ស្នងការរងទទួលបន្ទុកការងារព្រំដែន លោក ផា ធា បានមានប្រសាសន៍ឲ្យដឹងនៅព្រឹកថ្ងៃសៅរ៍ ទី៤ ខែមេសា ថាកងទាហានឈុតខ្មៅថៃលេខ៥៤៧ប្រចាំការនៅស្រុកអូរណាំរ៉ន ខេត្តចាន់បូរី ចំនួន១០នាក់បានឆ្លងកាត់ព្រំដែនរំលោភចូលលើទឹកដីខ្មែរនៅចំណុចទួលរំដេង ត្រង់បង្គោលឡាក់លេខ៦៧និង៦៦ក្នុងខេត្តប៉ៃលិន។
លោក ផា ធា បានបន្តថា កងទាហានឈុតខ្មៅបានរំលោភចូលមកនៅចន្លោះរវាងម៉ោង៩និងម៉ោង១០ព្រឹកនាថ្ងៃទី៣ ខែមេសា ក្រោយពីមានការប៉ះទង្គិចគ្នារវាងកងទ័ពខ្មែរថៃនៅតំបន់វាលឥន្ទ្រី ខេត្តព្រះវិហារ កាលពីវេលាម៉ោងជាង៧ព្រឹកថ្ងៃដដែលនោះរួចមក ហើយត្រូវបានវរសេនាតូចលេខ៨២១ការពារព្រំដែនខ្មែរបណ្តេញឲ្យដកថយទៅវិញ។
លោក ផា ធា បានឲ្យដឹងថា ៖ «យើងបង្ខំឲ្យទៅវិញ ប្រញាប់ទៅ គាត់ទៅគ្មានធ្វើមាត់ធ្វើករអីផង មិនមានធ្វើអី គ្រាន់តែយើងប្រាប់ហ្នឹងក៏គាត់ទៅវិញទៅ។ ចូលមកមួយសន្ទុះ»។
តាមការអះអាងពីអាជ្ញាធរខេត្តប៉ៃលិន ក្រុមទាហានឈុតខ្មៅកងលេខ៥៤៧ទាំងនោះមិនបានបញ្ជាក់ពីគោលបំណងច្បាស់លាស់ទេ គឺគ្រាន់តែយល់ព្រមចាកចេញពីទឹកដីខ្មែរទៅវិញក្រោយពីមានការបណ្តេញរបស់កងកម្លាំងរដ្ឋាភិបាលខ្មែរ។
ទោះជាយ៉ាងណាវិទ្យុអាស៊ីសេរីមិនអាចទាក់ទងក្រុមទាហានឈុតខ្មៅថៃនៃកងលេខ៥៤៧ប្រចាំការនៅក្រវាត់ព្រំដែនក្នុងស្រុកអូរណាំរ៉ន ខេត្តចាន់បូរីជាប់ខេត្តប៉ៃលិន ដើម្បីបញ្ជាក់បន្ថែមបានទេ។
តាមកងទាហានការពារព្រំដែនខ្មែរប្រចាំការនៅចំណុចជួរភ្នំផល្លីផល្លា ខេត្តប៉ៃលិន បានឲ្យដឹងបន្ថែមនៅថ្ងៃនេះថា ក្រុមទាហានឈុតខ្មៅថៃបានយកផ្លាកសញ្ញមីនមកដោតលើទឹកដីខ្មែរជាច្រើនកន្លែងនៅចន្លោះបង្គោលឡាក់លេខ៦៨និងបង្គោលឡាក់លេខ៦៩។
ទាហានដដែលបានបញ្ជាក់ថា ៖ «ចូលឡាក់៦៨ហ្នឹង វាយកសញ្ញាមីនវាមកដាក់លើដីយើង។ ទាហានខ្ញុំដើរល្បាតទៅទើបនឹងឃើញវាដាក់ថ្មីៗឡាក់៦៨ ៦៩។ សញ្ញាមីនដូចសញ្ញាយើងដែរ»។
ទាក់ទងនឹងបញ្ហាទាហានថៃយកសញ្ញាមីនមកដោតលើដីខ្មែរនេះ កងល្បាតការពារព្រំដែនខ្មែរបានថ្លែងបញ្ជាក់ថា មេបញ្ជាការការពារព្រំដែនរដ្ឋាភិបាលខ្មែរនៅខេត្តប៉ៃលិនកំពុងធ្វើការត្រួតពិនិត្យដើម្បីកោះហៅភាគីថៃឲ្យដកចេញវិញ។
គួរបញ្ជាក់ថា សកម្មភាពរំលោភបំពាននានារបស់ទាហានឈុតខ្មៅថៃនៅក្នុងខេត្តចាន់បូរីជាប់ខេត្តប៉ៃលិនខ្មែរត្រូវបានគេកត់សម្គាល់ថាបានកើតមានឡើងក្រោយពីមានការប៉ះទង្គិចគ្នាដោយអាវុធជាថ្មីម្តងទៀតចំនួនពីរឈុតរវាងកងទ័ពប្រទេសថៃនិងកងទ័ពរដ្ឋាភិបាលខ្មែរនៅតំបន់ខេត្តព្រះវិហារកាលពីថ្ងៃទី៣ ខែមេសា ឆ្នាំ២០០៩នេះ៕