មន្ត្រីរដ្ឋាភិបាល និងមន្ត្រីអង្គការក្រៅរដ្ឋាភិបាលមួយចំនួនដែលកំពុងតែធ្វើកិច្ចការក្នុងគោលដៅកាត់បន្ថយគ្រោះថ្នាក់ចរាចរណ៍ បានឲ្យដឹងថា ចំនួនអ្នកស្លាប់ក្នុងគ្រោះថ្នាក់ចរាចរណ៍នៅកម្ពុជា បានកើនឡើងគួរឲ្យព្រួយបារម្ភ។
ការថ្លែងយ៉ាងដូច្នេះត្រូវបានធ្វើឡើងនៅក្នុងសិក្ខាសាលាមួយស្ដីពីការរៀបចំយុទ្ធនាការអប់រំផ្សព្វផ្សាយជាសាធារណៈលើបញ្ហាសុវត្ថិភាពចរាចរណ៍ផ្លូវគោក រយៈពេលពីរថ្ងៃ ចាប់ពីថ្ងៃទី៧ ដល់ថ្ងៃទី៨ ខែមិថុនា ឆ្នាំ២០១១ នៅសណ្ឋាគារហ៊ីម៉ាវ៉ារី នារាជធានីភ្នំពេញ ដែលរៀបចំដោយគណៈកម្មាធិការជាតិសុវត្ថិភាពចរាចារណ៍ផ្លូវគោក អង្គការដៃគូដើម្បីសុវត្ថិភាពចរាចរណ៍សកល អង្គការសុខភាពពិភពលោក និងអង្គការជនពិការអន្ត្រជាតិបែលហ្ស៊ិក (Handicapped International Belgium)។
អគ្គនាយករងនាយកដ្ឋានដឹកជញ្ជូននៃក្រសួងសាធារណការ និងដឹកជញ្ជូន លោក ពៅ ម៉ាលី មានប្រសាសន៍ថា គ្រាន់តែក្នុងរយៈពេលប្រាំខែដំបូងនៃឆ្នាំ២០១១ មនុស្សចំនួន ៨០១នាក់បានស្លាប់ក្នុងគ្រោះថ្នាក់ចរាចរណ៍ចំនួន ២.០០១ករណី នៅទូទាំងប្រទេស។
លោក ពៅ ម៉ាលី បន្ថែមថា ដើម្បីកាត់បន្ថយគ្រោះថ្នាក់ ក្រសួងកំពុងតែធ្វើវិសោធនកម្មច្បាប់ចរាចរណ៍លើមាត្រាជាច្រើន រួមទាំងមាត្រាដែលតម្រូវឲ្យអ្នកដំណើរក្នុងរថយន្តទាំងអស់ពាក់ខ្សែក្រវាត់សុវត្ថិភាព ហើយនិងបង្កើនការផាកពិន័យចំពោះអ្នកល្មើសច្បាប់។
នាយរងការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ លោកវរសេនីយ៍ត្រី ចេវ ហាក់ ថ្លែងថា ក្នុងរយៈពេលប្រាំខែដើមឆ្នាំ២០១១ មានគ្រោះថ្នាក់ចរាចរណ៍ចំនួន ២១២ករណីកើតឡើងនៅរាជធានីភ្នំពេញ ដែលបណ្ដាលឲ្យមនុស្ស ៩៣នាក់ស្លាប់ ២២៣នាក់របួសធ្ងន់ និង ១១៣នាក់របួសស្រាល។ លោក ចេវ ហាក់បញ្ជាក់ថា ចំនួនអ្នកស្លាប់កើនឡើងជាងកាលពីឆ្នាំ២០១០។
ទាក់ទិននឹងការគោរពច្បាប់ចរាចរណ៍ ប្រជាពលរដ្ឋជាច្រើនត្អូញត្អែរថា ការអនុវត្តច្បាប់មិនត្រូវបានធ្វើឡើងចំពោះមនុស្សជាទូទៅនោះទេ គឺភាគច្រើនធ្វើបានចំពោះតែប្រជាពលរដ្ឋសាមញ្ញប៉ុណ្ណោះ។
