នៅថ្ងៃព្រហស្បតិ៍នេះមានទាហានថៃ៤នាក់បានព្យាយាមចូលនិងមានទាំងយន្តហោះថៃហោះលើតំបន់ប្រាសាទព្រះវិហារទៀតផង។
លោក សាវយុត រាយការណ៍ព័ត៌មានបន្ថែមពីបញ្ហានេះតាមរយៈការសាកសួររបស់លោក ពៅ ពន្លក ៖
ពៅ ពន្លក ៖ លោក សាវយុត ក្នុងពេលនេះតើមានការផ្លាស់ប្ដូរអ្វីទេទាក់ទងបញ្ហាជម្លោះរវាងខ្មែរនិងថៃនៅជិតប្រាសាទព្រះវិហារនោះ?
សាវយុត ៖ សូមជម្រាបថា ខ្ញុំបានពិនិត្យស្ថានការណ៍ជាច្រើនតំបន់ ចាប់តាំងពីច្រកជប់គគីរក្នុងស្រុកបន្ទាយអំពិល ខេត្តឧត្ដរមានជ័យ ច្រកប្រាសាទតាមាន់ ប្រាសាទតាក្របី ហើយច្រកអូរស្មាច់រហូតមកដល់ច្រកជាំសាង៉ាំនៃស្រុកអន្លង់វែង ខេត្តឧត្ដរមានជ័យ នៅថ្ងៃនេះ សភាពការណ៍ប្រឈមមុខគ្នារវាងកងទាហានខ្មែរនិងកងយោធាថៃពុំមានអ្វីជាធំដុំទេ គឺមានសភាពធម្មតានៅឡើយ។
ពៅ ពន្លក ៖ លោកមានប្រសាសន៍ថា ស្ថានភាពធម្មតានៅឡើយហ្នឹងមានន័យយ៉ាងម៉េច?
សាវយុត ៖ គឺមានន័យថា កងទាហានទាំងសងខាងមានសកម្មភាពប្រឈមមុខដាក់គ្នាតឹងតែងទេ ដោយសារតែកងទាហានថៃនៅឆ្ងាយតំបន់ក្នុងទឹកដីព្រំដែនរបស់គេ ហើយកងទាហានខ្មែរយើងក៏បាននៅក្នុងតំបន់គ្រប់គ្រងរបស់ខ្លួនដោយមិនមានការជ្រៀតចូលពីខាងណា ហើយមានការត្រៀមប្រយុទ្ធជាមួយខាងណាទេ។
ប៉ុន្តែដោយឡែកនៅឯតំបន់ប្រាសាទព្រះវិហារហ្នឹង ខ្ញុំបានទទួលព័ត៌មានកាលពីវេលាម៉ោងប្រមាណជា១២ថ្ងៃត្រង់ហ្នឹង ឮថាមានសំឡេងយន្តហោះប្រតិកម្មដែលហោះនៅជិតៗតំបន់ជម្លោះនៃទឹកដីខេត្តព្រះវិហារ ក៏ប៉ុន្តែគេមិនបានមើលឃើញយន្តហោះហ្នឹងយ៉ាងម៉េចទេ ដោយថាយន្តហោះនោះបានហោះខ្ពស់ ហើយឮតែសំឡេង ក៏ប៉ុន្តែកាលពីវេលាម៉ោង៣រសៀលនោះនៅឯមុខវាលឥន្រ្ទីដែលជាតំបន់ធ្លាប់ប៉ះប្រយុទ្ធនោះ ខ្ញុំបានទទួលសេចក្ដីរាយការណ៍ពីកងយោធាខ្មែរប្រចាំនៅតំបន់ហ្នឹងថា មានមេបញ្ជាការទាហានថៃ៤នាក់បានព្យាយាមចូលមកកាន់តំបន់ជិតខ្សែត្រៀមប្រយុទ្ធសាជាថ្មី ហើយធ្វើឲ្យទាហានខ្មែរនៅគ្រប់ទីកន្លែងទាំងអស់ជុំវិញតំបន់ជម្លោះជិតប្រាសាទព្រះវិហារចាប់តាំងពីលើប្រាសាទ តំបន់នៅមុខប្រាសាទសំបុកឃ្មុំហ្នឹងមានការត្រៀមខ្លួនប្រយុទ្ធ ហើយនាំគ្នាប្រុងប្រៀបជាស្រេច ក៏ប៉ុន្តែស្ថានការណ៍នោះបានស្ងប់ស្ងាត់ទៅវិញនៅពេលដែលមេបញ្ជាការយោធាខ្មែរ ហើយនិងមេបញ្ជាការយោធាថៃ បានសួរបញ្ជាក់អំពីការព្យាយាមចូលមករបស់ទាហានថៃ៤នាក់នៅតំបន់វាលឥន្រ្ទីនោះ។ បន្ទាប់ពីការជជែកមួយម៉ោងក្រោយមកស្ថានការណ៍បានស្ងប់ជាធម្មតាវិញដោយសារតែទាហានថៃទាំង៤នោះបានដកខ្លួនថយទៅវិញហើយ៕