ចំណែកប្រជាពលរដ្ឋខ្មែរដែលរស់នៅភូមិខាងក្រោមប្រាសាទត្រូវបានទាហានជម្លៀសចេញកាលពីល្ងាចថ្ងៃសុក្រ។
មន្ត្រីគណៈកម្មការព្រំដែនកម្ពុជាបានអះអាងថា គណៈកម្មការព្រំដែនគោកកម្ពុជាថៃនៅតែរក្សាគម្រោងជួបប្រជុំគ្នាដើម្បីស្វែងរកដំណោះស្រាយបញ្ហាជម្លោះព្រំដែននៃប្រទេសទាំងពីរនៅសប្តាហ៍ខាងមុខដដែល បើទោះបីជាមានការប៉ះប្រយុទ្ធគ្នារវាងកងទាហានខ្មែរថៃនៅតំបន់ជម្លោះជិតប្រាសាទព្រះវិហារថ្មីៗក៏ដោយ។
ប្រធានគណៈកម្មការដោះស្រាយបញ្ហាព្រំដែនកម្ពុជា លោក វ៉ា គឹមហុង បានមានប្រសាសន៍កាលពីព្រឹកថ្ងៃសៅរ៍ ទី៤ ខែមេសា ថា រហូតមកដល់ពេលនេះភាគីថៃមិនបានផ្លាស់ប្តូរកាលបរិច្ឆេទនៃគម្រោងជួបប្រជុំគ្នាដែលនឹងប្រព្រឹត្តទៅនៅថ្ងៃច័ន្ទ អង្គារ សប្តាហ៍ក្រោយនោះទេ។
លោក វ៉ា គឹមហុង បានបង្ហាញប្រតិកម្មចំពោះការប៉ះទង្គិចគ្នាដោយអាវុធនៅជិតប្រាសាទព្រះវិហារដែលអះអាងថា ទាហានថៃបានបាញ់បណ្តាលឲ្យប៉ះពាល់ជណ្តើរប្រាសាទនិងឆេះផ្ទះប្រជាពលរដ្ឋថាគឺជាការរំលោភដែលថៃមិនបានគោរពតាមអនុស្សរណៈនៃការយោគយល់គ្នាដែលបានព្រមព្រៀងកាលពីឆ្នាំ២០០២កន្លងមកដោយឲ្យអ្វីៗនៅរក្សាស្ថានភាពដដែល ហើយថានៅក្នុងជំនួបប្រជុំខាងមុខកម្ពុជាមានគម្រោងនឹងទាមទារឲ្យប្រទេសថៃដកកងទ័ពចេញពីតំបន់ជុំវិញប្រាសាទព្រះវិហារ។
លោក វ៉ា គឹមហុង បានបញ្ជាក់ថា ៖ «ធ្វើដើម្បីកុំឲ្យមានការប៉ះទង្គិចគ្នាត្រូវតែរំសាយទ័ពចេញពីកន្លែងហ្នឹង នៅក្នុងវត្ត ជុំវិញវត្ត នៅផ្ទាល់នឹងប្រាសាទព្រះវិហារ។ យើងត្រូវតែរក្សាស្ថានភាពដដែល យើងមិនមែនចេះតែរំលោភលើបូរណភាពគេស្រេចតែចិត្តទេណា៎។ ខ្ញុំជឿថាប្រទេសថៃជាប្រទេសដែលគោរពច្បាប់ រឿងអីបានលោកមិនគោរពច្បាប់ ហើយគាត់បាញ់កន្លែងផ្សារធ្វើឲ្យឆេះផ្សារ ពិសេសប៉ះពាល់នឹងជណ្ដើរធំឡើងប្រាសាទព្រះវិហារយើងទៀតផង»។
ចំណែកនៅឯតំបន់ប៉ះប្រយុទ្ធជិតប្រាសាទព្រះវិហារវិញនៅថ្ងៃសៅរ៍មានសភាពប្រឈមមុខដាក់គ្នាដោយយោធាតឹងតែងនៅឡើយ។
តាមទាហានខ្មែរដែលកំពុងត្រៀមប្រយុទ្ធនៅតំបន់វាលឥន្ទ្រីបានឲ្យដឹងថា កាលពីវេលាម៉ោង១០ព្រឹកថៃបានបញ្ជូនកងកុម្ម៉ងដូជាងមួយរយនាក់ចូលមកជិតតំបន់ប៉ះប្រយុទ្ធ ៖ «កម្លាំងវាឡើងមក ដូរកម្លាំង កុម៉្មង់ដូវាមក មកទាំងព្រឹក»។
ប្រជាពលរដ្ឋខ្មែរជាង២០០គ្រួសារនៅភូមិខាងក្រោមប្រាសាទព្រះវិហារត្រូវបានកងទាហានដឹកជម្លៀសចេញតាមរថយន្តហើយតាំងតែពីម៉ោងជាង៥ល្ងាចថ្ងៃសុក្រ។
ចំណែកនៅឯច្រកជាំសាង៉ាំ ស្រុកអន្លង់វែង ខេត្តឧត្តរមានជ័យ ប៉ូលិសព្រំដែនបានរាយការណ៍ថា កងទ័ពខ្មែរជាច្រើនត្រូវបានបញ្ជូនទៅរាយបណ្តាក់បន្ថែមទៀតនៅស្របពេលដែលវិបត្តិនៅជិតប្រាសាទព្រះវិហារនៅមិនទាន់ធូរស្រាលនេះ។
ប៉ូលិសព្រំដែនដដែលបានឲ្យដឹងថា ៖ «កម្លាំងយើងមកយប់មិញ វាស័ក្តិសមហើយណា៎។ យើងត្រៀមទាំងអស់ ប្រុងប្រៀងរង់ចាំបទបញ្ជាតែប៉ុណ្ណឹងទេ ហើយកម្លាំងវាក៏មានការបន្ថែមដែរណា៎»។
សូមរំឭកថា ការប៉ះប្រយុទ្ធគ្នានៅវាលឥន្ទ្រីចង្កេះភ្នំទ្រព្យនិងមុខប្រាសាទព្រះវិហារកាលពីថ្ងៃសុក្រពុំមានការអះអាងថាទាហានខ្មែរបានរងរបួសនិងស្លាប់ទេ ក៏ប៉ុន្តែការអះអាងក្រៅផ្លូវការពីទាហានខ្មែរថា ទាហានថៃបានស្លាប់ចំនួន២២នាក់និងរបួសជាង៣០នាក់ តែទោះយ៉ាងណាការអះអាងនេះបានផ្ទុយគ្នានឹងមន្ត្រីផ្លូវការរបស់ថៃដែលបានអះអាងកាលពីរសៀលថ្ងៃសុក្រថា ទាហានរបស់ខ្លួនបានស្លាប់២នាក់និងរបួស១០នាក់៕