អ្នកបើកបររថយន្តឲ្យក្រុមហ៊ុនមួយនៅភ្នំពេញ លោក ប៉ាក ហន បានធ្វើការកត់សម្គាល់ថា បញ្ហាចរាចរណ៍ច្រើនតែកើតឡើងដោយការមិនគោរពច្បាប់ និងអាទិភាពក្នុងការធ្វើដំណើរ។
អ្នកបើកបររថយន្តម្នាក់ទៀត លោក មាស ឧត្តម ថ្លែងថា លោកមានការលំបាកក្នុងការបើកបរនៅរាជធានីភ្នំពេញ ព្រោះជាញឹកញាប់លោកបានជួបជាមួយមនុស្សមួយចំនួនដែលអាងលុយ និងអំណាច ហើយមិនគោរពច្បាប់។
ឆ្លើយតបចំពោះបញ្ហានេះ លោកវរសេនីយ៍ត្រី ចេវ ហាក់ អះអាងថា មន្ត្រីនគរបាលចរាចរណ៍ក៏មានការលំបាកដែរក្នុងការអនុវត្តច្បាប់ចំពោះអ្នកដែលអាងលើលុយកាក់ បុណ្យសក្តិ ឬឋានៈក្នុងសង្គម។ ទោះយ៉ាងណា លោកថា នឹងបន្តប្រឹងប្រែងចាត់វិធានការពង្រឹងការអនុវត្តច្បាប់ជាបន្តទៀត។
មន្ត្រីសម្របសម្រួលគម្រោងសុវត្ថិភាពចរាចរណ៍នៃអង្គការជនពិការអន្តរជាតិបែលហ្ស៊ិក លោក មាស ចាន់ឌី បញ្ជាក់ថា គោលបំណងសំខាន់បំផុតនៃសិក្ខាសាលាស្ដីពីការរៀបចំយុទ្ធនាការអប់រំផ្សព្វផ្សាយជាសាធារណៈលើបញ្ហាសុវត្ថិភាពចរាចរណ៍ផ្លូវគោកគឺដើម្បីធ្វើឲ្យប្រជាពលរដ្ឋមានការយល់ដឹងអំពីឥរិយាបទដែលមានគ្រោះថ្នាក់។
អង្គការជនពិការអន្តរជាតិបែលហ្ស៊ិក បានចេញសេចក្ដីប្រកាសព័ត៌មានមួយនៅថ្ងៃទី៧ ខែមិថុនា ឆ្នាំ២០១១ ដោយបញ្ជាក់ថា មនុស្សចំនួន ១.៨១៥នាក់បានស្លាប់ ហើយ ៦.៧១៨នាក់បានរងរបួសដោយគ្រោះថ្នាក់ចរាចរណ៍ក្នុងឆ្នាំ២០១០ ធ្វើឲ្យកម្ពុជា ក្លាយជាប្រទេសដែលអត្រាមរណៈក្នុងគ្រោះថ្នាក់ចរាចរណ៍ខ្ពស់មួយនៅតំបន់អាស៊ី។ ក្នុងនោះ អ្នកប្រើប្រាស់ម៉ូតូ យុវជន និងអ្នកថ្មើរជើង គឺជាអ្នកដែលប្រឈមនឹងគ្រោះថ្នាក់ច្រើនជាងគេ។
មូលហេតុចម្បងដែលនាំឲ្យមានគ្រោះថ្នាក់ចរាចរណ៍ គឺដោយសារការបើកបរហួសល្បឿនកំណត់ ការបើកបរក្រោយពេលពិសាជាតិស្រវឹង និងការវ៉ាជែងក្នុងស្ថានភាពគ្រោះថ្នាក់ជាដើម។ គ្រោះថ្នាក់ចរាចរណ៍ធ្វើឲ្យប៉ះពាល់យ៉ាងខ្លាំងដល់សេដ្ឋកិច្ចគ្រួសារ និងសេដ្ឋកិច្ចជាតិ ដោយវាបានធ្វើឲ្យខាតបង់ប្រាក់ចំនួន ២៧៩លានដុល្លារសហរដ្ឋអាមេរិក ក្នុងឆ្នាំ២០១០៕