សេចក្ដីអំពាវនាវនេះ ធ្វើឡើងនៅក្នុងវេទិកាជួបពិភាក្សាគ្នារវាងប្រជាពលរដ្ឋនៅឃុំភ្នំកុក ស្រុកវ៉ឺនសៃ ខេត្តរតនគិរី ជាមួយមន្ត្រីក្រុមប្រឹក្សាឃុំ រៀបចំឡើងដោយអង្គការខុមហ្វ្រែល កាលពីថ្ងៃច័ន្ទ ទី១៩ ខែកក្កដា ឆ្នាំ២០១០ នៅសាលារៀនឃុំភ្នំកុក។
អ្នកភូមិមកពីភូមិកាឡៃសាពូន ឈ្មោះ ប៉ុង ងឺ មានប្រសាសន៍បញ្ជាក់ថា ដីធ្លីដែលអាជ្ញាធរមូលដ្ឋានប្រគល់មកឲ្យអ្នកភូមិមួយគ្រួសារ ៥ហិកតា ជាមួយនឹងការតម្រូវឲ្យអ្នកភូមិបង់វិភាគទានក្បាលដីមួយហិកតា ១៩.០០០រៀលពេលនេះ ត្រូវបានក្រុមហ៊ុនសម្បទានសេដ្ឋកិច្ចនៅតំបន់នោះឈូសឆាយយកដីនេះអស់ហើយ។ ចំណែកការតវ៉ារបស់អ្នកភូមិឲ្យក្រុមអាជ្ញាធរមូលដ្ឋានជួយដោះស្រាយ មិនឃើញបានផលអ្វីឡើយ។
លោក ប៉ុង ងឺ មានប្រសាសន៍ដូច្នេះ ៖ «បង់ក្នុងមួយគ្រួសារ ៥ហិកតា ទាំងដីស្រែទាំងដីចម្ការ តែខ្ញុំបង់ដីចម្ការនោះត្រូវក្រុមហ៊ុនយក។ ខ្ញុំសុំឲ្យជួយដោះស្រាយជាប្រញាប់»។
ដូចគ្នានេះដែរ អ្នកភូមិកាឡៃតាវ៉ង ឈ្មោះ វាំង ប្រលួយ បញ្ជាក់ដែរថា សិទ្ធិរស់នៅរបស់អ្នកភូមិរងការគំរាមកំហែងពីក្រុមប្រដាប់អាវុធបណ្ដេញអ្នកភូមិចេញពីដីធ្លាប់ធ្វើស្រែចម្ការ ដើម្បីយកដីប្រគល់ឲ្យក្រុមហ៊ុនសម្បទាននៅតំបន់នោះ។ ជាមួយនោះដែរ ផលព្រៃឈើដែលអ្នកភូមិធ្លាប់ទទួលផល ដូចជាដើមឈើធ្វើជ័រទឹក ក៏ត្រូវគេកាប់បំផ្លាញយកអស់។
លោក វាំង ប្រលួយ បញ្ជាក់ថា ៖ «មានពួកប៉ូលិស ពួកទាហាន គេចុះមកគំរាមគាត់ គេថា អត់ឲ្យយកទេអាដំណាំដែលដាំរួចហើយក៏ដោយ ហើយពួកប៉ូលិស ពួកទាហានទៅដេញគាត់ រកចាប់គាត់ ទាំងប្រពន្ធ និងកូនគាត់»។
ពុំឃើញមានវត្តមានមន្ត្រីក្រុមប្រឹក្សាឃុំណាម្នាក់ចូលរួមក្នុងវេទិកាជួបជាមួយប្រជាពលរដ្ឋនោះទេ ក៏ប៉ុន្តែសមាជិកក្រុមប្រឹក្សាស្រុកវ៉ឺនសៃ លោក ខាំ ភឿន ដែលបានចូលរួមក្នុងវេទិកានេះ មានប្រសាសន៍ថា លោកមានការសោកស្ដាយដែលមន្ត្រីក្រុមប្រឹក្សាឃុំ មិនបានមកចូលរួមក្នុងវេទិកាជួបជាមួយអ្នកភូមិ។ លោកបន្តថា នឹងលើកយកសំណូមពររបស់អ្នកភូមិដាក់ជូនក្រុមប្រឹក្សាស្រុកដើម្បីជួយចាត់វិធានការ។
លោក ខាំ ភឿន ឲ្យដឹងដូច្នេះ ៖ «ទៅវិញអាចជួយ បំផុសចលនាចាត់ចែងមក។ ជួយដោះស្រាយសំណូមពររបស់ប្រជាជន គឺខ្ញុំធានា»។
អ្នកសម្របសម្រួលអង្គការខុមហ្វ្រែល ខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ថា ការវាយតម្លៃរបស់អ្នកភូមិចំនួន ៧០នាក់ ដែលចូលរួមក្នុងវេទិកាខាងលើ មានអ្នកភូមិ ៧០% មិនពេញចិត្តចំពោះសកម្មភាពដឹកនាំធ្វើការអភិវឌ្ឍរបស់ក្រុមប្រឹក្សាឃុំភ្នំកុក កន្លងទៅនោះទេ។
កាលពីខែកក្កដា ឆ្នាំ២០០៩ អង្គការខុមហ្វ្រែល បានរៀបចំវេទិកាដូចគ្នានេះម្ដងរួចទៅហើយ នៅឃុំភ្នំកុក ដើម្បីសម្របសម្រួលឲ្យប្រជាពលរដ្ឋម្ចាស់ឆ្នោត បានជួបពិភាក្សាបង្ហាញពីទុក្ខកង្វល់ទាក់ទិនបញ្ហាអសកម្មនានា ដែលកើតមានចំពោះអ្នកភូមិឲ្យមន្ត្រីជាប់ឆ្នោតនៅមូលដ្ឋានជួយដោះស្រាយ ក៏ប៉ុន្តែមួយឆ្នាំកន្លងទៅនេះ សំណូមពររបស់អ្នកភូមិមិនត្រូវបានដោះស្រាយឡើយ៕