តំណាងរាស្រ្ដបក្សប្រឆាំងនឹងដាក់ពាក្យទៅរដ្ឋសភាទាក់ទងនឹងការថ្លែងរបស់នាយករដ្ឋមន្រ្តីនៅឯខេត្តកំពត
ដោយ សាន សុវិទ្យ
2009-04-06
អ្នកតំណាងរាស្រ្តស្រ្តីនៃខែត្រកំពត របស់គណបក្សសមរង្ស៊ី រួមជាមួយនឹងអ្នកតំណាងរាស្រ្តនៃគណបក្សប្រឆាំងទាំងអស់ នឹងដាក់ពាក្យទាមទារទៅស្ថាប័នរដ្ឋសភានៃព្រះរាជាណាចក្រកម្ពុជា នៅថ្ងៃច័ន្ទនេះ ដើម្បីទាមទារឲ្យលោកនាយករដ្ឋមន្រ្តី ហ៊ុន សែន ធ្វើសេចក្តីពន្យល់ប្រកបដោយភស្តុតាងច្បាស់លាស់ អំពីសេចក្តីថ្លែងរបស់លោក នៅខែត្រកំពត កាលពីថ្ងៃសៅរ៍ កន្លងទៅនេះ។
លោកស្រី មួរ សុខហួរ អគ្គលេខាធិការរងនៃគណបក្សសមរង្ស៊ី។
អ្នកតំណាងរាស្រ្តស្រ្តី មូរ សុខហួរ នៃខែត្រកំពត បានប្រាប់វិទ្យុអាស៊ីសេរី ថា ក្រៅពីការទាមទារឲ្យលោកនាយករដ្ឋមន្រ្តី ហ៊ុន សែន ពន្យល់ពីហេតុផលក្នុងសេចក្តីថ្លែងរបស់លោកនោះ អ្នកតំណាងរាស្រ្តរូបនេះនឹងដាក់ពាក្យប្តឹងសារទុក្ខ ទៅកាន់គណៈកម្មការការពារសិទ្ធិអ្នកតំណាងរាស្រ្តរបស់អង្គការអន្តរសភា ដែលជាអង្គការពិភពលោកដោះស្រាយបញ្ហាចម្រូងចម្រាស ក្នុងស្ថាប័ននីតិបញ្ញត្តិពិភពលោកផងដែរ។
លោកស្រី មូរ សុខហួរ បានប្រាប់ឲ្យដឹងដូច្នេះ ៖ «ដើម្បីខ្ញុំបំពេញតួនាទីខ្ញុំដែលមានចែងនៅក្នុងរដ្ឋធម្មនុញ្ញក្នុងនាមជាអ្នកតំណាងរាស្រ្ដនេះ ខ្ញុំនិងគណបក្សប្រឆាំងនឹងសូមឲ្យសម្ដេចនាយករដ្ឋមន្រ្តី ផ្ដល់នូវការពន្យល់ដោយយកភស្តុតាងដែលលោកបានមានប្រសាសន៍ឲ្យបានពិតប្រាកដ ពីព្រោះប្រសាសន៍របស់សម្ដេចនាយករដ្ឋមន្រ្តីជាប្រសាសន៍សាធារណៈ ហើយជាប្រសាសន៍តំណាងនៃរដ្ឋាភិបាលទាំងមូល មិនមែនជាការនិយាយលេងសើចទេ»។
សូមជម្រាបថាកាលពីថ្ងៃសៅរ៍ ទី៤ មេសា នេះ លោកនាយករដ្ឋមន្រ្តី ហ៊ុន សែន បានរិះគន់គណបក្សប្រឆាំង ដែលតាមប្រសាសន៍របស់លោកបានរិះគន់អ្នកតំណាងរាស្រ្តស្ត្រី ដោយមិនចេញឈ្មោះ ដោយបានលើកឧទាហរណ៍ទាក់ទងនឹងទំនាស់ក្នុងពេលបោះឆ្នោតកន្លងទៅផង។
