ស្ថានការណ៍នៅច្រកទ្វារអន្តរជាតិប៉ោយប៉ែត
ដោយ សុផល មុន្នី
2009-11-07
ស្ថានការណ៍ទូទៅនៅច្រកទ្វារអន្តរជាតិប៉ោយប៉ែតមានភាពស្ងប់ស្ងាត់នៅថ្ងៃសុក្រ ទី៦ ខែវិច្ឆិកានេះ ខុសពីសព្វដង បន្ទាប់ពីគេសង្កេតឃើញប្រជាជនថៃបាននាំគ្នាសម្រុកចាកចេញពីទឹកដីខ្មែរចូលទៅក្នុងទឹកដីរបស់ខ្លួនវិញតាមស្ពានមិត្តភាពកម្ពុជា-ថៃ ឬហៅថាស្ពានឆ្លងអូរប៉ោយប៉ែត។
ទិដ្ឋភាពនៅលើស្ពានមិត្តភាពកម្ពុជា-ថៃនៃច្រកទ្វារអន្តរជាតិប៉ោយប៉ែត ក្នុងខេត្តបន្ទាយមានជ័យ នាថ្ងៃ៦ វិច្ឆិកា ២០០៩។
ការនាំគ្នាសម្រុកចាកចេញគឺដោយសារជនជាតិថៃទាំងនោះបានទទួលដំណឹងថា ភាគីអាជ្ញាធរថៃបានប្រកាសឲ្យជនជាតិរបស់ខ្លួនត្រឡប់ចូលទៅទឹកដីរបស់ខ្លួន និងក្រោយពីអាជ្ញាធរថៃបានបិទច្រកទ្វារអស់រយៈពេលប្រហែល១៥នាទីនាព្រឹកថ្ងៃសុក្រដដែលនេះ។
ប្រជាជនថៃដែលធ្វើដំណើរត្រឡប់ទៅទឹកដីរបស់ខ្លួនភាគច្រើនបានបដិសេធមិនប្រាប់ពីមូលហេតុនៃការដែលពួកគេចាកចេញពីទឹកដីខ្មែរទេ ក៏ប៉ុន្តែតាមការស្តាប់ ប្រជាជនថៃដែលដើរឆ្លងលើស្ពាននិយាយថា ពួកគេមានការព្រួយបារម្ភពីការបិទច្រកទ្វារ។
ស្ត្រីជនជាតិថៃឈ្មោះ លឿន ផន អាយុ៤១ឆ្នាំ បាននិយាយថា ការចាកចេញរបស់ពលរដ្ឋថៃពីទឹកដីខ្មែរ គឺដោយសារពួកគេមានការព្រួយបារម្ភ។ លឿន ផន បន្តថា អ្នកស្រីចង់ឲ្យស្ថានការណ៍ទូទៅមានភាពល្អប្រសើរឡើងវិញ។
ស្ត្រីជនជាតិថៃឈ្មោះ លឿន ផន បានឲ្យដឹងតាមរយៈអ្នកបកប្រែថា ៖ «ថៃគេមករកស៊ីត្រង់នេះ ខ្មែរគេទៅរកស៊ីត្រង់នោះ ជាអ្នកភូមិផងរបងតែមួយ»។
បុរសជនជាតិថៃម្នាក់ទៀតឈ្មោះ វ៉ាន់ ឆៃកែវ សាវ៉េន អាយុ៥២ឆ្នាំ បានថ្លែងតាមរយៈអ្នកបកប្រែថា ៖ «គាត់ចង់ឲ្យប្រទេសទាំងពីរជាបងប្អូននឹងគ្នា ឲ្យដូចកាលពីមុន មិនឲ្យមានបញ្ហាអ៊ីចឹងទេ»។
អាជីវករខ្មែរឈ្មោះ ច្រឹប អាយុ៣២ឆ្នាំ បានថ្លែងថា ប្រជាពលរដ្ឋខ្មែរដែលជាអាជីវករមានការព្រួយបារម្ភដែរ ប៉ុន្តែមិនទាន់មានការជ្រួលច្របល់ដូចប្រជាជនថៃនោះទេ ៖ «ខាងគេ(ថៃ)រាងជ្រួលច្របល់បន្តិចដែរ ខាងយើងដូចមិនសូវទេ»។
