លោកនាយករដ្ឋមន្ត្រី ហ៊ុន សែន នៅឯក្រុងសៀមរាបនោះបានថ្លែងបន្តថា របាយការណ៍ដែលអង្គការ Global Witness ដែលចេញផ្សាយថ្មីៗគឺធ្វើឡើងក្នុងចេតនាប្រឆាំងរដ្ឋាភិបាលកម្ពុជា។
លោកនាយករដ្ឋមន្ត្រីបានបញ្ជាក់ថា ៖ «ពីមុនប្រើអគតិវាដូចស្រាលពេក ទាល់ប្រើពាក្យឆ្កួតលីលាតើអាហ្នឹងវាត្រូវសមជាង។ ដំបូងខ្ញុំចង់ឆ្លើយតបដោយពាក្យអសុរោះបន្តិចទៅចុះ គឺនៅត្រង់ថាពួកឆ្កួតលីលាមួយចំនួនបាននិយាយទៅដល់អំពើពុករលួយដែលចេញមកអំពីប្រេងក្នុងពេលដែលលុយទាំងឡាយនៅក្រោមបាតសមុទ្រ។ តើអស់លោកអាចជឿបានទេថារាជរដ្ឋាភិបាលបានប្រព្រឹត្តអំពើពុករលួយនៅក្នុងពេលដែលមិនទាន់មានលុយ តើនេះជាអ្វី? ជាសកម្មភាពនយោបាយបំផ្លិចបំផ្លាញឬក៏ជាទង្វើរួមយោបល់? ទីចុងបំផុតពួកគេបាត់បង់តម្លៃដោយខ្លួនឯងតាមរយៈការធ្វើសេចក្ដីថ្លែងការណ៍ពាសវាលពាសកាលតាមរបៀបឆ្កួតលីលា នេះជាពាក្យសម្ដីដែលខ្ញុំគួរតែនិយាយថាពួកគេឆ្កួតលីលាហើយ»។
សូមជម្រាបថា នៅក្នុងរបាយការណ៍ដែលដាក់ចំណងជើង "ប្រទេសសម្រាប់លក់" នោះ អង្គការ Global Witness ជាអង្គការការពារសិទ្ធិមនុស្សនិងបរិស្ថានអន្តរជាតិដែលមានមូលដ្ឋាននៅទីក្រុងឡុងដ៍ប្រទេសអង់គ្លេសនិងនៅទីក្រុងវ៉ាស៊ីនតោន សហរដ្ឋអាមេរិក បានអធិប្បាយថា កម្ពុជាសព្វថ្ងៃជាប្រទេសសម្រាប់ពុះជ្រែកលក់ឲ្យបរទេសដោយពួកអ្នកមានអំណាចនៅកម្ពុជាដើម្បីប្រមូលទ្រព្យសម្បត្តិយ៉ាងច្រើនសន្ធឹកសន្ធាប់នោះដាក់ប្រយោជន៍ខ្លួនឯង ដូចជាបានមកពីការកាប់ធនធានព្រៃឈើ ហើយនិងកំពុងច្បាមយកធនធានធម្មជាតិរបស់កម្ពុជាផ្សេងទៀត ដូចជាធនធានជលផល កោះ ឆ្នេរសមុទ្រសម្រាប់ទេសចរណ៍ ធនធានឧស្ម័ន រ៉ែ និងប្រេងកាតជាដើម។
អង្គការ Global Witness សរសេរទៀតថា ក្នុងរយៈពេល១៥ឆ្នាំចុងក្រោយនេះចំនួន៤៥%នៃផ្ទៃដីកម្ពុជា គឺត្រូវអ្នកវិនិយោគទិញដោយមានការសមគំនិតពីអ្នកមានអំណាចខ្មែរ។
ជាមួយគ្នានេះប្រធានបក្សប្រឆាំងគឺលោក សម រង្ស៊ី ក្នុងលិខិតមួយចុះថ្ងៃទី១២ ខែកុម្ភៈ ស្នើឲ្យមានការស៊ើបអង្កេតរាល់ករណីដែលលើកឡើងដោយអង្គការ Global Witness នោះ ហើយរាយការណ៍ជូនមករដ្ឋសភាឲ្យបានឆាប់។
ក៏ប៉ុន្តែលោកនាយករដ្ឋមន្ត្រី ហ៊ុន សែន ថ្លែងច្រានចោលចំពោះរបាយការណ៍របស់អង្គការ Global Witness ខាងលើនេះ ៖ «អគ្គរដ្ឋទូតអង់គ្លេសគាត់នៅហ្នឹង Global Witness អាហ្នឹងមកពីប្រទេសអង់គ្លេស អាហ្នឹងដាក់បណ្ដាសាកម្ពុជាអត់មានថ្ងៃឈប់ទេ រហូតដល់អ្នកនយោបាយឆ្កួតលីលាមួយចំនួននៅកម្ពុជាក៏គេប្រើប្រាស់នូវបញ្ហានេះយកមកប្រឆាំងជាមួយនឹងរាជរដ្ឋាភិបាល»។
លោកនាយករដ្ឋមន្ត្រី ហ៊ុន សែន បានថ្លែងបន្តទៀតថា ៖ «តើអំពើពុករលួយបែបណាទៅបើប្រេងវានៅក្នុងបាតសមុទ្រ សូម្បីតែចំនួនពិតប្រាកដយើងមិនដឹងប៉ុន្មានផង តើអ្នកណាមានលុយពុករលួយ? រ៉ែបុកស៊ីតនៅក្រោមដី រ៉ែដែកនៅក្រោមដីទាំងអស់ តើអ្នកណាអាចប្រព្រឹត្តពុករលួយលើរឿងនេះ? ប៉ុន្តែពេលវេលានេះមិនមែនជាពេលវេលានិយាយពីរឿងចាយលុយទេ និយាយពីរឿងរកលុយ។ ខ្ញុំបានស្នើទាំងខាងធនាគារពិភពលោក ទាំង IMF ទាំង ADB ទាំងអ្នកជំនាញការបរទេសនានាដែលទៅសម្ដែងការកង្វល់ ខ្ញុំស្នើថាសូមជួយខ្ញុំធ្វើម៉េចរកលុយឲ្យបានច្រើន ជួយថាធ្វើម៉េចអាកុងត្រាប្រេងជាមួយក្រុមហ៊ុនបរទេសនានាឲ្យកម្ពុជាទទួលបានផលខ្ពស់បំផុត ជួយបានទេអាហ្នឹង»៕