លោកនាយករដ្ឋមន្ត្រី ហ៊ុន សែន និងប្រតិភូជាន់ខ្ពស់រដ្ឋាភិបាលកម្ពុជា បានវិលត្រឡប់មកដល់ប្រទេសកម្ពុជាវិញហើយ នៅល្ងាចថ្ងៃទី២៦ ខែកញ្ញា។
រដ្ឋលេខាធិការនៃទីស្ដីការគណៈរដ្ឋមន្ត្រី និងជាទីប្រឹក្សារបស់លោកនាយករដ្ឋមន្ត្រី ហ៊ុន សែន គឺលោក ប្រាក់ សុខុន បានមានប្រសាសន៍នៅក្នុងសន្និសីទកាសែត នៅថ្ងៃទី២៦ ខែកញ្ញា នៅឯអាកាសយាន្តដ្ឋាន អន្តរជាតិភ្នំពេញថា មេដឹកនាំប្រទេសកម្ពុជា និងថៃ បានឯកភាពបង្កើតខ្សែទូរស័ព្ទហៅបន្ទាន់មួយ ឬ Hotline ដើម្បីដោះស្រាយបញ្ហានានា ក្នុងស្ថានការណ៍បន្ទាន់ ៖ «ការជៀសវាងការប្រឈម និងការប៉ះទង្គិចដោយកម្លាំងប្រដាប់អាវុធនៅតាមតំបន់ព្រំដែន ហើយធ្វើយ៉ាងណាឲ្យកងទ័ពបង្ហាញនូវភាពអត់ធ្មត់ ហើយរក្សានូវទំនាក់ទំនងល្អ ដែលអង្គភាពជាច្រើនបានកសាងជាមួយគ្នាកន្លងទៅ។ ជៀសវាងនូវទំនាស់ ដែលកើតមាននៅតំបន់ប្រាសាទព្រះវិហារ រីករាលដាលទៅដល់ខ្សែបន្ទាត់ព្រំដែនជាទូទៅ ឬប៉ះពាល់ទៅដល់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរជាទូទៅផងដែរ។»
លោក ប្រាក់ សុខុន បានមានប្រសាសន៍ថា លោកនាយករដ្ឋមន្ត្រី ហ៊ុន សែន ប្រទេសកម្ពុជា និងលោកនាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) បានឯកភាពគ្នានៅក្នុងទីក្រុងញូវយ៉ក សហរដ្ឋអាមេរិកថា ភាគីទាំង២ រក្សាបន្តការចរចាទ្វេភាគីជាបន្តទៀត ក្នុងការដោះស្រាយបញ្ហាព្រំដែនរវាងកម្ពុជា និងថៃ ដោយភាគីកម្ពុជា ព្យួរទុកនូវពាក្យបណ្ដឹងរបស់ខ្លួន ស្ដីអំពីកងទ័ពថៃឈ្លានពានទឹកខ្មែរនៅក្បែរប្រាសាទព្រះវិហារ នៅឯអង្គការសហប្រជាជាតិ និងក្រុមប្រឹក្សាសន្តិសុខរបស់អង្គការសហប្រជាជាតិ។
ប្រទេសកម្ពុជា កាលពីខែសីហាកន្លងទៅ បានផ្ញើលិខិតជាបន្ទាន់មួយ ទៅប្រធានមហាសន្និបាតរបស់អង្គការសហប្រជាជាតិ និងប្រធានក្រុមប្រឹក្សាសន្តិសុខរបស់អង្គការសហប្រជាជាតិ ដើម្បីឲ្យកោះប្រជុំជាបន្ទាន់ ដើម្បីដោះស្រាយវិបត្តិរវាងកម្ពុជា និងថៃ នៅគ្រាដែលមេដឹកនាំថៃបានគំរាមវាយប្រហារកម្ពុជាតាមផ្លូវយោធា។
លោក ប្រាក់ សុខុន បានបញ្ជាក់ថា មេដឹកនាំកម្ពុជា និងថៃ បានឯកភាពគ្នានេះ បានធ្វើឡើងនៅក្នុងជំនួបទល់មុខគ្នារវាងនាយករដ្ឋមន្ត្រីនៃប្រទេសទាំងពីរ នៅក្នុងទីក្រុងញូវយ៉ក សហរដ្ឋអាមេរិក កាលពីពេលថ្មីៗនេះ។
លោកនាយករដ្ឋមន្ត្រី ហ៊ុន សែន ប្រទេសកម្ពុជា និងលោកនាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ មានគម្រោងការជួបចរចាគ្នាចំនួន២លើកជាថ្មីទៀត នៅក្នុងកិច្ចប្រជុំ ASEM ឬអាស៊ី-អឺរ៉ុប ក្នុងទីក្រុងប្រ៊ូសសែល (Brussels) ប្រទេសបែលហ្ស៊ិក (Belgium) ខាងមុខនេះ និងជួបចរចាទ្វេភាគីលើកទីពីរនៅក្នុងកិច្ចប្រជុំកំពូលអាស៊ាន នៅក្នុងទីក្រុងហាណូយ ប្រទេសវៀតណាម នៅចុងខែតុលាខាងមុខនេះ។
តំណាងរាស្ត្រគណបក្សប្រឆាំងសមរង្ស៊ី លោក យឹម សុវណ្ណ និងជាមន្ត្រីអ្នកនាំពាក្យបានមានប្រសាសន៍ប្រតិកម្មថា ៖ «រដ្ឋាភិបាលមិនគួរបន្លាយពេល មិនគួរខ្លាចការចូលរួមរបស់អន្តរជាតិទេ។ ឲ្យមានការចូលរួមពីអន្តរជាតិមក ដើម្បីបញ្ចប់បញ្ហាហ្នឹងឲ្យបានឆាប់។»
មន្ត្រីជាន់ខ្ពស់រដ្ឋាភិបាលកម្ពុជា លោក ប្រាក់ សុខុន បានមានប្រសាសន៍បញ្ជាក់ថា ប្រទេសកម្ពុជានៅតែបន្តតាមដានមើលការសន្យារបស់ភាគីថៃ ដែលថាសភាថៃគ្រោងនឹងផ្ដល់សច្ចាប័ននៅពេលខាងមុខនេះ លើកំណត់ហេតុនៃកិច្ចព្រមព្រៀងនៅក្នុងកិច្ចប្រជុំទ្វេភាគីចំនួន៣លើកកន្លងមក របស់គណៈកម្មាធិការដោះស្រាយបញ្ហាព្រំដែនរវាងប្រទេសទាំងពីរ៕