ប្រតិភូជាន់ខ្ពស់យោធាកម្ពុជាដឹកនាំដោយលោក ទៀ បាញ់ មានគម្រោងការជួបជាមួយនឹងមន្ត្រីជាន់ខ្ពស់យោធាប្រទេសចិន និងទៅមើលឃ្លាំងសម្ភារៈយោធារបស់ចិនមួយចំនួន រាប់ទាំងឧទ្ធម្ភាគចក្រជាដើម។
មន្ត្រីអ្នកនាំពាក្យក្រសួងការពារជាតិកម្ពុជា លោកឧត្ដមសេនីយ៍ឯក ឈុំ សុជាត ដែលបានជូនដំណើរប្រតិភូយោធាជាន់ខ្ពស់នោះ នៅឯអាកាសយានដ្ឋានអន្តរជាតិភ្នំពេញ នៅថ្ងៃទី១៤ ខែកញ្ញា បានមានប្រសាសន៍ថា ទស្សនកិច្ចនេះមានសារសំខាន់ក្នុងកិច្ចសហប្រតិបត្តិការទ្វេភាគីរវាងចិន និងកម្ពុជា។
លោកឧត្ដមសេនីយ៍ឯក ឈុំ សុជាត បានបញ្ជាក់ថា ៖ «បង្កើននូវទំនាក់ទំនងទ្វេភាគីថែមទៀត រវាងកងទ័ពរវាងប្រទេសទាំងពីរ។ យើងបានស្វែងយល់នូវបច្ចេកវិទ្យាទំនើប ដែលប្រទេសចិនជាមហាអំណាចមួយនៅអាស៊ីដែរ ហើយមានបច្ចេកវិទ្យាខ្ពស់ក្នុងការផលិតផលិតផលប្រើប្រាស់ ក៏ដូចជាផលិតផលព័ត៌មានវិទ្យា និងបច្ចេកទេសយោធាមួយចំនួន។ គួរតែយើងធ្វើការសិក្សារៀនសូត្រពីប្រទេសមហាអំណាចនេះ!»។
ជាមួយគ្នានេះដែរ ប្រភពពីមន្ត្រីក្រសួងការពារជាតិដែលសុំមិនឲ្យបញ្ចេញឈ្មោះ បានឲ្យដឹងថា ប្រទេសកម្ពុជានឹងទទួលបានរថគ្រោះជាង ៥០គ្រឿង និងរថពាសដែកចំនួនជាង ៤០គ្រឿងពីប្រទេសនៅអឺរ៉ុបខាងកើត នាពេលឆាប់ៗខាងមុខនេះ។ កាលបរិច្ឆេទ និងចំនួនក្នុងការទទួលនោះកំពុងតែរៀបចំនៅឡើយ។
ទាក់ទងនឹងទំនាក់ទំនងរវាងកម្ពុជា ជាមួយប្រទេសចិន និងប្រទេសវៀតណាម ថ្មីៗនេះតំណាងរាស្ត្រគណបក្ស សម រង្ស៊ី និងជាមន្ត្រីអ្នកនាំពាក្យ លោក យឹម សុវណ្ណ បានមានប្រសាសន៍ថា ៖ «ទំនាក់ទំនងនេះបានធ្វើឲ្យប្រជាពលរដ្ឋយើងមានការព្រួយបារម្ភ។ យើងត្រូវតែប្រយ័ត្នប្រយែងអំពីទំនាក់ទំនងនេះឲ្យបានមែនទែន!»។
សកលវិទ្យាធិការនៃសកលវិទ្យាល័យខេមរៈ នៅក្នុងប្រទេសកម្ពុជា លោកបណ្ឌិត សុខ ទូច បានមានប្រសាសន៍សាទរទំនាក់ទំនងខាងលើនេះ ៖ «កម្ពុជាទៅចាប់ចិន ក៏អាចទទួលបាននូវបច្ចេកវិទ្យាទំនើបៗ ដែលចិនកំពុងតែប្រើប្រាស់ ហើយចិនក៏ចង់ពង្រីកឥទ្ធិពលរបស់ខ្លួនចូលមកកាន់កម្ពុជាដែរ!»។
ប្រទេសកម្ពុជាបានទទួលរថយន្តយោធាពីប្រទេសចិនចំនួន ២៥៧គ្រឿង កាលពីថ្ងៃទី១៨ ខែមិថុនាកន្លងទៅនេះ តាមសំណើរបស់កម្ពុជា ក្រោយពីសហរដ្ឋអាមេរិកបានផ្អាកកម្មវិធីជំនួយយោធាខ្នាតតូចមកកម្ពុជា កាលពីដើមឆ្នាំ២០១០កន្លងទៅ។
ការផ្អាកនោះនៅក្រោយពេលរដ្ឋាភិបាលកម្ពុជា បានចាប់បញ្ជូនជនជាតិភាគតិច អ៊ុយហ្គរ៍ (Uighur) ចំនួន ២០នាក់ កាលពីខែធ្នូ ឆ្នាំ២០០៩កន្លងទៅ ដោយបង្ខំក្នុងឋានៈដែលកម្ពុជា ជាប្រទេសហត្ថលេខីលើអនុសញ្ញាការពារជនភៀសខ្លួន៕