អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា លោក សុរិយា ស៊ូប៊ែឌី បានលើកឡើងនៅចំណុចថ្មីមួយ នៅពេលដែលលោកបានបញ្ចប់បេសកកម្មស្វែងរកការពិតស្ដីពីបញ្ហាសិទ្ធិមនុស្សលើកទី៥ នៅកម្ពុជាថា ក្នុងទស្សនកិច្ចការងារនៅកម្ពុជា លើកនេះ រូបលោករកឃើញថា មនុស្សជាច្រើនមានការភ័យខ្លាចមិនហ៊ានបញ្ចេញមតិ ហើយកំពុងតែរឹតត្បិតសេរីភាពរបស់ខ្លួនឯង។
ថ្លែងនៅក្នុងសន្និសីទសារព័ត៌មាននៅរសៀលថ្ងៃទី៣ មិថុនា ឆ្នាំ២០១១ នៅការិយាល័យឧត្ដមស្នងការទទួលបន្ទុកសិទ្ធិមនុស្ស រាជធានីភ្នំពេញ លោក សុរិយា ស៊ូប៊ែឌី មានប្រសាសន៍ថា ទន្ទឹមនឹងស្ថានការណ៍សិទ្ធិមនុស្សមានភាពល្អប្រសើរក្នុងវិស័យមួយចំនួន ក៏នៅមានបញ្ហាមួយចំនួនទៀតដែលមិនទាន់បានប្រសើរនៅឡើយ ដូចជាសិទ្ធិដីធ្លី ការបណ្ដេញចេញ និងសេរីភាពបញ្ចេញមតិ។
លោកថា ដោយសារតែភ័យខ្លាចប្រឈមនឹងការចោទប្រកាន់ពីបទបរិហារកេរ្តិ៍ បទផ្សាយព័ត៌មានមិនពិត និងបទញុះញង់មនុស្សជាច្រើន ដែលមានអ្នកកាសែត អ្នកការពារសិទ្ធិមនុស្ស និងសកម្មជននយោបាយ ព្រមទាំងបុគ្គលឯកជននានា ហាក់ដូចជា កំពុងរឹតត្បិតការបញ្ចេញមតិខ្លួនឯង។
លោក សុរិយា ស៊ូប៊ែឌី បញ្ជាក់ដូច្នេះ ៖ «ខ្ញុំមានកង្វល់ចំពោះការប្រើប្រាស់ការចោទប្រកាន់បែបនេះប្រឆាំងទៅនឹងសកម្មជនការពារសិទ្ធិខាងដីធ្លី និងបុគ្គលនានា ដែលធ្វើការទាមទារសិទ្ធិលើដីធ្លីដែលមានទំនាស់»។
លោក សុរិយា ស៊ូប៊ែឌី ក៏បានលើកឡើងថា មានច្បាប់ជាច្រើនដែលរដ្ឋាភិបាលបានតាក់តែង និងអនុម័ត និងធ្វើការកែលម្អ ក៏ប៉ុន្តែក្នុងនោះមានច្បាប់មួយចំនួនហាក់រឹតត្បិតសិទ្ធិរបស់ប្រជាពលរដ្ឋ។
បើទោះបីជាមានការលើកឡើងយ៉ាងនេះក្ដី មន្ត្រីជាន់ខ្ពស់រដ្ឋាភិបាលបានបដិសេធ។
ឆ្លើយតបបញ្ហានេះ លោក ផៃ ស៊ីផាន រដ្ឋលេខាធិការ និងជាអ្នកនាំពាក្យ ទីស្ដីការការគណៈរដ្ឋមន្ត្រី មានប្រសាសន៍ថា លោកមិនទាន់ជឿឡើយចំពោះការលើកបញ្ហាពលរដ្ឋមានការភ័យខ្លាចមិនហ៊ាន បញ្ចេញមតិនោះ។
លោកបញ្ជាក់ថា ការរិះគន់ស្ថាបនារបស់អ្នករាយការណ៍ពិសេសរូបនេះក្នុងន័យសហការគ្នា ហើយរដ្ឋាភិបាលនឹងបន្តខិតខំប្រឹងប្រែង និងធ្វើការកែលម្អចំណុចខ្វះខាតទាំងនេះ ៖ «បើសិនលោកប្រេសិតពិសេសរបស់អង្គការសហប្រជាជាតិ លោកចេះស្ដាប់ភាសាខ្មែរ ចេះអានភាសាខ្មែរ លោកបានដឹងតាមរយៈវិទ្យុអាស៊ីសេរី ពិសេសរយៈវិទ្យុដទៃទៀត»។
លោក សុរិយា ស៊ូប៊ែឌី អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា បានបញ្ចប់បេសកកម្មស្វែងរកការពិត ស្ដីពីបញ្ហាសិទ្ធិមនុស្សលើកទី៥ ក្នុងដំណើរទស្សនកិច្ចជាផ្លូវការមកកាន់កម្ពុជា រយៈពេល៥ថ្ងៃ នៅថ្ងៃទី៣០ ខែឧសភា ហើយបានបញ្ចប់នៅថ្ងៃទី៣ ខែមិថុនា ឆ្នាំ២០១១ គឺជាបេសកកម្មបន្តពីបេសកកម្មកាលពីខែកុម្ភៈ ឆ្នាំដដែល។
លោកក៏បានលើកយកបញ្ហាផ្សេងទៀត ដូចជា ស្ថានភាពដីធ្លី និងផ្ទះសម្បែងដែលប្រជាពលរដ្ឋមួយចំនួនកំពុងប្រឈមមុខនឹងការបណ្ដេញចេញ បញ្ហាការរឹតត្បិតសិទ្ធិសេរីភាពបញ្ចេញមតិ និងការប្រើកងកម្លាំងប្រដាប់អាវុធបង្ក្រាបប្រជាពលរដ្ឋ។
រីឯវិស័យការងារក្នុងរដ្ឋសភា មានការឆកល្វែងទាក់ទងការធ្វើច្បាប់គ្រប់ដំណាក់កាលពុំទាន់មានតម្លាភាព សេរីភាពបញ្ចេញមតិរបស់សមាជិកសភា និងការដកអភ័យឯកសិទ្ធិរបស់អ្នកតំណាងរាស្ត្រ។
នៅក្នុងសន្និសីទនេះដែរ លោកក៏បានលើកឡើងអំពីការអនុវត្តច្បាប់ក្នុងវិស័យតុលាការថា មានករណីអយុត្តិធម៌ជាច្រើនដែលនាំឲ្យពលរដ្ឋជាប់ពន្ធនាគារ។ ចំណែកឯអង្គជំនុំជម្រះវិសាមញ្ញក្នុងតុលាការកម្ពុជា លោកសុំមិនធ្វើអត្ថាធិប្បាយនោះទេ។
បញ្ហាទាំងអស់នេះ លោកនឹងដាក់ក្នុងរបាយការណ៍របស់លោកជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិ៕