ភ្ញៀវទេសចរណ៍ក្នុងស្រុក និងបរទេសបានចាប់ផ្ដើមធ្វើដំណើរឡើងទៅលើខ្នងភ្នំដងរែកដើម្បីកម្សាន្តនៅប្រាសាទព្រះវិហារ ក្នុងទឹកដីស្រុកជាំខ្សាន្តវិញហើយ បើទោះបីជានៅជុំវិញតំបន់នោះនៅតែមានជម្លោះរ៉ាំរ៉ៃ ដោយកងទ័ពខ្មែរ និងថៃនៅតែប្រឈមមុខដាក់គ្នា ប៉ុន្តែការប្រយុទ្ធបានស្ងប់ស្ងាត់ជាង ៤ខែកន្លងទៅនេះ។
លោក គង់ វិបុល ប្រធានមន្ទីរទេសចរណ៍ប្រចាំខេត្តព្រះវិហារ បានមានប្រសាសន៍កាលពីល្ងាចថ្ងៃសៅរ៍ ទី១៨ ខែមិថុនាថា មានភ្ញៀវទេសចរណ៍ជាហូរហែ បានឡើងទៅទស្សនាប្រាសាទព្រះវិហារ បន្ទាប់ពីមានការអាក់ខានមួយរយៈពេលខ្លីមកនេះ ៖ "ឥឡូវអត់អីទេ ភ្ញៀវទៅមកៗ ធម្មតារាល់ថ្ងៃ។ កាលពីយើងមានបញ្ហាមុន កងកម្លាំងនៅហ្នឹងគ្រាន់តែឃាត់ខ្លាចឡើងទៅមានបញ្ហាអី បង្ការសន្តិសុខនៅទីនោះពេលដែលយើងមានបញ្ហាប៉ុន្មានថ្ងៃនោះទេ ប៉ុន្តែក្រោយមកយើងបើកដំណើរការធម្មតាអត់មានបញ្ហាអីទេ"។
ទោះយ៉ាងណា មន្ត្រីមន្ទីរទេសចរណ៍ខេត្តព្រះវិហារបានប៉ាន់ប្រមាណថា ចំនួនភ្ញៀវទេសចរណ៍ដែលឡើងទៅទស្សនាប្រាសាទព្រះវិហារក្នុងរយៈពេល ៦ខែ នៃឆ្នាំ២០១១ អាចនឹងមានការថយចុះជាងកាលពីឆ្នាំ២០១០ ដោយសារតែចាប់ពីថ្ងៃទី៤ ដល់ថ្ងៃទី៧ ខែកុម្ភៈ ឆ្នាំ២០១១ មានការប្រយុទ្ធគ្នាដ៏ខ្លាំងក្លារវាងទាហានខ្មែរ-ថៃ បណ្ដាលឱ្យប្រាសាទព្រះវិហារទទួលរងគ្រាប់ផ្លោងរបស់ទាហានថៃជាច្រើនពាន់កន្លែងទៀត ហើយទាំងភ្ញៀវទេសចរណ៍ក្នុងស្រុក និងអន្តរជាតិ មិនអាចឡើងទៅទស្សនាប្រាសាទនោះបានមួយរយៈពេលផង។
មន្ត្រីប៉ូលិសការពារបេតិកភណ្ឌមួយរូប ដែលកំពុងប្រចាំការពារប្រាសាទព្រះវិហារ បានឱ្យដឹងថា ពេលបច្ចុប្បន្ននេះ អ្នកទេសចរណ៍ក្នុងស្រុក និងបរទេស បានចាប់ផ្ដើមឡើងទៅទស្សនាប្រាសាទព្រះវិហារវិញ ក៏ប៉ុន្តែចំនួនភ្ញៀវទេសចរណ៍ហាក់មិនសូវសំបូរដូចនៅមុនពេលដែលទាហានខ្មែរ-ថៃ បើកការប្រយុទ្ធគ្នានោះទេ ៖ "មានចិនមានអីគេមកដែរ បារាំងអី។ ថ្ងៃហ្នឹងឃើញចិនគេមក ១ក្រុម ៣-៤នាក់ដែរ មាន Guide (មគ្គុទ្ទេសក៍ទេសចរណ៍) មានអីពីសៀមរាបយើងនោះឯង។ ពីម្សិលមិញរាងច្រើនដែរ ប្រហែលជា ៣០-៤០នាក់ អីចឹងទៅ"។
ទោះយ៉ាងណា មន្ត្រីមន្ទីរទេសចរណ៍ខេត្តព្រះវិហារមិនទាន់អាចបង្ហាញតួលេខនៃចំនួនភ្ញៀវទេសចរណ៍ក្នុងរយៈពេល ៦ខែដើមឆ្នាំ២០១១ នេះទេ ដោយគេអះអាងថា គេមិនទាន់បានសរុបតួលេខឱ្យបានច្បាស់លាស់នៅឡើយ។ កាលពីឆ្នាំ២០១០ កន្លងទៅ ចំនួនភ្ញៀវទេសចរណ៍ក្នុងស្រុក ដែលបានទៅទស្សនាប្រាសាទព្រះវិហារ មានប្រមាណជាង ៨ម៉ឺននាក់ ហើយចំនួនភ្ញៀវទេសចរណ៍បរទេសមានចំនួនជិត ២ម៉ឺននាក់៕