លោក ថោង ខុន រដ្ឋមន្ត្រីក្រសួងទេសចរណ៍នៃប្រទេសកម្ពុជា បានមានប្រសាសន៍កាលពីរសៀលថ្ងៃច័ន្ទ ទី២៦ ខែកក្កដាថា ចំនួនភ្ញៀវទេសចរណ៍បរទេសដែលចូលមកទស្សនាប្រទេសខ្មែរក្នុងរយៈពេល ៦ខែដើមឆ្នាំ២០១០នេះ បានកើនឡើង ១២% បើប្រៀបធៀបទៅនឹងតួលេខរយៈពេល ៦ខែកាលពីឆ្នាំ២០០៩ ដែលមានចំនួនភ្ញៀវទេសចរណ៍បរទេស ១លាន២០ម៉ឺននាក់នោះ។
លោក ថោង ខុន មានប្រសាសន៍ដូច្នេះ ៖ «ទីផ្សារអាស៊ីងើបខ្ពស់ជាងគេ ចិនកើនឡើងជិត ៤០% កូរ៉េជិត ៤០% ជប៉ុនដែលធ្លាប់កើនតិច ក៏កើនដល់ទៅ ៧%ដែរ ហើយនៅក្បែរយើងនេះ វៀតណាមក៏កើន ៤០%ជាងដែរ។ ដោយឡែកនៅខាងអឺរ៉ុបនោះ មិនទាន់មានកំណើនច្រើនទេ ប៉ុន្តែចំនួនហ្នឹងនៅតែរក្សាស្ថិរភាពដដែល ដោយសារសេដ្ឋកិច្ចនៅអឺរ៉ុបហ្នឹងក៏វាមិនទាន់ងើបឡើងល្អដែរទេ»។
លោករដ្ឋមន្ត្រី ថោង ខុន បានមានប្រសាសន៍ថា មុនពេលដែលកើតមានវិបត្តិសេដ្ឋកិច្ចពិភពលោក ប្រទេសខ្មែរធ្លាប់បានទទួលកំណើនទេសចរណ៍បរទេសចន្លោះពី ១៥ ទៅ ២០% ប៉ុន្តែនៅពេលមានវិបត្តិសេដ្ឋកិច្ចពិភពលោក វាបានប៉ះពាល់ធ្វើឲ្យធ្លាក់ចុះនូវកំណើនទេសចរដែរ ហើយពេលបច្ចុប្បន្ននេះ បន្ទាប់ពីវិបត្តិសេដ្ឋកិច្ចពិភពលោកធូរស្រាលកំណើនទេសចរក៏ងើបឡើងវិញ។
លោក ថោង ខុន បានរំពឹងថា រហូតដល់ចុងឆ្នាំ២០១០នេះ កម្ពុជាអាចនឹងទទួលបានចំនួនទេសចរបរទេសប្រមាណ ២លាន៤សែននាក់។
លោក ហូ វណ្ឌី សហប្រធានក្រុមការងារទេសចរណ៍ឯកជន បានទទួលស្គាល់ថា រយៈពេល ៥ឆ្នាំចុងក្រោយនេះ តាមតួលេខភ្ញៀវទេសចរណ៍បរទេសចូលមកកាន់កម្ពុជា មានការកើនឡើងមែន ក៏ប៉ុន្តែលោកបានមើលឃើញថា ចំណូលទេសចរណ៍មួយចំនួនបានធ្លុះធ្លាយទៅលើដៃអ្នកវិនិយោគទុនបរទេស ដែលធ្វើឲ្យអ្នកវិនិយោគក្នុងស្រុក និងប្រជាពលរដ្ឋខ្មែរបាត់បង់ឱកាសក្នុងការទទួលបានកម្រៃពីវិស័យទេសចរណ៍នោះ។
លោក ហូ វណ្ឌី បានមានប្រសាសន៍ថា អ្នកវិនិយោគក្នុងស្រុកចង់ឃើញរដ្ឋាភិបាលខ្មែរទប់ស្កាត់ការបើកចំហភាពទូលាយ កុំឲ្យឱកាសដល់អ្នកវិនិយោគទុនបរទេសងាយស្រួលក្នុងការប្រកបរបរពីសេវាកម្មទេសចរណ៍របស់ប្រទេសខ្មែរនោះពេក។
លោក ហូ វណ្ឌី មានប្រសាសន៍ដូច្នេះ ៖ «មានក្រុមបរទេសមួយចំនួនហ្នឹង ឆក់យកឱកាសមាសឱកាសប្រាក់របស់កម្ពុជាយើង ដោយគេត្រឹមតែបង្កើតនូវវ៉ឹបសៃថ៍ (Website) គេអាចទទួលបានសេវាកម្មនេះដោយមិនបានឆ្លងកាត់ មិនបានបង់ពន្ធចូលមកកម្ពុជា។ នេះហើយគឺជាការបាត់បង់ឱកាសរបស់បងប្អូនប្រជាពលរដ្ឋកម្ពុជា។ ទី២ បាត់បង់នូវការបង់ពន្ធជូនទៅដល់រដ្ឋផងដែរ»។
ក្រសួងទេសចរណ៍នៃប្រទេសកម្ពុជា បានឲ្យដឹងថា ពេញមួយឆ្នាំ២០០៩ ភ្ញៀវទេសចរណ៍បរទេសចូលមកទស្សនាកម្ពុជា មានចំនួន ២លាន១៥ម៉ឺននាក់ ដែលបានចំណូលថវិកាទេសចរណ៍ជាតិ ១.៥០០លានដុល្លារសហរដ្ឋអាមេរិក៕