បុរសឈ្មោះ ស្រឿន សុខណា អាយុ២៥ឆ្នាំ ជាកសិកររស់នៅភូមិកោះសម្ពាយ ឃុំកោះសម្ពាយ ស្រុកសៀមបូក ត្រូវបានចៅក្រមឈ្មោះ ម៉ែន វណ្ណៈ ហៅមកសួរចម្លើយ។ ក្រោយពេលសួរចប់ ឈ្មោះ ស្រឿន សុខណា ត្រូវបានតុលាការចេញដីកាឲ្យឃុំខ្លួនតែម្ដង។
លោក ស្រឿន ធី ជាបងប្រុសបង្កើតរបស់ ស្រឿន សុខណា អះអាងឲ្យដឹងថា ប្អូនប្រុសបង្កើតរបស់លោក ឈ្មោះ ស្រឿន សុខណា គឺជាជនរងគ្រោះ ដែលត្រូវមនុស្សប្រុសមួយក្រុម ព្រួតគ្នាវាយ និងដេញកាប់កាលពីថ្ងៃទី១៣ ខែឧសភា។
លោក ស្រឿន ធី មានប្រសាសន៍បន្តថា កាលពីថ្ងៃទី១៣ ឧសភា លោកនិងប្អូនប្រុស នាំគ្នាទៅចម្ការ។ នៅតាមផ្លូវ ដោយសាររែកទឹកធ្ងន់ពេក លោកក៏ឲ្យប្អូនប្រុសជួយរែកម្ដង ប៉ុន្តែប្អូនប្រុសលោកបានប្រកែកតមាត់ និងបន្ទោសលោក។ ខណៈនោះដែរ មនុស្សមួយក្រុម មានគ្នា ៤នាក់ ដែលនៅក្បែរផ្លូវ បានចាប់យកសម្ដីតមាត់គ្នា ពីរនាក់បងប្អូននោះថា ជាការប្រើពាក្យសម្ដីដឺដង សំដៅលើពួកគេ ហើយពួកគេក៏បើកការវាយដំយ៉ាងដំណំ លើប្អូនលោកតែម្ដង។
លុះមកដល់ថ្ងៃទី១៥ មិថុនានេះ បែរជាតុលាការចាប់ប្អូនលោកជាជនរងគ្រោះដាក់គុកទៅវិញ វាអយុត្តិធម៌ណាស់ ៖ «វាអយុត្តិធម៌ វាបិទសិទ្ធិសេរីភាពឲ្យយើងនិយាយ សម្លុតយើងអ៊ីចឹងទៅ ក៏តេហៅប៉ូលិសមកក៏ដាក់គុក»។
មន្ត្រីស៊ើបអង្កេតអង្គការសិទ្ធិមនុស្សអាដហុក ខេត្តស្ទឹងត្រែង លោក ហូរ សំអុល បានថ្លែងថា ក្រោយពេលត្រូវគេវាយដំ និងបានគេចខ្លួនរួច ពីរនាក់បងប្អូននេះ បាននាំគ្នាមកប្ដឹងព្រះរាជអាជ្ញាតុលាការខេត្តស្ទឹងត្រែងដែរ កាលពីថ្ងៃទី២៨ ខែឧសភា ប៉ុន្តែមិនទាន់មានចំណាត់ការណាមួយឡើយ ហើយភាគីជម្លោះម្ខាងទៀត ក៏បានប្ដឹងឈ្មោះ ស្រឿន សុខណា ទៅតុលាការដូចគ្នា។
លោកមានប្រសាសន៍ដូច្នេះ ៖ «បើយើងគិតមើលតាមអង្គហេតុ គាត់ជាជនរងគ្រោះ ហើយបែរជាគេឃុំខ្លួនគាត់ទៅវិញអ៊ីចឹង»។
ចៅក្រមតុលាការខេត្តស្ទឹងត្រែង លោក ម៉ែន វណ្ណៈ មិនធ្វើអត្ថាធិប្បាយក្នុងរឿងនេះទេ ហើយបានជំរុញឲ្យសួរទៅព្រះរាជអាជ្ញាតុលាការវិញ។
ចំណែកឯព្រះរាជអាជ្ញាតុលាការខេត្តស្ទឹងត្រែង លោក ច្រឹង ខ្មៅ បានបញ្ជាក់ថា ការឃុំខ្លួនឈ្មោះ ស្រឿន សុខណា ត្រូវបានធ្វើឡើងពីបទចោទប្រកាន់អំពីការបង្ករបួសស្នាម។ ការឃុំខ្លួន គឺជានីតិវិធីរបស់ចៅក្រមស៊ើបអង្កេត បើទោះជាឈ្មោះ ស្រឿន សុខណា បានប្ដឹងមកព្រះរាជអាជ្ញាថា ខ្លួនជាជនរងគ្រោះក៏ដោយ។
លោក ច្រឹង ខ្មៅ មានប្រសាសន៍ ៖ «អានេះនៅក្នុងនីតិវិធីស៊ើបអង្កេតរបស់ចៅក្រមនៅឡើយ។ ខ្ញុំមិនអាចនិយាយពីការរបស់ចៅក្រមទេ»។
ក្រុមគ្រួសារលោក ស្រឿន សុខណា សូមឲ្យអង្គការមិនមែនរដ្ឋាភិបាល និងស្ថាប័នពាក់ព័ន្ធជួយរកយុត្តិធម៌ចំពោះរឿងនេះ៕