លោកនាយករដ្ឋមន្រ្តី ហ៊ុន សែន មានប្រសាសន៍ដូច្នេះ ៖ «ពួកបក្សប្រឆាំងគ្មានអ្វីក្រៅតែពីការយកប្រជាជនធ្វើជាឧបករណ៍ដើម្បីវាយរដ្ឋាភិបាលទេ ហើយនៅកំពតហ្នឹងមានជើងខ្លាំងមួយជាស្រ្ដី ខ្ញុំមិនចាំបាច់ចេញឈ្មោះទេ ព្រោះស្ត្រីក៏មានស្រ្តី សោម គឹមសួរ អីអ៊ីចឹងដែរ ជើងខ្លាំងហើយ។ ហើយខ្លាំងហ្នឹងមិនមែនខ្លាំងខាងធ្វើអីទេ ខ្លាំងខាងរករឿង បង្ករឿងជាប់ ញុះញង់ បង្កហេតុ សូម្បីតែឃោសនាបោះឆ្នោតទៅឱបគេសោះ ថាគេប្រឡេះឡេវអាវ។ ឆ្ងល់អស់ប៉ុណ្ណេះទៅទៀត។ ទៅឡាំប៉ាប្ដឹងផ្ដល់គ្នាពូកែណាស់។ ប្រជុំគេមិនហៅក៏ចូលដែរ។ ថ្ងៃណាមួយ ខ្ញុំត្រូវចេញមកវិញបានដឹងថាទៅដោយគេមិនហៅក៏ទៅដែរ។ អានេះបានគេហៅថាពួកប្រឆាំងមុខក្រាស កាប់ ១០០តាំងតោក៏មិនមុតដែរ មិនថាស្រីមិនថាប្រុសទេដូចគ្នា ហើយមេម៉េចកូនអ៊ីចឹង»។
អ្នកតំណាងរាស្រ្តស្រ្តីរូបនេះ បានចោទប្រកាន់លោកនាយករដ្ឋមន្រ្តី ហ៊ុន សែន ថា ការប្រើពាក្យសម្តីបែបនេះ គឺជាការមើលងាយដល់ស្រ្តីខ្មែរគ្រប់រូប ហើយនិងជាបទបរិហារកេរ្ដិ៍ដ៏គួរឲ្យអាម៉ាស់ទៀតផង។
ទោះបីយ៉ាងណាក្តី អ្នកតំណាងរាស្រ្ត មូរ សុខហួរ បានឲ្យដឹងថា អ្នកស្រីនៅរង់ចាំមើលការដោះស្រាយដែលអាចទទួលយកបានពីស្ថាប័នកំពូលរបស់ជាតិជាមុនសិន មុននឹងនាំករណីមួយនេះឡើងកាន់តុលាការយុត្តិធម៌៕
អត្ថបទដែលទាក់ទង
ខ្មែរនៅស.រ.អា.ប្រារព្ធខួបទី៤០នៃថ្ងៃ១៨ មីនា ១៩៧០
មន្ត្រីខ្មែរបដិសេធព័ត៌មានថាថាក់ស៊ីននៅកម្ពុជា
ហ៊ុនសែន៖ ការចំណាយលើបុគ្គលិកមន្ត្រីរាជការច្រើនហួសកំណត់
នាយករដ្ឋមន្ត្រីថៃច្រានចោលសំណើរបស់ក្រុមបាតុករអាវក្រហម
កម្ពុជាលាវពង្រឹងកិច្ចសហប្រតិបត្តិការបង្រ្កាបបទល្មើសឆ្លងដែន
រដ្ឋាភិបាលចោទអ.ស.ប.ថាជ្រៀតជ្រែកកិច្ចការផ្ទៃក្នុងរបស់កម្ពុជា
បក្សសិទ្ធិមនុស្សស្នើឲ្យអ្នកនយោបាយយកប្រយោជន៍ជាតិជាធំ
សភាបើកកិច្ចប្រជុំពិភាក្សាលើសេចក្តីព្រាងច្បាប់ប្រឆាំងអំពើពុករលួយ
ទស្សនៈជុំវិញការបើកឲ្យក្រុមហ៊ុនឯកជនចងសម្ព័ន្ធភាពជាមួយទ័ព
មេធាវីដាក់ពាក្យសុំពន្យារពេលនៃការចូលមកបំភ្លឺរបស់សមរង្ស៊ី
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.