) ទេនោះ វាពិបាកធ្វើឲ្យល្អប្រសើរទ្បើងនូវទំនាក់ទំនងរវាងកម្ពុជានិងថៃ។
សេចក្តីរាយការណ៍នានាបានដកស្រង់សម្ដីរបស់លោក កាស៊ិត ភីរម្យ និយាយទៀតថា វត្តកែវសិក្ខាគិរីស្វៈរៈ នៅក្បែរប្រាសាទព្រះវិហារនោះបានសង់នៅក្នុងទឹកដីថៃ។
លោក ហោ ណាំហុង ជាឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសកម្ពុជា ដែលបានដឹកនាំគណៈប្រតិភូមួយក្រុមទៅចូលរួមនៅក្នុងកិច្ចប្រជុំនោះ បានមានប្រសាសន៍នៅក្នុងសន្និសីទកាសែតខ្លីមួយនៅឯអាកាសយាន្តដ្ឋានអន្តរជាតិភ្នំពេញ នៅថៃ្ងពុធ ទី១៣ ខែមករានេះថា ៖ «មិនមានកម្មវិធីជួបផ្ទាល់ជាមួយលោក កាស៊ិត ភីរម្យ រដ្ឋមន្រ្តីការបរទេសថៃទេ បើជួប ជួបក្នុងពេលប្រជុំក្នុងក្របខ័ណ្ឌអាស៊ានតាមធម្មតា។ សូមជម្រាបថា បញ្ហាកម្ពុជានិងថៃនេះ មិនមែនជាបញ្ហាតែងតាំង ថាក់ស៊ីន ទេ បញ្ហាកម្ពុជាថៃ គឺដោយសារថៃមកឈ្លានពានកម្ពុជា៣ដង គឺនៅខែ៧ ឆ្នាំ២០០៨ ម្ដង ខែ១០ ២០០៨ ម្ដង និងខែ៤ ២០០៩ ម្ដង»។
មន្រ្តីការបរទេសនៃប្រទេសសមាជិកអាស៊ាន នៅក្នុងនោះមានប្រទេសកម្ពុជានិងថៃផង នឹងជួបប្រជុំគ្នានៅក្នុងកិច្ចប្រជុំអាស៊ានថ្នាក់រដ្ឋមន្រ្តីការបរទេសនៅក្នុងទីក្រុងដាណាង ប្រទេសវៀតណាម រយៈពេល២ថៃ្ង ចាប់ពីថៃ្ងទី១៣ ដល់ថៃ្ងទី១៤ ខែមករានេះ។
លោក យឹម សុវណ្ណ ជាមន្រ្តីអ្នកនាំពាក្យនិងជាតំណាងរាស្រ្តនៃគណបក្សសមរង្ស៊ី បានមានប្រសាសន៍អត្ថាធិប្បាយថា ការមិនព្រមជួបចរចាគ្នានោះ មានន័យថា បញ្ហានឹងអូសបន្លាយយូរទៀត។
លោក យឹម សុវណ្ណ មានប្រសាសន៍ទៀតថា ៖ «ប៉ុន្តែទោះយ៉ាងណាក៏ដោយ យើងចៀសវាងការបង្កឲ្យមានសង្រ្គាមនៅក្នុងករណីដែលអាចចៀសវាងបាន យើងខិតខំអត់ធ្មត់ដើម្បីចៀសវាង»។
ទំនាក់ទំនងរវាងកម្ពុជានិងថៃ គេបានកត់សម្គាល់ឃើញថា បានចាប់ផ្តើមតានតឹងនិងរង្គោះរង្គើតាំងពីខែកក្កដា ឆ្នាំ២០០៨មក ក្រោយពីប្រសាទព្រះវិហាររបស់កម្ពុជា ត្រូវបានអង្គការ UNESCO បានទទួលស្គាល់នៅក្នុងបញ្ជីសម្បត្តិបេតិភណ្ឌពិភពលោក កាលពីថៃ្ងទី៧ ខែកក្កដា ២០០៨ នៅក្នុងទីក្រុងកេបិច ប្រទេសកាណាដា ដែលបានញ៉ាំងឲ្យទាហានថៃ បានចូលមកឈ្លានពានទឹកដីកម្ពុជាចំនួន៣លើក នៅតំបន់ប្រសាទព្រះវិហារនិងតំបន់មួយចំនួនទៀត។
ក្រោយមកទំនាក់ទំនងការទូតរវាងប្រទេសទាំងពីរបានធ្លាក់ចុះមួយកម្រិតទៀត ក្រោយពីប្រទេសកម្ពុជាបានតែងតាំងលោក ថាក់ស៊ីន ស៊ីណាវ៉ាត់ អតីតនាយករដ្ឋមន្រ្តីថៃ ឲ្យក្លាយជាទីប្រឹក្សាសេដ្ឋកិច្ចរបស់រដ្ឋាភិបាលកម្ពុជា និងជាទីប្រឹក្សាផ្ទាល់លោកនាយករដ្ឋមន្រ្តី ហ៊ុន សែន កាលពីខែវិច្ឆិកា ឆ្នាំ២០០៩កន្លងទៅនេះ៕