ចំណែកឯអាជីវករខ្មែរម្នាក់ទៀតក៏បានថ្លែងបន្ថែមថា ៖ «បើថាខាងនោះវាមក ចេះតែទៅនឹងគេដែរ ចេញមកពីថៃហ្នឹងណា៎!»។
ជុំវិញស្ថានការណ៍ចាកចេញរបស់ពលរដ្ឋថៃនេះ លោកឧត្តមសេនីយ៍ ហ៊ុន ហ៊ាន ស្នងការនគរបាលខេត្តបន្ទាយមានជ័យ បានថ្លែងថា ស្ថានការណ៍ទូទៅនៅច្រកទ្វារអន្តរជាតិប៉ោយប៉ែតមានសភាពធម្មតា ប៉ុន្តែការចាកចេញរបស់ពលរដ្ឋថៃទំនងដោយសារក្រុមអាវលឿងថៃមានគម្រោងមកធ្វើបាតុកម្មកាលពីព្រឹកមិញ។
លោកឧត្តមសេនីយ៍ ហ៊ុន ហ៊ាន បានបញ្ជាក់ថា ៖ «គេថាបម្រុងនឹងមកធ្វើបាតុកម្មនៅផ្សារលុងកឿណា៎ ប៉ុន្តែខាងអភិបាលខេត្តស្រះកែវ លោកក៏មានវិធានការទប់មិនឲ្យមានសភាពការណ៍នោះកើតឡើងទេ»។
ទោះជាយ៉ាងណានៅក្នុងទឹកថៃជាប់ច្រកទ្វារអន្តរជាតិប៉ោយប៉ែត គេសង្កេតឃើញភាគីថៃបានដាក់ទាហានឈុតខ្មៅ កងតម្រួតជាច្រើនត្រៀមនៅទីនោះតាំងពីព្រឹកព្រលឹមមក។ ដោយឡែកនៅលើទឹកដីខ្មែរ វេលាម៉ោងប្រហែលជា១រសៀលថ្ងៃសុក្រដដែល គេសង្កេតឃើញកងខេមរភូមិន្ទមួយក្រុមមានគ្នាប្រហែលជា៤នាក់បានជិះឡាន១គ្រឿងដល់គល់ស្ពានមិត្តភាពកម្ពុជា-ថៃ ពិនិត្យស្ថានការណ៍នៅទីនោះហើយជិះឡានចេញទៅវិញ៕
អត្ថបទដែលទាក់ទង
មេបញ្ជាការខ្មែរព្រមានថៃពីរឿងធ្វើផ្លូវនៅតំបន់មិនទាន់ដាច់ស្រេច
ទាហានថៃបាញ់សម្លាប់ខ្មែរ២នាក់ខណៈឆ្លងដែនចូលទឹកដីថៃ
ខ្មែរនៅក្រៅប្រទេសចង់ឃើញរដ្ឋាភិបាលប្តឹងថៃពីរឿងប្រាសាទព្រះវិហារ
ហ៊ុនសែនបញ្ជាកុំឲ្យចល័តកងទ័ពនៅតាមព្រំដែននៅពេលថៃមានបញ្ហា
កម្ពុជាលាវពង្រឹងកិច្ចសហប្រតិបត្តិការបង្រ្កាបបទល្មើសឆ្លងដែន
មន្រ្តីខ្មែរអំពាវនាវកុំឲ្យពលរដ្ឋទៅប្រទេសថៃបើមិនចាំបាច់
ថាក់ស៊ីនត្រូវស្នើឲ្យចាកចេញពីប្រទេស UAE?
ហ៊ុនសែនប្រតិកម្មតបអគ្គលេខាធិការអាស៊ានជុំវិញការធ្វើសមយុទ្ធយោធា
ខ្មែរបំភ្លឺតបទៅអគ្គលេខាធិការអាស៊ានជុំវិញការធ្វើសមយុទ្ធយោធានៅកម្ពុជា
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
Cambodians seem not to worry as much as the Thai. You should know why.
2009-11-07 03:26
មើលមតិទាំងអស់.