កម្ពុជា​មិន​ពាក់ព័ន្ធ​នឹង​ការ​ផ្ដល់​ប្រព័ន្ធ​ផ្កាយ​រណប​ឲ្យ​ក្រុម​អាវ​ក្រហម​ថៃ

មេ​ដឹកនាំ​ខ្មែរ​បាន​បដិសេធ​ថា កម្ពុជា​មិន​មាន​ការ​ពាក់ព័ន្ធ​ក្នុង​ការ​ផ្ដល់​ប្រព័ន្ធ​ផ្កាយ​រណប​ឲ្យ​ក្រុម​បាតុករ​ថៃ​អាវ​ក្រហម​ផ្សាយ​ទូរទស្សន៍​នៅ​ក្នុង​ប្រទេស​ថៃ​នោះ​ទេ។

មន្ត្រី​ជាន់​ខ្ពស់​នៃ​រដ្ឋាភិបាល​កម្ពុជា​បាន​ឲ្យ​ដឹង​ថា ប្រមុខ​រដ្ឋាភិបាល​កម្ពុជា លោក ហ៊ុន សែន បាន​បដិសេធ​ប្រាប់​លោក កាស៊ីត ភីរុំយ៉ា (Kasit Piromya) រដ្ឋមន្ត្រី​ក្រសួង​ការ​បរទេស​ថៃ នៅ​ក្នុង​ទីក្រុង​ហាណូយ ប្រទេស​វៀតណាម នៅ​ថ្ងៃ​សុក្រ ទី​៩ មេសា​នេះ ថា កម្ពុជា​មិន​មាន​ការ​ពាក់ព័ន្ធ​ក្នុង​ការ​ផ្ដល់​ប្រព័ន្ធ​ផ្កាយ​រណប​ឲ្យ​ក្រុម​បាតុករ​ថៃ​អាវ​ក្រហម ផ្សាយ​ទូរទស្សន៍​នៅ​ក្នុង​ប្រទេស​ថៃ​នោះ​ទេ។

ការ​បដិសេធ​នេះ​បាន​ធ្វើ​ឡើង​ដោយ​ផ្ទាល់​មាត់ នៅ​ក្នុង​ជំនួប​គ្នា​មួយ​រវាង​លោក​នាយក​រដ្ឋមន្ត្រី ហ៊ុន សែន ជាមួយ​លោក កាស៊ីត ភីរុំយ៉ា រដ្ឋមន្ត្រី​ក្រសួង​ការ​បរទេស​ថៃ នៅ​ក្នុង​ទីក្រុង​ហាណូយ នៅ​ថ្ងៃ​​ទី​៩ ខែ​មេសា​នេះ ក្នុង​ពេល​ទៅ​ចូលរួម​កិច្ច​ប្រជុំ​កំពូល​អាស៊ាន​នៅ​ប្រទេស​វៀតណាម។

លោក​នាយក​រដ្ឋមន្ត្រី ហ៊ុន សែន និង​ប្រតិភូ​ជាន់​ខ្ពស់ បាន​វិល​ត្រឡប់​មក​ប្រទេស​កម្ពុជា​វិញ នៅ​ថ្ងៃ​សុក្រ ទី​៩ មេសា​នេះ ក្រោយ​ពី​បាន​ទៅ​ចូលរួម​ក្នុង​កិច្ច​ប្រជុំ​កំពូល​លើក​ទី​១៦ នៃ​សមាគម​អាស៊ាន នៅ​ក្នុង​ប្រទេស​វៀតណាម។

សេចក្ដី​បដិសេធ​ខាង​លើ​នេះ ក្រោយ​ពី​មាន​សេចក្ដី​រាយ​ការណ៍​មួយ​ចំនួន​ថា ការ​ផ្សាយ​ទូរទស្សន៍​របស់​ក្រុម​បាតុករ​ថៃ​អាវ​ក្រហម​គាំទ្រ លោក ថាក់ស៊ីន ស៊ីណាវ៉ាត់ (Thaksin Shinawatra) អតីត​នាយក​រដ្ឋមន្ត្រី​ថៃ បាន​រង​ការ​កាត់​ផ្ដាច់​នៅ​ថ្ងៃ​សុក្រ​នេះ ដោយ​សង្ស័យ​ថា ប្រទេស​កម្ពុជា​បាន​ផ្ដល់​ប្រព័ន្ធ​ផ្កាយ​រណប​សម្រាប់​ការ​ផ្សាយ​នៃ​ទូរទស្សន៍​នោះ៕