លោក ម៉ៅ មុនីវណ្ណ តំណាងរាស្ត្រខេត្តកំពង់ចាម បានផ្ដល់សម្ភាសន៍ឲ្យដឹងថា ការចុះត្រួតពិនិត្យនេះបានធ្វើឡើង បន្ទាប់ពីមានប្រជាពលរដ្ឋរស់នៅក្នុងភូមិ៣ ក្នុងឃុំកក់ ស្រុកពញាក្រែក បានរាយការណ៍ថា បន្ទាប់ពីមានការបោះបង្គោលព្រំដែនកាលពីឆ្នាំ២០០៨មក លំនៅឋានរបស់ពួកគាត់បែរជាទៅនៅក្នុងទឹកដីវៀតណាមទៅវិញ។
លោក ម៉ៅ មុនីវណ្ណ បានបញ្ជាក់ថា ៖ «ប្រជាពលរដ្ឋលោកភ័យបារម្ភថា ភូមិដែលគាត់នៅ ភូមិ៣ហ្នឹង ឥឡូវហ្នឹងក្រោយពីបោះបង្គោលព្រំដែនប៉ុណ្ណឹងទៅ គាត់ហ្នឹងទៅនៅខាងដីវៀតណាមវិញ!»។
ប្រជាពលរដ្ឋនៅភូមិអន្លង់ជ្រៃ បានផ្ដល់សម្ភាសន៍ដោយបញ្ជាក់ថា ពួកគេរស់នៅទីនោះតាំងពីយូរមកហើយ ស្រាប់តែគេបោះបង្គោលព្រំដែនចូលហួសផ្ទះពួកគាត់ក្នុងទឹកដីខ្មែរប្រមាណ ៣ ទៅ ៤គីឡូម៉ែត្រ ធ្វើឲ្យពួកគាត់មានការបារម្ភ តែមិនហ៊ាននិយាយស្ដី។
ក្រុមប្រជាពលរដ្ឋបានឲ្យដឹងថា ៖ «ដីហ្នឹងមុខរណារ មានចេញ មានចូល! គាត់ថា ចេះតែដាំ ចេះតែធ្វើទៅ កាលណាវៀតណាមមក ទុកចប ទុកពូថៅ ដើរមកផ្ទះវិញទៅ! គាត់ថា ប៉ុណ្ណឹងណា៎! បើគេមិនមកទេ ចេះតែដាំ ចេះតែធ្វើទៅ។ បង្គោលនេះទើបតែបោះឥឡូវហ្នឹងទេ យល់ថា យួនវាយកដីខ្មែរច្រើន តែប្រជាជនមិនហ៊ានថាម៉េច!»។
តាមដងផ្លូវលំលេខ៨ ពីខាងលិចមន្ទីរស្រុកពញាក្រែកទៅកាន់ព្រំដែនវៀតណាម ទៅដល់ភូមិអន្លង់ជ្រៃ គេឃើញមានបង្គោលព្រំដែនលេខ១២៥ បោះនៅទីនោះ តែទៅហួសប្រមាណ ១គីឡូម៉ែត្រទៀត គេឃើញមានភូមិប្រជាពលរដ្ឋខ្មែរ និងប៉ុស្តិ៍ត្រួតពិនិត្យព្រំដែនខ្មែរ មានប៉ុស្តិ៍ប៉ូលិស ប៉ុស្តិ៍គយជាដើម កំពុងឈរជើងធ្វើការនៅទីនោះដែរ។
មន្ត្រីប៉ូលិសប៉ុស្តិ៍ព្រំដែននៅទីនោះ គឺលោក ហេង សុថុន បានអះអាងថា លោកមិនច្បាស់ថា ភូមិសាស្ត្រនៅទីនោះជាភាគីខាងណាឡើយ សូម្បីតែការបោះទីតាំងកំពុងឈរជើងហ្នឹងក៏មិនដឹងថា នៅលើចំណុចណាផង។
លោក ហ៊ុន ណេង អភិបាលខេត្តកំពង់ចាម បានបញ្ជាក់ពីបញ្ហាព្រំដែននោះថា យោងតាមផែនទីតាំងពីជំនាន់បារាំង ចំណុចភូមិដែលមាននៅទីនោះ គឺស្ថិតនៅក្នុងទឹកដីវៀតណាមតាំងពីដើមមក។
លោក ហ៊ុន ណេង បានអះអាងថា ៖ «កន្លែងនេះ បើនិយាយមែនទែន មួយភូមិហ្នឹងស្ថិតនៅក្នុងដីវៀតណាមទេ! និយាយពីផែនទី ផែនទីដែលយើងតម្កល់ទុកនៅអង្គការសហប្រជាជាតិក្នុងចន្លោះឆ្នាំ១៩៦៨ ដល់ឆ្នាំ១៩៦៩ អ៊ីចឹងយើងចុចទាំងអស់ ចុចទៅដីហ្នឹងវាស្ថិតនៅក្នុងដីរបស់វៀតណាម ប៉ុន្តែយើងសុំឲ្យរក្សាយកនូវការសម្រេចរបស់ទេសាភិបាលបារាំងនៅក្នុងឆ្នាំ១៩១៤ គេសុំរក្សាស្ថានភាពបច្ចុប្បន្ន។ អ៊ីចឹងបើយក ១៩១៤ ទេសាភិបាលបារាំងសម្រេច ត្រង់ហ្នឹងគឺដីវៀតណាមទាំងអស់»។
ប្រជាពលរដ្ឋតែងមានការបារម្ភថា ខ្លាចគេឲ្យប្ដូរសញ្ជាតិ ហើយបានសំណូមពរសុំរដ្ឋាភិបាលរកដីថ្មី ដើម្បីផ្ដល់ការរស់នៅរបស់ពួកគេ ដែលបញ្ហានេះលោក ហ៊ុន ណេង អភិបាលខេត្តបានបញ្ជាក់ថា រដ្ឋាភិបាលកំពុងគិតគូរពីរឿងនេះហើយ។
តំណាងរាស្ត្ររបស់គណបក្ស សម រង្ស៊ី ពុំទាន់បញ្ជាក់ថា នឹងត្រូវធ្វើយ៉ាងណា បន្ទាប់ពីត្រួតពិនិត្យព្រំដែនរួចហើយនោះនៅឡើយទេ៕