លោក ឆែម សារួម ជាសមាជិកសមាគមអ្នកសារព័ត៌មានឃ្លាំមើលកម្ពុជាដែលជាអ្នកកាសែតម្នាក់ក្នុងចំណោមអ្នកកាសែតទទួលរងការគំរាមកំហែងពីកងទាហាននោះ បានមានប្រសាសន៍កាលពីព្រឹកថ្ងៃសុក្រ ទី១ ខែមករា ឆ្នាំ២០១០ ថា ក្រុមអ្នកកាសែតចំនួន ១១នាក់បាននាំគ្នាជិះរថយន្តពេលយប់ទៅតំបន់ភូមិកូល សង្កាត់កូនក្រៀល ហើយបានជួបរថយន្តដឹកឈើធំចំនួន ២គ្រឿងដែលជាប់ផុង ក៏នាំគ្នាថតយករូបភាព។ ភ្លាមៗនោះកងទាហានប្រដាប់ដោយអាវុធក៏បានយកកាំភ្លើងមកភ្ជង់ពួកគេនិងឃាត់មិនឲ្យទៅណា។
អ្នកកាសែតដដែលបានមានប្រសាសន៍ទៀតថា ទោះយ៉ាងណាគេពុំបានស្គាល់អង្គភាពទាហានទាំងនោះទេ ប៉ុន្តែគេឃើញទាហានទាំងនោះមានឯកសណ្ឋានជាកងវរការពារព្រំដែន។
លោក ឆឺម សារួម បានបញ្ជាក់ថា ៖ «យប់មិញគ្នាប្រហែលជា ១១នាក់កាសែត។ ពួកខ្ញុំទៅភូមិកូលចម្ងាយពីខ្ទម ១០០ម៉ែត្រ ឃើញឡានអាយីឌុប២គ្រឿងជាប់ផុង ឡានដឹកឈើ ហើយពួកខ្ញុំក៏បានទៅដល់ សួរគេមិនប្រាប់ ក៏បានថតសកម្មភាពពីក្រោយឡាន។ ទាហានប្រហែលជិត ១០នាក់សម្លៀកបំពាក់សុទ្ធតែវរព្រំដែន ស្រាប់តែគេយកកាំភ្លើងអាកា ២ដើម កាំភ្លើងខ្លី ១ដើម គេភ្ជង់អ្នកកាសែតគំរាមដកម៉ាស៊ីន អាណាចចេសដាក់វា គេរកវាយរកអីទៅណា! ឃាត់ប្រហែលជា ១ម៉ោងជាង»។
ក៏ប៉ុន្តែអភិបាលខេត្តឧត្តរមានជ័យ លោក ប៉ិច សុខិន បានមានប្រសាសន៍ថា លោកពុំបានទទួលព័ត៌មានអំពីការគំរាមកំហែងទៅលើក្រុមអ្នកកាសែតដោយកងទាហាននោះទេ។
ចំណែកប្រធានក្លឹបអ្នកកាសែតកម្ពុជា លោក ប៉ែន សមិទ្ធិ បានមានប្រសាសន៍ថា កងទាហានដែលប្រដាប់ដោយអាវុធមិនគួរប្រើសកម្មភាពដូច្នោះទៅលើអ្នកកសែតទេ។
លោក ប៉ែន សមិទ្ធិ បានមានប្រសាសន៍ថា ប្រសិនបើកងទាហានធ្វើបែបនោះទៅលើក្រុមអ្នកកាសែតមែនគឺជាអំពើខុសច្បាប់។
លោក ប៉ែន សមិទ្ធិ បានមានប្រសាសន៍ថា ៖ «វាជាការគំរាមកំហែងមួយ និងជាការរំលោភដែលអ្នកកាសែតទាំងអស់ហ្នឹងគួរតែពិនិត្យមើលមើល៍ថា តើគាត់អាចនឹងធ្វើការតវ៉ាតាមផ្លូវច្បាប់យ៉ាងម៉េចទៅលើសកម្មភាពហ្នុង»។
ក្លឹបអ្នកកាសែតកម្ពុជាបានឲ្យដឹងថា ក្នុងមួយរយៈកន្លងមកនេះនៅតាមបណ្តាខេត្តភាគឧត្តរនៃប្រទេសមានអ្នកកាសែតក្នុងស្រុកមួយចំនួនធ្លាប់បានទទួលរងការគំរាមនិងវាយដំដោយសារតែអ្នកកាសែតមួយចំនួនបានយកឈ្មោះអ្នកកាសែតទៅកាក់ឡានឈើយកលុយពីពួករកស៊ីដឹកឈើខុសច្បាប់ ហើយក្លឹបការពារអ្នកកាសែតនិងសមាគមអ្នកកាសែតដទៃទៀតកំពុងប្រឹងប្រែងធ្វើយ៉ាងណាដើម្បីកុំឲ្យបាតុភាពដូចនោះកើតឡើង ក៏ប៉ុន្តែវានៅតែមានដដែល៕